కృష్ణవంశీతో సినిమా అని చిరుకు చెబితే..

‘నక్షత్రం’ సినిమా కోసం కృష్ణవంశీతో పనిచేయడం పట్ల చాలా ఎగ్జైట్ అవుతున్నాడు మెగాస్టార్ మేనల్లుడు సాయిధరమ్ తేజ్. ఇది తనకు అరుదైన అవకాశమని.. ‘నక్షత్రం’లో అలెగ్జాండర్ అనే మంచి క్యారెక్టర్ ఇచ్చాడని.. ఈ పాత్రను ఎప్పటికీ గుర్తుంచుకుంటానని తెలిపాడు. ఈ సినిమాలో తాను నటించబోతున్నట్లుగా తన మావయ్యలు చిరంజీవి.. పవన్ కళ్యాణ్ లకు చెబితే వాళ్లిద్దరూ కూడా చాలా సంతోషించినట్లు సాయిధరమ్ తెలిపాడు. అసలు తనకు ‘నక్షత్రం’లో నటించే ఛాన్స్ ఎలా వచ్చిందో.. కృష్ణవంశీతో పని చేయడం ఎలాంటి అనుభూతినిచ్చిందో ఈ చిత్ర ఆడియో వేడుకలో సాయిదరమ్ వివరించాడు.

‘‘కృష్ణవంశీ గారు ‘గోవిందుడు అందరివాడేలే’ సినిమా చేస్తున్నపుడు చరణ్‌ ను కలవడానికి షూటింగ్ స్పాట్ కు వెళ్లాను. అప్పుడు కృష్ణవంశీ గారితో మాటల సందర్భంగా ఎప్పుడైనా మీ సినిమాలో ఓ క్యారెక్టర్‌ ఉంటే చెప్పండి. చేస్తానన్నాను. ఆ మాటలను గుర్తు పెట్టుకొని ‘నక్షత్రం’లో అలెగ్జాండర్‌ అనే మంచి క్యారెక్టర్‌ ఇచ్చారు. కృష్ణవంశీ గారితో పని చేసే అవకాశం రాగానే చిరంజీవి.. పవన్ కల్యాణ్ మావయ్యల్ని కలిసి విషయం చెప్పాను. కృష్ణవంశీ సినిమాలో ఓ క్యారెక్టర్‌ చేస్తున్నాను అనగానే.. ఇద్దరూ వెరీ గుడ్.. ఆల్ ద బెస్ట్ అన్నారు. కృష్ణవంశీ గారి దగ్గర పనిచేస్తే నువ్వెంతో నేర్చుకొంటావంటూ చిరంజీవి మావయ్య చెప్పారు. నిజంగానే ఈ సినిమాతో చాలా నేర్చుకున్నా. ఈ సినిమా షూటింగుకి ఓ కాలేజీ స్టూడెంట్ లాగా వెళ్లాను. కృష్ణవంశీ గారు ఎన్నో విషయాలు నేర్పించారు. ఇందులో ఇది చాలా ఉద్వేగంతో కూడుకున్న పాత్ర. నటుడిగా నాకు బాగా పేరు తెస్తుంది. నక్షత్రం సినిమా నాకు మంచి అనుభవాన్ని ఇచ్చింది’’ అని సాయిధరమ్ తెలిపాడు.