ట్రైలర్ టాక్‌: అసత్యం చెప్పే 'లై'

ఒక సినిమాను హిట్ చేయాలంటే.. ఆ సినిమా టైటిల్ దగ్గర నుండి ప్రతీదీ ఆకట్టుకోవాలి. అలా ఆకట్టుకుంటేనే అప్పుడు ఓపెనింగ్స్ భారీగా ఉంటాయి. అదిగో అదే తరహాలో 'లై' అంటూ ఒక ఇంగ్లీషు టైటిల్ పెట్టి.. నితిన్ అండ్ కో.. కొత్తగా ప్రయత్నిస్తున్నారు. ఇప్పుడు ఈ సినిమా ధియేట్రికల్ ట్రైలర్ కూడా రిలీజ్ అయ్యింది. పదండి  ఎలా ఉందో చూద్దాం.

ఆ హీరో పేరు ఏ.సత్యం. ఇంగ్లీషులో రాస్తే వాడుకబాషలో అసత్యం. ఇక హీరో హీరోయిన్ కలసిన వెంటనే అబద్దాలు మాత్రమే మాట్లాడుకుంటారు. ఆ తరువాత వీళ్లిద్దరూ ప్రేమలో పడతారు. అబద్దాలు చెప్పినా నేను ప్రేమలో పడ్డా అని అమ్మాయి అంటే.. అసలు అబద్దాలకే అమ్మాయిలు పడేది అంటూ హీరో చెప్పడం. ఇంట్రెస్టింగ్ గా ఉంది. ఇక ఒక మాఫియా డాన్ కు సంబంధించి ఒక ప్యాకెట్ మిస్సయ్యింది. ఆ ప్యాకెట్ కోసం యుద్దం. ''బలహీనత లేని బలవంతుడిని భగవంతుడుని ఇప్పటివరకు సృష్టించలేదు'' అనే లైన్ తో నితిన్ ఈ మొత్తం యవ్వారంలోకి దూకేయడం. విలన్ గా అర్జున్ కూడా తన సత్తా చాటడం. ఇదే కథ. ట్రైలర్ ను చూస్తే ఇదే అర్ధమవుతోంది. మణిశర్మ మ్యూజిక్ యువరాజ్ ఫోటోగ్రాఫి ఈ సినిమాకు మెయిన్ హైలైట్స్. కొత్తగా ఒక లవ్ స్టోరీని చెబుతూ.. అందులో మాఫియా టచ్.. బాగానే ఇచ్చారు.

ఆగస్టు 11న 'లై' సినిమా విడుదలవ్వనున్న సంగతి తెలిసిందే. ఈ సినిమాతో నితిన్ ఒక భారీ హిట్టే కొట్టాల్సి ఉంది. ఎందుకంటే సినిమా ఆల్రెడీ 40 కోట్లు బడ్జెట్ ను టచ్ చేసిందనే టాక్ ఉంది కాబట్టి.. ఆ రేంజులో కొడితేనే బడ్జెట్ రికవరి అవుతుంది. కాకపోతే ఇప్పుడు టీజర్ అండ్ ట్రైలర్ చూశాక.. అలాంటి ఫీట్ చేయడం పెద్ద కష్టం కాదనే అనిపిస్తోంది.


Full View