కిరణ్ అబ్బవరం.. ఈ జనరేషన్‌తో కొత్త భయం!
| నిజానికి కిరణ్ మాటల్లో రెండు తరాల మధ్య ఉన్న తేడా కనిపించింది. తన చిన్నతనంలో అవకాశాలు తక్కువైనా ఆడుకోవడానికి సమయం ఉండేది.
ఇప్పటి పిల్లలను చూస్తుంటే ఒకింత ఆశ్చర్యంగానే ఉంటుంది. చిన్న వయసులోనే పెద్దవాళ్ల మాదిరిగా మాట్లాడుతున్నారు. కెమెరాల ముందు ఏమాత్రం బెరుకు లేకుండా కనిపిస్తున్నారు. కానీ ఇదంతా చూస్తున్న కిరణ్ అబ్బవరంకు మాత్రం తన చిన్నతనం గుర్తొచ్చిందట. 'సమ్మర్ హాలిడేస్' ఈవెంట్‌లో పిల్లల గురించి మాట్లాడుతూ తన జీవితంలో మిస్సవుతున్న కొన్ని విషయాలను కూడా గుర్తుచేసుకున్నారు.
ముఖ్యంగా ఇప్పటి జనరేషన్ స్పీడ్ గురించి ఆయన చెప్పిన మాటలు ఆసక్తికరంగా ఉన్నాయి. పదేళ్ల వయసులోనే పిల్లలు మైకులు పట్టుకుని మాట్లాడుతుంటే భయమేస్తోందని కిరణ్ సరదాగా అన్నారు. తమ చిన్నతనంలో గోలీలాట, క్రికెట్, ఈత కొట్టడం తప్ప పెద్దగా ఏమీ తెలియదని చెప్పారు. ఇప్పుడు పిల్లలకు మాత్రం చిన్న వయసులోనే ఎన్నో విషయాలపై అవగాహన ఉంటోందని ఆశ్చర్యపోయారు. తనకు కొడుకు పుట్టిన తర్వాత ఇలాంటి విషయాలను మరింత దగ్గరగా ఆలోచిస్తున్నట్లు కూడా చెప్పారు.
అయితే పిల్లల గురించి మాట్లాడటం నుంచి కిరణ్ తన జీవితంలోని మరో విషయానికి వచ్చారు. సిటీల్లో ఇల్లు, స్థలం కొనాలనే పరుగులో అందరూ బిజీ అయిపోయారని అన్నారు. జీవితంలో కనీసం ఒక్క ఏడాదైనా వ్యవసాయం చేస్తే బాగుంటుందనేది తన అభిప్రాయమని చెప్పారు. డబ్బు ఎక్కువ రాకపోయినా మనసుకు ప్రశాంతత, జీవితంలో ఒక స్థిరత్వం దొరుకుతాయని భావిస్తున్నారట.
నిజానికి కిరణ్ మాటల్లో రెండు తరాల మధ్య ఉన్న తేడా కనిపించింది. తన చిన్నతనంలో అవకాశాలు తక్కువైనా ఆడుకోవడానికి సమయం ఉండేది. ఇప్పటి పిల్లలకు అవకాశాలు ఎక్కువ. చిన్న వయసులోనే సినిమాల్లో నటిస్తున్నారు. కానీ పెద్దవాళ్ల జీవితాల్లో మాత్రం పని, సంపాదన కోసం పరుగులు పెరిగిపోయాయి. ఈ రెండు విషయాలను కలిపి చూస్తే కిరణ్ ఎందుకు మళ్లీ పల్లెటూరి జీవితం గురించి మాట్లాడారో అర్థమవుతుంది.
మరోవైపు 'సమ్మర్ హాలిడేస్' సినిమాలోని పల్లెటూరి వాతావరణం కూడా కిరణ్‌ను ఆకట్టుకుంది. అమలాపురం, గోదావరి జిల్లాలంటే తనకు ప్రత్యేకమైన ఇష్టమని చెప్పారు. అవకాశం దొరికినప్పుడల్లా ఆ ప్రాంతాలకు వెళ్తుంటానన్నారు. అలాంటి ఊళ్లలో గడిపిన చిన్ననాటి జ్ఞాపకాలను ఈ సినిమా మళ్లీ గుర్తుచేస్తుందని ఆశిస్తున్నట్లు తెలిపారు.
ఇక చిన్న సినిమాల గురించి కూడా కిరణ్ మాట్లాడారు. కొత్తవాళ్లతో సినిమా తీసి ప్రేక్షకులను థియేటర్లకు రప్పించడం ఎంత కష్టమో తనకు తెలుసన్నారు. నిర్మాత ధీరజ్ మొగిలినేని ప్రమోషన్ల కోసం పడుతున్న కష్టాన్ని అభినందించారు. పిల్లలు ప్రధాన పాత్రల్లో నటించిన 'సమ్మర్ హాలిడేస్' నవంబర్ 6న విడుదల కానుంది.