అనిల్ రావిపూడి నెక్స్ట్ టార్గెట్.. 'సంక్రాంతికి మళ్ళీ వస్తున్నాం'

టాలీవుడ్‌లో సక్సెస్ ఫుల్ డైరెక్టర్ అనగానే అందరికీ గుర్తొచ్చే పేరు అనిల్ రావిపూడి. తనదైన కామెడీ టైమింగ్‌తో బాక్సాఫీస్ వద్ద మినిమం గ్యారంటీ సినిమాలను అందిస్తూ, హిట్ మెషిన్‌గా పేరు తెచ్చుకున్నారు. ముఖ్యంగా సంక్రాంతి సీజన్ అనిల్ రావిపూడికి చాలా బాగా కలిసి వస్తుంది. ఆయన సినిమాల్లో ఉండే వినోదం పండగ పూట ఫ్యామిలీ ఆడియన్స్‌ను థియేటర్లకు రప్పించడంలో ఎప్పుడూ ఫెయిల్ అవ్వలేదు.

ప్రస్తుతం అనిల్ రావిపూడి మెగాస్టార్ చిరంజీవితో చేసిన 'మన శంకర వరప్రసాద్ గారు' సినిమాతో బాక్సాఫీస్ వద్ద తన సత్తా ఏంటో మరోసారి నిరూపించుకున్నారు. కేవలం ఆరు రోజుల్లోనే ప్రపంచవ్యాప్తంగా 261 కోట్ల గ్రాస్ వసూలు చేసి, ఈ సంక్రాంతికి అసలైన విన్నర్‌గా నిలిచారు. మెగాస్టార్‌ను వింటేజ్ లుక్‌లో చూపిస్తూనే, తన మార్క్ కామెడీని జోడించి అనిల్ చేసిన మ్యాజిక్ ఇండస్ట్రీ వర్గాలను ఆశ్చర్యపరుస్తోంది.

ఇక ఇప్పుడు ఫిల్మ్ నగర్ సర్కిల్స్‌లో అనిల్ రావిపూడి తదుపరి ప్రాజెక్ట్ గురించి ఒక క్రేజీ బజ్ నడుస్తోంది. అదే 'సంక్రాంతికి మళ్ళీ వస్తున్నాం'. అవును, అనిల్ రావిపూడి తన నెక్స్ట్ సినిమాను కూడా సంక్రాంతి టార్గెట్‌గానే ప్లాన్ చేస్తున్నట్లు వార్తలు వినిపిస్తున్నాయి. ఇప్పటికే వెంకటేష్‌తో 'సంక్రాంతికి వస్తున్నాం' అనే సినిమాతో హిట్ కొట్టిన అనిల్, ఇప్పుడు దానికి సీక్వెల్‌లాగానో లేక అదే థీమ్‌తో కొత్త కథను సిద్ధం చేస్తున్నట్లు టాక్.

నిజానికి అనిల్ రావిపూడి సినిమాలకు సంక్రాంతి ఒక సెంటిమెంట్‌గా మారిపోయింది. అందుకే ఆయన తన తదుపరి చిత్రాన్ని 2027 సంక్రాంతికి విడుదల చేయాలని ఇప్పటి నుండే గ్రౌండ్ వర్క్ మొదలుపెట్టారట. ఫిబ్రవరి మొదటి వారంలో ఈ సినిమాకు సంబంధించిన పూర్తి వివరాలు వెల్లడియ్యే అవకాశం ఉంది. ఒకవేళ ఇదే నిజమైతే, వరుసగా మూడో ఏడాది కూడా అనిల్ రావిపూడి బాక్సాఫీస్ వద్ద తన మార్క్ పండగను సెలబ్రేట్ చేసుకోవడానికి సిద్ధమవుతున్నారని చెప్పవచ్చు.

ఈ కొత్త ప్రాజెక్ట్‌లో హీరోగా ఎవరు ఉంటారనేది ఇంకా సస్పెన్స్‌గానే ఉంది. అనిల్ రావిపూడికి వెంకటేష్‌తో ఉన్న బాండింగ్ అందరికీ తెలిసిందే, వీరిద్దరి కాంబోలో వచ్చే సినిమాలకు ఫ్యామిలీ ఆడియన్స్‌లో మంచి క్రేజ్ ఉంటుంది. అయితే ఈసారి మరికొందరు స్టార్ హీరోల పేర్లు కూడా వినిపిస్తున్నాయి. ఏదేమైనా, అనిల్ రావిపూడి మార్క్ ఎంటర్టైన్మెంట్ పక్కాగా ఉంటే హీరో ఎవరైనా సరే బాక్సాఫీస్ వద్ద కాసుల వర్షం కురవడం ఖాయం.

ఏదేమైనా 'సంక్రాంతికి మళ్ళీ వస్తున్నాం' అనే టైటిల్ వినడానికి చాలా క్యాచీగా ఉండటమే కాకుండా, అనిల్ రావిపూడి కాన్ఫిడెన్స్‌ను చూపిస్తోంది. పండగ సినిమాలంటే మాస్ ఎలిమెంట్స్‌తో పాటు కామెడీ కూడా ఉండాలనుకునే ప్రేక్షకులకు అనిల్ సినిమాలే బెస్ట్ ఛాయిస్. మరి 2027 సంక్రాంతికి అనిల్ రావిపూడి మళ్ళీ ఎలాంటి సెన్సేషన్ క్రియేట్ చేస్తారో తెలియాలంటే మరికొంత కాలం వేచి చూడాలి.