నాకు ఇంకో పేరు ఉంది అంటున్న జీవీ

రజినీకాంత్ నటించిన 'బాష' సినిమాలో ఒక డైలాగ్ ఉంది. "సార్ నా పేరు మాణిక్యం, నాకు ఇంకో పేరు ఉంది" అని అనగానే బాష బాష అని బ్యాక్ గ్రౌండ్ మ్యూజిక్ వినిపిస్తుంది. తాజాగా ఈ  యువ సంగీత దర్శకుడు జి.వి.ప్రకాష్ "నాకు ఇంకో పేరుంది" అనే టైటిల్ తో మన ముందుకు వస్తున్నాడు. "ఎనక్కు ఇన్నోరు పెర్ ఇరుక్కు" పేరుతో తమిళంలో తెరకెక్కిన ఈ చిత్రానికి సంబంధించిన ఫస్ట్ లుక్ ను ప్రముఖ దర్శకుడు ఎ.ఆర్.మురుగదాస్ తన ట్విట్టర్లో ఈనెల 20న సాయంత్రం 5గంటలకు పోస్ట్ చేయనున్నాడు.

తెలుగు లో సూపర్ హిట్ అయిన ‘ప్రేమ కథా చిత్రమ్’ను తమిళంలో రీమేక్ చేశాడు జీవీ. ఈ చిత్రానికి శ్యాం ఆంటోన్ దర్శకత్వం వహించారు. ఇప్పుడు ఇదే కాంబినేషన్ లో లైకా  ప్రొడక్షన్ సంస్థ ఈ చిత్రాన్ని నిర్మిస్తోంది. యాక్షన్ తో కూడిన ఈ ఒక కుటుంబ కథా చిత్రం.. ఇప్పటికే  45 శాతం చిత్రీకరణ పూర్తిచేసుకుంది. ఈ చిత్రం మొదటి ప్రచార చిత్రాన్ని ఏ‌ఆర్ మురుగుదాస్ తన ట్విటర్ ద్వారా సాయంత్రం 5 గంటలకు విడుదల చేయనుండటంతో సినీ ప్రేక్షకుల్లో ఎంతో ఆసక్తి నెలకొంది. ఇటీవలే ‘త్రిష లేదా నయనతార’ చిత్రంలో కలిసి నటించిన హీరోయిన్ ఆనంది ఇందులో కూడా నటిస్తోంది. ఈ చిత్రానికి జి.వి.ప్రకాష్ సంగీతం అందిస్తున్నారు. మరోవైపు ‘బ్రూస్ లీ’ అనే చిత్రంలోనూ జీవీ నటిస్తున్నాడు. ఓ వైపు సంగీత దర్శకుడిగా రాణిస్తూనే... ఇలా సినిమాల్లోనూ హీరోగా తన అదృష్టాన్ని పరీక్షించుకోబోతున్నాడు.