జై బాలయ్య అంటూ రిలీజ్ డేట్

నందమూరి నటసింహం అభిమానిగా నేచురల్ స్టార్ నాని ఓ మూవీ చేస్తున్నాడు. హను రాఘవపూడి దర్శకత్వంలో తెరకెక్కుతున్న ఈ చిత్రానికి సంబంధించి బోలెడు అప్ డేట్స్ బయటకు రానున్నాయి. 2016 న్యూ ఇయర్ రోజున ఫస్ట్ లుక్ నుంచి అనేక సంగతులు వెల్లడించనున్నాడు నాని.

కొత్త ఏడాదిని వేడుకలా స్టార్ట్ చేయడానికి కారణం ఉంది. ఈ ఏడాది 2015 నాని కెరీర్ లో ది బెస్ట్ అనాల్సిందే. ఏళ్ల తరబడి ఎదురుచూసిన బ్రేక్.. నానికి ఈ సంవత్సరమే వచ్చింది. చాలాకాలంగా హిట్ లేక ఇబ్బందులు పడుతున్న నాని.. భలేభలే మగాడివోయ్ చిత్రంతో బ్లాక్ బస్టర్ కొట్టాడు. లో బడ్జెట్ మూవీగా వచ్చి, మీడియం బడ్జెట్ సినిమాల కంటే ఎక్కువ కలెక్షన్స్ సాధించి, తన స్థాయిని ఒకేసారి 4-5 రెట్లు పెంచుకోగలిగాడు. అందుకే 2015కి ఘనంగా వీడ్కోలు పలికి, 2016లోనూ అదే రేంజ్ కంటిన్యూ చేయడానికి నేచురల్ స్టార్ సిద్ధమవుతున్నాడు.

అందాల రాక్షసి తీసి ట్యాలెంటెడ్ డైరెక్టర్ అనిపించుకున్న హను రాఘవపూడి దర్శకత్వంలో.. బాలకృష్ణ అభిమానిగా, ఓ క్యూట్ లవ్ స్టోరీ చేస్తున్నాడు నాని. ఈ చిత్రం ఫస్ట్ లుక్ ని జనవరి 1న విడుదల చేసి, ఆడియో వేడుకను జనవరి 10న నిర్వహించనున్నారు. ఈ సినిమా ట్రైలర్ ను.. సంక్రాంతికి రిలీజ్ కానున్న భారీ చిత్రాలతో పాటు థియేటర్లలో ప్రదర్శించి.. మరింత హైప్ తెచ్చేందుకు ప్లాన్ చేశారు. కాగా.. తన లేటెస్ట్ మూవీ ఫిబ్రవరి 5న థియేటర్లలోకి తీసుకురావాలని నాని నిర్ణయించుకున్నాడు.