కమల్ పూజతో రాజశేఖర్ రొమాన్స్

సీనియర్ హీరో రాజశేఖర్ చాలా గ్యాప్ తీసుకుని సినిమా చేస్తున్నాడు. 2015లో వచ్చిన గెడ్డం గ్యాంగ్ తర్వాత ఈ యాంగ్రీ యంగ్ మ్యాన్.. మళ్లీ ఓ సినిమాని పట్టాలెక్కించేశాడు. రెండు మూడు ప్రాజెక్టులు వార్తల్లో నానినా.. గుంటూరుటాకీస్ దర్శకుడు ప్రవీణ్ సత్తారుతో రీసెంట్ గా ఓ మూవీని ఫైనల్ చేశారు.

రాజశేఖర్ - ప్రవీణ్ సత్తారు కాంబినేషన్ లో తెరకెక్కనున్న చిత్రానికి పూజా కుమార్ ని హీరోయిన్ గా ఫైనల్ చేసినట్లు తెలుస్తోంది. కమల్ హాసన్ కి హీరోయిన్ గా వరుసగా సినిమాలు చేస్తున్న ఈమె.. విశ్వరూపంతో పాటు ఉత్తమ విలన్ లో కూడా కనిపించింది. గతంలో అమెరికన్ షోస్ చేసిన అనుభవం కూడా ఉన్న పూజా కుమార్ ని.. హైలీ ట్యాలెంటెడ్ యాక్ట్రెస్ అంటారు. అయితే ఇప్పటివరకు ఇండియన్ సినిమాలోనే కాదు.. ఎక్కడా కూడా సరైన బ్రేక్ మాత్రం రాలేదు. కమల్ తో సినిమా చేసినప్పటికీ ఈమెకు ఇక్కడ ఆఫర్లు చిక్కకపోవడం కాస్త విడ్డూరమే.

దర్శకుడు ప్రవీణ్ సత్తారు.. రాజశేఖర్ ని  చాలా కాలం తర్వాత పవర్ ఫుల్ పోలీస్ ఆఫీసర్ గా చూపించబోతున్నాడు. ఇదే సినిమాపై ఆసక్తి కలిగిస్తే.. ఇప్పుడు పూజా కుమార్ లాంటి భామను పట్టుకు రావడం హాట్ టాపిక్ అయింది. ఈ కాంబినేషన్ కొత్తగా కనిపించడం ఖాయమని.. రాజశేఖర్- పూజా కుమార్ ల జోడీ సరిగ్గా సరిపోతుందని అంటున్నారు.