ఐపీఎల్ కామెంట్రీ నుంచి ఔట్.. సొంత దుకాణం పెట్టుకున్న ఇర్ఫాన్ పఠాన్

టీమిండియా మాజీ ఆల్‌రౌండర్ ఇర్ఫాన్ పఠాన్‌కు ఐపీఎల్ కామెంట్రీ ప్యానెల్ నుంచి ఉద్వాసన పలికినట్లు సమాచారం. కామెంట్రీ సమయంలో ఆయన కావాలనే కొంతమంది ఆటగాళ్లపై వ్యాఖ్యలు చేస్తున్నారని ఫిర్యాదులు రావడంతో బీసీసీఐ ఈ నిర్ణయం తీసుకున్నట్లు తెలుస్తోంది. ఈ మేరకు ఆంగ్ల మీడియాలో కథనాలు వెలువడుతున్నాయి.

నేటి నుంచి ఐపీఎల్ 18వ సీజన్ ప్రారంభం కానుండగా, శుక్రవారం విడుదల చేసిన అధికారిక కామెంట్రీ ప్యానెల్‌లో ఇర్ఫాన్ పఠాన్ పేరు లేకపోవడం గమనార్హం. గతంలో పలు ఐపీఎల్ సీజన్లలో కామెంటేటర్‌గా వ్యవహరించిన ఆయనపై వచ్చిన ఫిర్యాదుల కారణంగానే ఈసారి ప్యానెల్‌లో చోటు దక్కలేదని తెలుస్తోంది. "గత రెండేళ్లుగా అతడు కొంతమంది ఆటగాళ్లపై వ్యక్తిగత ఎజెండాతో వ్యాఖ్యలు చేస్తున్నాడు. ఆ వైఖరి సరైనది కాదు. అతడి తీరుపై కొంతమంది భారత క్రికెటర్ల నుంచి ఫిర్యాదులు కూడా అందాయి" అని ఐపీఎల్ విశ్వసనీయ వర్గాలు తెలిపినట్లు ఆ కథనాలు పేర్కొంటున్నాయి. ఆస్ట్రేలియాలో జరిగిన బోర్డర్-గవాస్కర్ ట్రోఫీ సిరీస్ సమయంలోనూ కొందరు ఆటగాళ్లపై పఠాన్ చేసిన వ్యాఖ్యలు వివాదాస్పదమయ్యాయి. దీంతో ఓ ఆటగాడు ఏకంగా పఠాన్ నంబర్‌ను తన ఫోన్‌లో బ్లాక్ చేసినట్లు సమాచారం.

కాగా, కామెంట్రీ ప్యానెల్ నుంచి తొలగించిన వెంటనే ఇర్ఫాన్ పఠాన్ యూట్యూబ్ ఛానల్‌ను ప్రారంభించడం విశేషం. ఈ విషయాన్ని ఆయన 'ఎక్స్' (ట్విట్టర్) వేదికగా పంచుకున్నారు. "మైక్ ఆన్.. ఫిల్టర్ ఆఫ్. ఇర్ఫాన్‌తో నేరుగా మాట్లాడుకుందాం. వాస్తవాలే మాట్లాడుకుందాం" అంటూ ఆయన చేసిన పోస్ట్ పలు అనుమానాలకు తావిస్తోంది.

గతంలో కూడా బీసీసీఐ సంజయ్ మంజ్రేకర్, హర్ష భోగ్లే వంటి ప్రముఖ కామెంటేటర్లపై ఇదే తరహా చర్యలు తీసుకుంది. 2019లో సంజయ్ మంజ్రేకర్ టీమిండియా ఆటగాళ్లపై తీవ్ర వ్యాఖ్యలు చేయడంతో పాటు తోటి కామెంటేటర్ హర్ష భోగ్లేతో వివాదానికి దిగాడు. ఈ పరిణామాల నేపథ్యంలో 2020లో దక్షిణాఫ్రికాతో జరిగిన వన్డే సిరీస్‌కు మంజ్రేకర్‌ను కామెంట్రీ ప్యానెల్ నుంచి తప్పించారు. అలాగే, 2016 ఐపీఎల్ సీజన్‌కు ముందు హర్ష భోగ్లేపైనా వేటు పడింది.

మొత్తానికి, ఇర్ఫాన్ పఠాన్‌పై వచ్చిన ఫిర్యాదులు నిజమైతే, బీసీసీఐ తీసుకున్న ఈ నిర్ణయం సరైనదేనని చెప్పవచ్చు. అయితే, ఈ విషయంపై బీసీసీఐ అధికారికంగా స్పందించాల్సి ఉంది.