తాప్సి సినిమా.. వంద కోట్లు.. 5 మిలియన్లు

గ్లామర్ క్యారెక్టర్లంటే అసలు తనకు ఇష్టమే లేదన్నట్లుగా కలరింగ్ ఇచ్చిన తాప్సి.. ఇప్పుడు ఆ మాటలన్నీ కట్టిపెట్టేసి బికినీ అందాలు.. లిప్ లాక్స్‌ తో రెచ్చిపోతూ ‘జుడ్వా-2’ సినిమా చేసిన సంగతి తెలిసిందే. ఇంతకుముందు సౌత్ సినిమాల్లో గ్లామర్ రోల్స్ గురించి తాప్సి చేసిన వ్యాఖ్యల్ని గుర్తు చేస్తూ తాప్సిని సోషల్ మీడియాలో జనాలు బాగానే ఆడుకున్నారులే ఈ సినిమా రిలీజ్ టైంలో. ఆ సంగతలా వదిలేస్తే ‘జుడ్వా-2’ ఈ ఏడాది బాలీవుడ్ బిగ్గెస్ట్ హిట్లలో ఒకటిగా నిలిచింది. స్లంప్ లో సాగుతున్న బాలీవుడ్ కు ఈ సినిమా అత్యావశ్యకమైన విజయాన్నందించింది.

సల్మాన్ ఖాన్.. షారుఖ్ ఖాన్ లాంటి బడా స్టార్ల సినిమాలు దారుణమైన ఫలితాన్నందుకోగా.. మరీ పెద్ద స్టార్ కాస్ట్ ఏమీ లేకున్నా ‘జుడ్వా-2’ వంద కోట్ల క్లబ్బులో అడుగుపెట్టడం విశేషం. ట్రేడ్ అనలిస్ట్ తరణ్ ఆదర్శ్ చెబుతున్న ప్రకారం ఈ సినిమా ప్రపంచవ్యాప్తంగా రూ.116 కోట్ల గ్రాస్ వసూలు చేయడం విశేషం. వరుణ్ ధావన్ కెరీర్లోనే ఇవే అత్యధిక వసూళ్లు. అతడి కెరీర్లో బిగ్గెస్ట్ హిట్టుగా నిలిచిన ‘బద్రీనాథ్ కి దుల్హానియా’ను ‘జుడ్వా-2’ దాటేసింది. ఈ చిత్రం అమెరికాలో ఏకంగా 5 మిలియన్ డాలర్ల కబ్బులో చేరడం విశేషం. వరుణ్ స్థాయికి అది చాలా పెద్ద ఘనతే. 90ల్లో ‘హలో బ్రదర్’కు రీమేక్ గా వచ్చిన ‘జుడ్వా’కు ఇది సీక్వెల్ కావడం విశేషం. వరుణ్ తండ్రి డేవిడ్ ధావన్ రూపొందించిన ఈ చిత్రంలో జాక్వెలిన్ ఫెర్నాండెజ్ మరో కథానాయికగా నటించింది.