అర్జున్ రెడ్డిని బన్నీ భలే పొగిడేశాడే..

గత ఏడాది ‘బాహుబలి: ది కంక్లూజన్’ తర్వాత తెలుగు సినిమాల్లో అత్యధిక చర్చ జరిగింది ‘అర్జున్ రెడ్డి’ గురించే. ఈ చిత్రంపై ప్రశంసలు ఏ స్థాయిలో కురిశాయో.. దానిపై విమర్శలూ అదే స్థాయిలో చెలరేగాయి. దీనిపై ఎన్నెన్ని కాంట్రవర్శీలు నడిచాయో. వాటి సంగతి ఎలా ఉన్నా ఇది టాలీవుడ్లోనే కాక వేరే ఇండస్ట్రీల్లోనూ హాట్ టాపిక్ అయింది. ఫిలిం మేకింగ్ విషయంలో ఇది నూతన ఒరవడికి శ్రీకారం చుట్టింది. ఎందరినో ఇన్ స్పైర్ చేసింది. తెలుగు సినిమాను ఒక కొత్త దారి వైపు నడిపించింది. ఈ చిత్రాన్ని ఎంతో మంది సినీ ప్రముఖులు ఇష్టపడ్డారు. దాని గురించి గొప్పగా మాట్లాడారు. ఈ జాబితాలోకి తాజాగా అల్లు అర్జున్ కూడా చేరాడు. ఈ మధ్య కాలంలో తనకు అత్యంత నచ్చిన సినిమా ‘అర్జున్ రెడ్డి’నే అంటూ దాని గురించి ఒక ఇంటర్వ్యూలో చాలా గొప్పగా మాట్లాడాడు బన్నీ.

‘‘ఓ సినిమా చూస్తే నేను చాలా ప్రభావితం అవుతుంటాను. మనసుకు నచ్చిందంటే అది చాలా రోజులు నన్ను వదిలిపోదు. ఈ మధ్య నాకు బాగా నచ్చిన సినిమా ‘అర్జున్ రెడ్డి’. ఈ సినిమా పేరు చెప్పగానే చాలామందికి డ్రగ్స్.. సెక్స్.. ఇవే గుర్తుకొస్తాయి. నేను వాటిని పెద్దగా పట్టించుకోలేదు. ఈ చిత్రంలో నటీ నటుల ప్రతిభ.. దర్శకుడు కథను నడిపించిన విధానం.. డైలాగులు చెప్పిన పద్ధతి.. ఆ షాట్ డివిజన్.. ఇవన్నీ చాలా చాలా నచ్చాయి. వారం రోజుల పాటు ఆ సినిమా నా మైండ్లో తిరుగుతూనే ఉంది’’ అని బన్నీ చెప్పాడు. అల్లు అర్జున్ స్థాయి హీరోకు ఈ చిత్రం ఇంత బాగా నచ్చడం ఆసక్తి రేకెత్తించే విషయమే. ఐతే సినిమా చూసిన వాడు సోషల్ మీడియాలో దీని గురించి ఎప్పుడూ.. ఎక్కడా స్పందించలేదు. మహేష్ బాబు సైతం ఈ సినిమా మెచ్చి.. ఈ చిత్ర దర్శకుడు సందీప్ రెడ్డిని పిలిపించుకుని మాట్లాడిన సంగతి తెలిసిందే.