రాశి ఖన్నాకు తమిళంలో బంపరాఫర్

రాశి ఖన్నా కెరీర్‌ను ‘తొలి ప్రేమ’కు ముందు.. ‘తొలి ప్రేమ’కు తర్వాత అని విభజించి చూడాలేమో. ఈ సినిమా ముందు వరకు ఆమెను అందరూ లైట్ తీసుకునేవాళ్లు. కమర్షియల్ సినిమాల్లో గ్లామర్ క్యారెక్టర్లు చేసే సగటు కథానాయికగానే చూసేవాళ్లు జనాలు ఆమెను ఇంతవరకూ. ఐతే ‘తొలి ప్రేమ’ సినిమాతో తానెంత మంచి పెర్ఫామరో రుజువు చేసింది రాశి. ఈ సినిమా తర్వాత ఆమెకు మంచి మంచి అవకాశాలే వస్తున్నట్లు సమాచారం. తాజాగా ఆమెకు తమిళంలో ఓ పెద్ద సినిమాలో ఛాన్స్ వచ్చింది. జూనియర్ ఎన్టీఆర్ కెరీర్లో మైలురాయిలా నిలిచిన ‘టెంపర్’ను తమిళంలో విశాల్ కథానాయకుడిగా రీమేక్ చేయబోతున్నట్లు ఎప్పుడో సమాచారం బయటికి వచ్చిన సంగతి తెలిసిందే.

ఈ చిత్రంలో రాశినే కథానాయికగా ఎంపికైంది. మహేష్ బాబు ‘స్పైడర్’ సినిమాకు మురుగదాస్ దగ్గర కో డైరెక్టర్‌ గా పని చేసిన వెంకట్ మోహన్ అనే కొత్త దర్శకుడు ఈ చిత్రాన్ని రూపొందించబోతున్నాడు. విశాల్ సొంత బేనర్.. లైట్ హౌజ్ మూవీ మేకర్స్ ఉమ్మడిగా ఈ చిత్రాన్ని ప్రొడ్యూస్ చేయబోతున్నాయి. రాశి ఇప్పటికే తమిళంలో మూడు సినిమాల్లో నటిస్తుండటం విశేషం. అధర్వ.. సిద్దార్థ్.. జయం రవిల సరసన ఆమె కథానాయికగా సినిమాలు చేస్తోంది. అధ్వర్వకు జోడీగా నటించే సినిమాలో నయనతార కూడా ఓ కీలక పాత్ర చేస్తుండటం విశేషం. తెలుగులో ఆమె కొత్తగా రెండు సినిమాలకు సంతకం చేసినట్లు సమాచారం.