అరుదైన బయోపిక్ లో దఢక్ బ్యూటీ

అతిలోకసుందరి దివంగత శ్రీదేవి వారసురాలి గా తెరంగేట్రం చేసిన జాన్వీ కపూర్ ఒక్కొక్క అడుగు ఆచితూచి వేస్తోంది. వెల్లువలా వస్తున్న ఆఫర్స్ ని ఎడాపెడా ఒప్పుకోకుండా చాలా సెలెక్టివ్ గా ఎంచుకుంటోంది. ప్రస్తుతం కరణ్ జోహార్ నిర్మిస్తున్న ఓ మల్టీ స్టారర్ తప్ప ఇంకో ప్రాజెక్ట్ ఏదీ సైన్ చేయని జాన్వీ ఓ బయోపిక్ కి ఓకే చెప్పిందని సమాచారం. మహిళా వైమానిక యోధురాలు గుంజన్ సక్సేనా కథ ఆధారంగా రూపొందబోయే మూవీలో ఆ పాత్ర జాన్వీ కే దక్కిందట.

ఇంత చిన్న వయసులోనే అంత ఛాలెంజింగ్ రోల్ దక్కించుకోవడం పట్ల జాన్వీ బాగా ఎగ్జైట్ అవుతోందట. 1999లో జరిగిన కార్గిల్ యుద్ధంలో గుంజన్ చేసిన సాహసాలు అప్పట్లో సంచలనమయ్యాయి. పత్రికల్లో చదివినప్పుడే రోమాలు నిక్కబొడుచుకునేలా ఉన్న తన వీర గాధ తెరమీద ఎలా ఉంటుందో ప్రత్యేకంగా చెప్పాలా. జాన్వీ ఈ పాత్ర కోసమే గుంజన్ సక్సేనాను కలిసి ఆవిడ అనుభవాలను ప్రత్యక్షంగా తెలుసుకుని మరీ వచ్చిందట. శౌర్య వీరచక్ర అవార్డు గ్రహీత అయిన ఆవిడ రోల్ పోషించడం అంటే ఆషామాషీ కాదు కాబట్టి జాన్వీ ఈ విషయంలో చాలా జాగ్రత్తలు తీసుకుంటోందట.

దర్శకుడు టీమ్ తదితర వివరాలు త్వరలోనే ప్రకటించనున్నారు. ఇంత రిస్కీ ప్రాజెక్ట్ ను మూడో సినిమాకే ఒప్పుకున్న జాన్వీని చూసి అభిమానులు తల్లి కి తగ్గ కూతురే అనుకుంటున్నారు. శ్రీదేవి తన కెరీర్ లో ఇలా ప్రత్యేకంగా ఒకరి బయోపిక్ లో ఎన్నడూ నటించలేదు. అలాంటిది జాన్వీ చేస్తోంది అంటే కపూర్ ఫ్యామిలీ కి సైతం ఇంత కంటే గుడ్ న్యూస్ ఏం కావాలి.