మన ఉమామహేశ్వరకు బాలీవుడ్‌ పిలుపు

ట్యాలెంటెడ్‌ హీరో కమ్‌ యాక్టర్ సత్యదేవ్‌ వరుస చిత్రాలతో గత ఏడాది ప్రేక్షకుల ముందుకు వచ్చాడు. లాక్ డౌన్ టైమ్‌ లో అత్యధిక సినిమాలను విడుదల చేసిన హీరోగా రికార్డును దక్కించుకున్న సత్యదేవ్‌ ప్రస్తుతం పలు సినిమాల్లో నటిస్తున్నాడు. ఆయన నటిస్తున్న సినిమాలు ఒకొక్కటి చొప్పున ప్రేక్షకుల ముందుకు వచ్చేందుకు సిద్దం అవుతున్నాయి. ఈ సమయంలోనే ఈ ట్యాలెంటెడ్‌ యాక్టర్‌ కు బాలీవుడ్‌ నుండి పిలుపు వచ్చింది. బాలీవుడ్ సూపర్‌ స్టార్‌ అక్షయ్‌ కుమార్‌ నటిస్తున్న ప్రతిష్టాత్మక మూవీ రామ్‌ సేతు లో సత్యదేవ్‌ కు ఆఫర్‌ దక్కింది.

ప్రభాస్ హీరోగా రూపొందుతున్న ఆదిపురుష్‌ సినిమాకు గట్టి పోటీ అన్నట్లుగా రామాయణ ఇతివృత్తం నేపథ్యంలో రూపొందుతున్న రామ్‌ సేతు సినిమా చిత్రీకరణ ఇప్పటికే ప్రారంభం అయ్యింది. ఈ భారీ బడ్జెట్‌ పాన్‌ ఇండియా సినిమా లో అక్షయ్ కుమార్ తో పాటు బాలీవుడ్ కు చెందిన పలువురు ప్రముఖ నటీనటులు కనిపించబోతున్నారు. ఇదే సమయంలో ఈ సినిమాను సౌత్ లో కూడా విడుదల చేయాలని భావిస్తున్నారు కనుక సౌత్‌ స్టార్స్ ను కూడా పార్ట్‌ చేస్తున్నారు.

తెలుగుతో పాటు తమిళ ప్రేక్షకుల్లో కూడా సత్యదేవ్‌ కు గుర్తింపు ఉంది. కనుక సత్యదేవ్‌ ను రామ్‌ సేతు సినిమా లో పార్ట్‌ చేయబోతున్నట్లుగా సమాచారం అందుతోంది. పలు సినిమాలతో బిజీగా ఉన్నా కూడా బాలీవుడ్‌ నుండి వచ్చిన బంపర్ ఆఫర్‌ అవ్వడంతో మన ఉమామహేశ్వర వెంటనే ఓకే చెప్పేశాడు. ఇటీవల మన స్టార్స్ పలువురు పాన్‌ ఇండియా స్టార్స్ గా గుర్తింపు దక్కించుకుంటున్నారు. సత్యదేవ్‌ కూడా రామ్ సేతు తో పాన్ ఇండియా స్టార్‌ గా మారిపోతాడేమో చూడాలి.