అణ్వాయుధ నిషేధానికి 50 దేశాల ఆమోదం

ప్రపంచ శాంతి కోసం అణ్వాయుధాలను అగ్రదేశాలు వదులుకోవాలని పౌరహక్కుల సమాజం, ఐరాస, హక్కుల నేతలు ఉద్యమిస్తున్నారు. ఇప్పుడు వారి ఆకాంక్షలు నెరవేరే రోజు రానే వచ్చింది. ఐరాసలోని 50 సభ్యదేశాలు నిషేధిత ఒప్పందంపై సంతకాలు చేశాయి. దీంతో ఈ 50 దేశాలు ఇక అణ్వాయుధాలను నిషేధించినట్టే. ఇదొక గొప్ప పరిణామంగా చెప్పవచ్చు.

అణ్వాయుధాల నిషేధిత ఒప్పందానికి ఇప్పటివరకు 50 దేశాలు ఆమోదం తెలిపినట్టు ఐక్యరాజ్యసమితి ప్రకటించింది. దీంతో వచ్చే మూడు నెలల్లోనే ఈ ఒప్పందం అమలులోకి రానుంది. ఈ అంతర్జాతీయ ఒప్పందానికి 50 దేశాలు ముందుకు రావడం చారిత్రక మైలురాయిగా ఐరాస అభివర్ణించింది.

ఈ సందర్భంగా ఐరాస సెక్రటరీ జనరల్ ఆంటోనియా గుటెర్రస్ మాట్లాడుతూ..  దీనివల్ల ప్రపంచాన్ని మేల్కొలపడం మరింత సులభమవుతుందని ఆయన అభిప్రాయపడ్డారు. 2021 జనవరి 22 నుంచి ఈ అణ్వాయుధ నిషేధం అమలులోకి వస్తుంది.

అయితే అమెరికాతోపాటు అణ్వాయుధాలు కలిగిన శక్తిమంతమైన దేశాలు ఈ ఒప్పందాన్ని తీవ్రంగా వ్యతిరేకిస్తున్నాయి. బ్రిటన్, చైనా, ఫ్రాన్స్, రష్యాలు కూడా ఈ ఒప్పందంపై సంతకం చేయలేదు. ఈ ఒప్పందాన్ని రద్దు చేయాలని అమెరికా పట్టుబడుతోంది.