నిత్యామీన‌న్ మ‌ళ్లీ వ‌స్తుందండోయ్‌

రింగులజుత్తు సోయ‌గం నిత్యామీన‌న్ ఇటీవ‌లి కాలంలో బొత్తిగా న‌ల్ల‌పూస అయిపోయింది. టాలీవుడ్‌ లో అస్స‌లు క‌నిపించ‌డం లేదు. మ‌ళ్లీ మ‌ళ్లీ ఇది రాని రోజు, స‌న్నాఫ్ స‌త్య‌మూర్తి, ఓకే బంగారం సినిమాల త‌ర్వాత ఈ  అమ్మ‌డి జాడైనా క‌నిపించ‌లేదు. దాంతో నిత్యా అభిమానులంతా బెంగ  పెట్టుకున్నారు. ఎట్ట‌కేల‌కు బెంగ తీర్చేందుకు నిత్యా రెడీ అవుతోంది. అయితే ఈసారి నేరుగా తెలుగు సినిమాతో కాదు, ఓ అనువాద చిత్రంతో అభిమానుల ముందుకొస్తోంది.

ఒకే బంగారం వంటి క్లాసిక్ హిట్ లో త‌న‌కి జోడీగా న‌టించిన దుల్కార్ స‌ల్మాన్ ఈ చిత్రంలో హీరో. నిత్యా-దుల్కార్ కాంబినేష‌న్‌ లో మ‌రో స‌క్సెస్ ఫుల్ మూవీ ఇది. ఉస్తాద్ హోట‌ల్ పేరుతో గ‌తంలో మల‌యాళంలో రిలీజై ఘ‌న‌విజ‌యం సాధించింది. ఈ చిత్రంలో ఓ చిన్ని ప్రేమ‌క‌థ, మరో హోటల్‌ కథ.. మ‌ల్లూ బాబుల‌కు బాగా న‌చ్చింది. ఇప్పుడు ఈ సినిమా.. ''జ‌త‌గా'' పేరుతో తెలుగులో డ‌బ్బింగ్ అవుతోంది. కంటెంట్‌ ఏదైనా.. మ‌రోసారి నిత్యా అభిమానుల‌కు పండుగ వ‌చ్చిన‌ట్టే.

టాలీవుడ్‌ లో వ‌రుస‌గా విజ‌యాలు అందుకున్నా.. ఎందుక‌నో మ‌న ప‌రిశ్ర‌మ‌పై నిత్యా సీత క‌న్ను వేసింది. ఇక్క‌డ క‌మ‌ర్షియాలిటీ త‌న‌కి న‌చ్చ‌లేదో.. లేదా ఈ అమ్మ‌డు అంటే మ‌న ద‌ర్శ‌క‌నిర్మాత‌లేమైనా ముఖం చాటేస్తున్నారా? అన్న‌ది అర్థం కాని ప‌రిస్థితి. ఎలానూ త‌న సినిమా ప్ర‌మోష‌న్‌ కి హైద‌రాబాద్ వ‌చ్చిన‌ప్పుడు ఈ సంగ‌తి ఏంటో అడిగేయాలి.