మ‌గ‌బిడ్డ‌కు జ‌న్మ‌నిచ్చిన అమ‌లాపాల్

సౌత్ అగ్ర క‌థానాయిక అమ‌లాపాల్ కోచ్ఛికి చెందిన‌ వ్యాపార‌వేత్త జ‌గ‌త్ దేశాయ్ ని పెళ్లాడిన సంగ‌తి తెలిసిందే. పెళ్లయిన 8 నెలల తర్వాత సుపుత్రుని స్వాగతించారు అమలా పాల్. కొడుకు పేరు `ఇళై`. జూన్ 17న ఈ జంట తమ అధికారిక ఇన్‌స్టాగ్రామ్ లో తమ అభిమానులు అనుచరులతో ఈ సంతోషకరమైన వార్తను షేర్ చేసారు. అమల తన చేతుల్లో బిడ్డతో ఆసుపత్రి నుండి ఇంటికి తిరిగి వస్తున్న వీడియోను కూడా వారు షేర్ చేసారు. జూన్ 11న పాప పుట్టిందని.. అతనికి ఇళై అని పేరు పెట్టారని అమల- జగత్ జంట‌ వెల్లడించారు. ఒక వెబ్‌సైట్ క‌థ‌నం ప్రకారం.. ఇలై అంటే `ఉల్లాసమైన నవ్వుతో ప్రకాశించే ఆత్మ`. ఉన్నతమైనది లేదా దేవుని వంటిది అనే అర్థం కూడా ఉంది.

11.06.2024న జన్మించిన మా చిన్న అద్భుతం.. ILAIని కలవండి అని వారు తమ పోస్ట్‌కు శీర్షిక పెట్టారు. ఈ జంట వీడియోను షేర్ చేసిన వెంటనే పలువురు ప్రముఖులు, అభిమానులు వ్యాఖ్యల విభాగంలో అభినందనలు తెలిపారు. జగత్ దేశాయ్‌తో అమలా పాల్ సాంప్రదాయ బేబీ షవర్ నుండి ఫోటోలు జ‌న‌వ‌రిలో విడుద‌ల‌య్యాయి. సూర‌త్ లో ఈ వేడుక జ‌రిగింది. జ‌న‌వ‌రిలోనే అమల-జగత్ తమ మొదటి బిడ్డ కోసం ఎదురుచూస్తున్నట్లు ప్రకటించారు. అమ‌లా గర్భధారణ ఫోటోషూట్ ని షేర్ చేసారు. ఈ జంట 2023 నవంబర్‌లో కేరళలోని కొచ్చిలో వివాహం చేసుకున్నారు.

అమల గతంలో దర్శకుడు ఏఎల్ విజయ్‌ని వివాహం చేసుకున్నారు. వారు 2014లో వివాహం చేసుకున్నారు. అయితే విభేధాల‌తో 2016లో విడిపోయారు. ఫిబ్రవరి 2017లో విడాకులు తీసుకున్నారు.

కెరీర్ మ్యాట‌ర్ కి వ‌స్తే... అమలాపాల్ మలయాళ చిత్రం `నీలతామర`లో తొలిసారిగా నటించింది. చివరిగా బాలీవుడ్ చిత్రం `భోళా`లో అజయ్ దేవగన్‌తో.. మలయాళంలో పృథ్వీరాజ్ సుకుమారన్‌తో కలిసి `ఆడుజీవితం: ది గోట్ లైఫ్`లో కనిపించింది. ఆ తర్వాత `లెవల్ క్రాస్`, `ద్విజ` వంటి చిత్రాల్లో నటిస్తోంది.