మాస్ రాజా సినిమా అదే అని తేలిపోయింది

మాస్ రాజా రవితేజ కొత్త సినిమాకు రంగం సిద్ధమవుతోంది. ‘రంగస్థలం’ భారీ విజయంతో ఊపుమీదున్న ‘మైత్రీ మూవీ మేకర్స్’ సంస్థ మాస్ రాజాతో ఒకటికి రెండు సినిమాలు చేస్తుండటం విశేషం. ఆల్రెడీ ఆ సంస్థలో శ్రీను వైట్ల దర్శకత్వంలో ఓ సినిమా మొదలుపెట్టాడు రవితేజ. ఇప్పుడు ఇదే సంస్థలో సంతోష్ శ్రీనివాస్ దర్శకుడిగా ఓ సినిమా మొదలు కాబోతోంది. ఈ చిత్రానికి కాస్టింగ్ కాల్ ఇచ్చారు. 6-7 ఏళ్ల మధ్య వయసున్న చిన్న పాప పాత్రకు తగ్గ నటి కావాలని పిలుపు ఇచ్చారు. ఈ అప్పీల్‌ ను బట్టే ఈ చిత్రం ముందు నుంచి ప్రచారం జరుగుతున్నట్లే తమిళ హిట్ మూవీ ‘తెరి’కి రీమేక్ అని స్పష్టం అయిపోయింది. విజయ్ హీరోగా నటించిన ఈ చిత్రంలో అతడి కూతురిగా మీనా కుమార్తె నటించడం విశేషం. ఆ సినిమాకు ఆ పాప ప్రత్యేక ఆకర్షణడగా నిలిచింది. మరి తెలుగులో నటించబోయే కొత్తమ్మాయి ఎలా చేస్తుందో చూడాలి.

తమిళంలో బ్లాక్ బస్టర్ అయిన ‘తెరి’ సినిమా తెలుగులోకి ‘పోలీస్’ పేరుతో అనువాదమైంది. ఈ చిత్రాన్ని అగ్ర నిర్మాత దిల్ రాజు పెద్ద ఎత్తునే రిలీజ్ చేశాడు. కానీ అది పెద్దగా ఆడలేదు. అలాంటి సినిమాను మళ్లీ తెలుగులో రీమేక్ చేయడమేంటో? అసలు అది కొత్త సినిమా కూడా కాదు. చాలా సినిమాల కలబోతగా ఉంటుంది. నిజానికి ఈ చిత్రాన్ని పవన్ కళ్యాణ్ హీరోగా తీయాలనుకున్నారు. కానీ ఆయన అందుబాటులో లేకుండా పోవడంతో మాస్ రాజాతో కానిచ్చేస్తున్నారు. ఎంత మార్పులు చేర్పులు చేసినా మూల కథ అదే ఉంటుంది కాబట్టి తెలుగులో ఈ చిత్రం ఎలా తయారవుతుందో చూడాలి. తమిళంలో విజయ్ సరసన సమంత కథానాయికగా నటించిందీ చిత్రంలో. తెలుగులో ఆ పాత్రకు ఇంకా హీరోయిన్ని ఫైనలైజ్ చేయలేదు. త్వరలోనే షూటింగ్ మొదలుపెట్టి వచ్చే ఏడాది వేసవికి ఈ చిత్రాన్ని ప్రేక్షకుల ముందుకు తేవాలనుకుంటున్నారు.