ఎఎంబీ సినిమాస్ అద్భుతం అంటున్న తమిళ దర్శకుడు

ఒక సినిమా ఎంత గొప్పగా ఉన్నాసరే ప్రేక్షకులు కనుక ఆ సినిమాను సరైన థియేటర్లో చూడకపోతే ఆ ఫీల్ రాదు.  అందుకే ఈమధ్య కాలంలో మారుతున్న ప్రేక్షకుల అభిరుచులకు అనుగుణంగా బెస్ట్ వ్యూయింగ్ ఎక్స్ పీరియన్స్ కోసం మల్టి ప్లెక్స్ ల సంఖ్య పెరుగుతోంది.  అదేకోవలో ఏషియన్ సునీల్.. మహేష్ బాబు భాగస్వామ్యంలో ఎఎంబీ సినిమాస్ మల్టిప్లెక్స్ ను హైదరాబాద్ గచ్చిబౌలిలో కొంతకాలం క్రితం ప్రారంభించారు.  

రేట్లు ఎక్కువ అనే విషయం పక్కన పెట్టేస్తే.. ఈ మల్టిప్లెక్స్ లో సినిమాను(అఫ్ కోర్స్.. మంచి సినిమాను!) చూసినవారు ముక్తకంఠంతో చెప్పే విషయం ఏంటంటే ఇదో బెస్ట్ ఎక్స్ పీరియన్స్ అని.  సౌండ్ అండ్ ప్రొజెక్షన్ సిస్టమ్ టాప్ క్లాస్ గా ఉంటుందని ఇప్పటికే చాలామంది చెప్పారు. తాజాగా ఈ లిస్టులో తమిళ దర్శకుడు అశ్విన్ శరవణన్ జాయిన్ అయ్యాడు.  గతంలో నయనతారతో 'మాయ' సినిమాను రూపొందించిన ఈ దర్శకుడు రీసెంట్ గా తాప్సీ పన్ను లీడ్ రోల్ లో 'గేమ్ ఓవర్'అనే చిత్రాన్ని తెరకెక్కించాడు.  ఈమధ్యే విడుదలైన ఈ సినిమాకు విమర్శకుల ప్రశంసలు లభించాయి.  

తాజాగా 'గేమ్ ఓవర్' ను ఎఎంబీ సినిమాస్ లో వీక్షించిన అశ్విన్ తన ట్విట్టర్ ఖాతా ద్వారా  "గేమ్ ఓవర్ @ఎఎంబీ సినిమాస్ హైదరాబాద్. ఇదో అద్భుతమైన ఆడియో/విజువల్ ఎక్స్ పీరియన్స్.  ప్రతి ఒక్క సినీ అభిమానికి ఇదో స్వర్గం. మూవీ వీకెండ్ కోసం హాయిగా ఎదురు చూడవచ్చు" అంటూ ట్వీట్ చేస్తూ  'గేమ్ ఓవర్'.. 'కబీర్ సింగ్' పోస్టర్లున్న ఒక ఫోటోను షేర్ చేశారు.