‘నక్షత్రం’ సంగతి ఎట్టకేలకు తేల్చేశారబ్బా

కృష్ణవంశీ అభిమానుల నిరీక్షణ ఫలించబోతోంది. వాయిదాల మీద వాయిదాలు పడ్డ ఈ విలక్షణ దర్శకుడి కొత్త సినిమా ‘నక్షత్రం’ ఈ నెలలోనే ప్రేక్షకుల ముందుకు రాబోతోంది. కొన్ని రోజులుగా ‘నక్షత్రం’ రిలీజ్ డేట్ విషయంలో నడుస్తున్న సస్పెన్సుకు ఎట్టకేలకు తెరపడింది. ఈ నెల 28న ‘నక్షత్రం’ను విడుదల చేస్తున్నట్లుగా ప్రకటించారు. రిలీజ్ డేట్ పోస్టర్ కూడా రిలీజ్ చేశారు.

ముందు 21నే ఈ చిత్రాన్ని రిలీజ్ చేయాలనుకున్నారు. ఐతే ‘నక్షత్రం’లో మెగాస్టార్ మేనల్లుడు సాయిధరమ్ తేజ్ కీలక పాత్ర పోషించిన నేపథ్యంలో.. 21న మరో మెగా హీరో వరుణ్ తేజ్ మూవీ ‘ఫిదా’కు పోటీ వెళ్లడం బాగోదని ఆ ఆలోచన మానుకున్నట్లున్నారు. 28న ‘గౌతమ్ నందా’.. ‘వీఐపీ-2’ ఆల్రెడీ షెడ్యూల్ అయి ఉన్నా సరే.. ‘నక్షత్రం’ను కూడా అదే రోజున రిలీజ్ చేయడానికి ఫిక్సయ్యారు.

వరుస డిజాస్టర్ల నుంచి బయటపడి.. ‘గోవిందుడు అందరివాడే’తో కాస్త నిలదొక్కుకున్న కృష్ణవంశీ.. ఎంతో కాన్ఫిడెంట్ గా ‘నక్షత్రం’ మొదలుపెట్టాడు. చకచకా షూటింగ్ చేశాడు. కానీ ఓ దశ దాటాక ఈ సినిమాకు బ్రేక్ పడింది. షూటింగ్ ఆగింది. చివరికి ఎలాగోలా సినిమాను పూర్తి చేసినా.. విడుదలకు మాత్రం నోచుకోలేదు. కొన్ని నెలల పాటు సినిమా వార్తల్లోనే లేదసలు.

చివరికి ఉన్నట్లుండి మేలో రిలీజ్ అంటూ ప్రకటన చేశారు. ఆ నెల దాటిపోయింది. తర్వాత జూన్ అన్నారు. అదీ పోయింది. చివరికి ఈ నెల ఆరంభంలో ఆడియో వేడుక చేశారు. సినిమాను ఎట్టకేలకు నెలాఖర్లో విడుదల చేయబోతున్నట్లు ప్రకటించారు. ఈ చిత్రంలో సందీప్ కిషన్.. రెజీనా.. సాయిదరమ్.. ప్రగ్యా జైశ్వాల్.. ప్రకాష్ రాజ్ కీలక పాత్రలు పోషించారు. కృష్ణవంశీ కెరీర్ కు అత్యంత కీలకంగా భావిస్తున్న ఈ చిత్రం ఆయనకు ఎలాంటి అనుభవాన్ని మిగులుస్తుందో చూడాలి.