ఆ సినిమాతో అతని కెరీర్ మలుపు తిరుగుతుందా?

బడా స్టార్ సినిమాలకు టెక్నీషియన్లుగా పనిచేస్తే అప్పటివరకూ రాని పేరు, కీర్తి ఒకేసారి వచ్చిపడుతుంది. ముఖ్యంగా సంగీత విభాగంలో ఈ సందర్భాలు ఎక్కువగా కనిపిస్తాయి. టాలెంటడ్ మ్యూజిక్ డైరెక్టర్స్ కి మనకు కొదవలేదు. అయితే జక్కన్న కీరవాణిని పట్టుకున్నట్టు - సుకుమార్ - కొరటాలలు దేవికి ట్యూన్ అయినట్టు - శ్రీనువైట్ల థమన్ కి ఫిక్స్ అయినట్టు ప్రతీ పెద్ద డైరెక్టరూ తమకు ట్యూన్ అయిన మ్యూజిక్ డైరెక్టర్ నే పెట్టుకోవడంతో కొత్తవాళ్ళకు సరైన గుర్తింపు లేదనే విమర్శ కూడా వస్తుంది.

అయితే మహేష్ బాబు త్వరలో నటించబోయే సినిమాలో టాలీవుడ్ లో ఇప్పుడిప్పుడే నిలదొక్కుకుంటున్న టాలెంటెడ్ మ్యూజిక్ డైరెక్టర్ కి అవకాశం లభించినట్టు సమాచారం. ప్రస్తుతం మహేష్ - మురగదాస్ ల చిత్రానికి హారిస్ జయరాజ్ స్వరాలను సమకూరుస్తున్నాడు. సైనికుడు - ఆరెంజ్ ల తరువాత అతను చేస్తున్న డైరెక్ట్ తెలుగు సినిమా ఇది. ఆ తరువాత మహేష్ - కొరటాల మూవీకి ఎలానో దేవికి ఫిక్స్ అయ్యాడు.

ఇక మహేష్ కెరీర్ లో ల్యాండ్ మార్క్ ఫిలింకానున్న తన 25వ సినిమా పి.వి.పి బ్యానర్ లో వంశీ పైడిపల్లితో వుండనుంది. ప్రస్తుతం స్క్రిప్ట్ పనులు జరుగుతున్నాయి. ఈ సినిమాకు గోపీ సుందర్ మ్యూజిక్ డైరెక్టర్ గా పనిచేయనున్నట్టు సమాచారం. భలే భలే మగాడివోయ్, ఊపిరి చిత్రాలకు పనిచేసిన గోపీసుందర్ కి ఇదొక సువర్ణావకాశం. దీన్ని సరిగ్గా వినియోగించుకుంటే స్టార్ మ్యూజిక్ డైరెక్టర్ ల జాబితాలో నిలుస్తాడనడంలో సందేహం లేదు. 

Like Us on Facebook : https://www.facebook.com/Tupakidotcom/