'కొండ పొలం' సెన్సార్ పూర్తి..!

పంజా వైష్ణవ్‌ తేజ్‌ - రకుల్ ప్రీత్‌ సింగ్‌ జంటగా నటిస్తోన్న తాజా చిత్రం ''కొండ పొలం''. క్రిష్‌ జాగర్లమూడి దర్శకత్వంలో తెరకెక్కుతున్న ఈ చిత్రాన్ని రాజీవ్‌ రెడ్డి - జె. సాయి బాబు సంయుక్తంగా నిర్మిస్తున్నారు. ఇది అటవీ నేపథ్యంలో సాగే అడ్వెంచర్ మూవీ. అక్టోబరు 8న ఈ చిత్రాన్ని ప్రేక్షకుల ముందుకు తీసుసుకురానున్నారు. ఈ నేపథ్యంలో తాజాగా సినిమా సెన్సార్ కార్యక్రమాలు పూర్తయినట్లు మేకర్స్ ప్రకటించారు.

'కొండ పొలం' చిత్రానికి సెన్సార్ బోర్డ్ వారు క్లీన్ 'యూ' (U) సర్టిఫికేట్ జారీ చేసినట్లు దర్శకనిర్మాతలు వెల్లడించారు. ఈ సందర్భంగా ఓ ఆసక్తికరమైన పోస్టర్ ని వదిలారు. ఇందులో వైష్ణవ్ తేజ్ గొర్రెల కాపరి గెటప్ లో భుజం మీద కంబలి.. చేతిలో కర్ర పట్టుకుని నిలబడి ఉన్నాడు. బ్యాగ్రౌండ్ లో ఓ సింహం కనిపిస్తోంది. ఇప్పటి వరకు విడుదలైన పోస్టర్స్ - 'ఓబులమ్మ' 'శ్వాసలో' పాటలకు మంచి రెస్పాన్స్ వచ్చింది. ఇటీవల వచ్చిన థియేట్రికల్ ట్రైలర్ మిలియన్ల వ్యూస్ తో దూసుకుపోతోంది.

ట్రైలర్ ని బట్టి చూస్తే 'కొండ పొలం' లో ఇంటెన్స్ యాక్షన్ సీక్వెన్స్ లు కూడా ఉన్నట్లు తెలుస్తుంది. కానీ ఇప్పుడు ఈ చిత్రానికి 'యూ' సర్టిఫికెట్ రావడంతో, క్రిష్ ఇందులో యాక్టన్ ని కూడా చాలా జాగ్రత్తగా హ్యాండిల్ చేసినట్లు అర్థం అవుతోంది. సన్నపురెడ్డి వెంకట రామిరెడ్డి రాసిన 'కొండ పొలం' నవల ఆధారంగా ఈ సినిమాని తెరకెక్కిస్తున్నారు. బిబో శ్రీనివాస్ సమర్పిస్తున్న ఈ మూవీ ఫస్ట్ ఫ్రేమ్ ఎంటర్టైన్మెంట్స్ బ్యానర్ లో రూపొందుతోంది.

ఎంఎం కీరవాణి ఈ చిత్రానికి సంగీతం సమకూరుస్తున్నారు. జ్ఞాన శేఖర్ వీఎస్ సినిమాటోగ్రఫీ అందించగా.. రాజ్ కుమార్ గిబ్సన్ ఆర్ట్ డైరెక్టర్ గా వర్క్ చేశారు. శ్రవణ్ కటికనేని దీనికి ఎడిటింగ్ బాధ్యతలు నిర్వర్తిస్తున్నారు. ఈ చిత్రంలో సాయి చంద్ - కోట శ్రీనివాసరావు - నాజర్ - అన్నపూర్ణ - హేమ - ఆంథోనీ - రవి ప్రకాష్ - రచ్చ రవి - మహేష్ విట్టా - ఆనంద్ విహారి తదితరులు ఇతర పాత్రలు పోషించారు. 'ఉప్పెన' వంటి సూపర్ హిట్ తర్వాత వైష్ణవ్ తేజ్ నుంచి వస్తున్న ''కొండ పొలం'' సినిమా ఎలాంటి విజయాన్ని అందుకుంటుందో చూడాలి.