టీజర్ పవర్ చూపించినా.. టార్గెట్ రీచ్ కాని ఫ్యాన్స్!

పవర్ స్టార్ పవన్ కళ్యాణ్ లేటెస్ట్ మూవీ 'వకీల్ సాబ్'. దాదాపు మూడేళ్ల తర్వాత రాబోతున్న సినిమా కావడంతో పవన్ అభిమానులతోపాటు, ఇతర ప్రేక్షకులు సైతం ఆసక్తిగా ఎదురు చూస్తున్నారు. మూడు రోజుల క్రితం విడుదలైన ఈ మూవీ టీజర్ కు మంచి క్రేజ్ వచ్చింది.

అన్ని అవాంతరాలనూ దాటుకొని సంక్రాంతి పర్వదినం సందర్భంగా రిలీజైంది వకీల్ సాబ్ టీజర్. ఈ టీజర్ మోస్ట్ పవర్ ప్యాక్డ్ విజన్ ను ఎక్స్ ప్రెస్ చేసింది. 'అబ్జక్షన్ యువర్ హానర్' అంటూ మొదలైన ఈ టీజర్ ను మొత్ం పవన్ మాత్రమే ఆక్రమించారు.

కోర్టులో వాదించడమూ తెలుసు.. వాయించడమూ తెలుసు' అంటూ కేవలం రెండే డైలాగులతో ముగించిన ఈ టీజర్ అభిమానులకు గూస్ బమ్స్ చేసింది. ఎప్పుడెప్పుడు మిగిలిన సినిమాను చూసేద్దామా? అనే కోరికను రెట్టింపు చేసింది.

అయితే.. ఈ టీజర్ కోసం పవన్ ఫ్యాన్స్ ఓ రేంజ్ లో ప్లాన్ వేశారు. వ్యూస్, లైక్స్ విషయంలో నెవర్ బిఫోర్ రికార్డులు సాధించడానికి ప్రయత్నించారు. 24 గంటల్లోనే 1 మిలియన్ లైక్స్ కొట్టేసి ఫాస్టెస్ట్ 1 మిలియన్ లైక్ సాధించిన టీజర్ గా వకీల్ సాబ్ ను నిలబెట్టాలని ట్రై చేశారు.

కానీ.. మూడు రోజులు కావస్తున్నా ఆ టార్గెట్ రీచ్ కాకపోవడం గమనార్హం. అయితే.. అలాగని ఇప్పటి వరకు వచ్చిన రెస్పాన్స్ తక్కువేం కాదు. ఒక రీమేక్ సినిమాకు, అందునా పెద్దగా ప్రమోషన్స్ కూడా చేయని వకీల్ సాబ్ మూవీ టీజర్.. టాలీవుడ్ టాప్-2 మోస్ట్ లైక్డ్ టీజర్ గా నిలవడం విశేషం!

పవన్ ఇలా రీమేక్ కాకుండా ఒక స్ట్రయిట్ సినిమాతో వచ్చి ఉంటే డెఫినెట్ గా దాని రేంజ్ మరో స్థాయిలో ఉండేదనే అభిప్రాయం వ్యక్తమవుతోంది. ఈ చిత్రం హిందీలో ఘన విజయం సాధించిన 'పింక్‌' చిత్రానికి రీమేక్ అన్న సంగతి తెలిసిందే.

వేణు శ్రీరామ్‌ దర్శకత్వంలో తెరకెక్కుతున్న ఈ చిత్రాన్ని దిల్‌రాజు, బోనీకపూర్‌ సంయుక్తంగా నిర్మిస్తున్నారు. తమన్‌ స్వరాలు అందిస్తున్నారు.