ఎనర్జిటిక్ హీరోతో 'గజినీ' డైరెక్టర్..?

కోలీవుడ్ దర్శకుడు ఏ.ఆర్‌. మురగదాస్‌ కు టాలీవుడ్ లో కూడా మంచి క్రేజ్ ఉంది. 'గజిని' 'తుపాకి' '7త్ సెన్స్' 'సర్కార్' 'దర్బార్' వంటి డబ్బింగ్ సినిమాలతో తెలుగు ప్రేక్షకులను అలరించిన మురగదాస్‌.. 'స్టాలిన్' 'స్పైడర్' వంటి స్ట్రెయిట్ తెలుగు చిత్రాలు చేశారు. ఈ క్రమంలో టాలీవుడ్ 'ఉస్తాద్' రామ్‌ పోతినేని తో ఓ సినిమా చేయనున్నాడని కోలీవుడ్‌ వర్గాల్లో టాక్ వినిపిస్తోంది.

'ఇస్మార్ట్ శంకర్' సినిమాతో బ్లాక్ బస్టర్ హిట్ అందుకున్న ఎనర్జిటిక్ రామ్.. తన మార్కెట్ ని విస్తరించుకునే ప్రయత్నంలో ఉన్నారు. ఈ నేపథ్యంలోనే 'రెడ్' చిత్రాన్ని ఇతర భాషల్లో విడుదల చేశారు. తమిళ్ మీద పట్టున్న రామ్ ప్రస్తుతం కోలీవుడ్ డైరెక్టర్ లింగుస్వామితో చేస్తున్న చిత్రాన్ని కూడా మల్టీ లాంగ్వేజెస్ లో రూపొందిస్తున్నారు. ఈ క్రమంలో మురగదాస్ తో ఓ ప్రాజెక్ట్ గురించి చర్చలు జరుగుతున్నాయని టాక్ నడుస్తోంది.

ఇటీవలే రామ్‌ కు మురగదాస్ ఓ స్ర్కిప్ట్‌ వినిపించారని.. దీనికి హీరో సైడ్ నుంచి పాజిటివ్ సిగ్నల్ కూడా వచ్చిందని అనుకుంటున్నారు. ప్రాజెక్ట్ గురించి డిస్కషన్ పూర్తైన వెంటనే అధికారిక ప్రకటన వచ్చే అవకాశం ఉందని చెబుతున్నారు. ఇదే కనుక నిజమైతే ఇదొక క్రేజీ కాంబినేషన్ అవుతుంది. అంతేకాదు తెలుగు తమిళ భాషల్లో బైలింగ్వల్ గా రూపొందిస్తారు.

ఇకపోతే లింగుస్వామి దర్శకత్వంలో రామ్ నటిస్తున్న సినిమా ఓ మాస్ ఎంటర్‌టైనర్‌ అని తెలుస్తోంది. ఈ ద్విభాషా చిత్రంలో 'ఉప్పెన' ఫేమ్ కృతి శెట్టి హీరోయిన్‌ గా నటిస్తోంది. రాక్‌ స్టార్ దేవిశ్రీప్రసాద్ సంగీతం అందిస్తున్నాడు. పవన్ కుమార్ సమర్పణలో శ్రీనివాస సిల్వర్ స్క్రీన్ పతాకంపై శ్రీనివాస్ చిట్టూరి ఈ చిత్రాన్ని నిర్మిస్తున్నారు. కరోనా పరిస్థితులు చక్కబడిన వెంటనే ఈ సినిమా సెట్స్ పైకి వెళ్ళనుంది.