థియేటర్లకు పిల్లలు ఆ సమయాల్లో వద్దు.. హైకోర్టు కీలక సూచనలు!

ఇటీవల జరిగిన పలు సంఘటనల నేపథ్యంలో... బెనిఫిట్ షోలు, టిక్కెట్ ధరల పెంపు, అర్ధరాత్రుల్లోనూ ప్రత్యేక షోలు, మొదలైన విషయాలపై తీవ్ర చర్చ నడుస్తున్న సంగతి తెలిసిందే. ఈ నేపథ్యంలో ఈ విషయాలపై హైకోర్టులో పిటిషన్లు దాఖలయ్యాయి. ఈ పిటిషన్ల విచారణ సందర్భంగా థియేటర్లకు పిల్లలు వెళ్లే సమయంపై హైకోర్టు కీలక వ్యాఖ్యలు చేసింది.

అవును... ఇటీవల కాలంలో సినిమాల స్పెషల్ షోలు, ప్రధానంగా సామాన్యుడికి మోయలేని భారంగా అన్నట్లుగా మారిన టిక్కెట్ ధరల పెంపు అంశాలు, వాటిలో కొన్ని సినిమాలకు మాత్రమే టిక్కెట్ ధరలు పెంచుకోవడానికి అనుమతులు ఇవ్వడాలు మొదలైన అంశాలపై అటు ఇండస్ట్రీలోను, ఇటు బయటా చర్చ జరుగుతుందనే కామెంట్లు వినిపిస్తున్న సంగతి తెలిసిందే.

ఈ నేపథ్యంలో.. సినిమా టిక్కెట్ ధరల పెంపు, స్పెషల్ షోలకు పర్మిషన్స్ వ్యవహారంపై దాఖలైన పిటిషన్లపై తెలంగాణ హైకోర్టులో విచారణ సందర్భంగా.. జస్టిస్ బి విజయ్ సేన్ రెడ్డి ధర్మాసనం కీలక వ్యాఖ్యలు చేసింది. ఇందులో భాగంగా.. 16 ఏళ్ల లోపు పిల్లలు సినిమా థియేటర్స్ కు వెళ్లే వేళలపై అన్ని వర్గాలతో చర్చించి నిర్ణయం తీసుకోవాలని సూచిందింది.

రాత్రి 11 గంటల నుంచి ఉదయం 11 గంటల వరకూ 16ఏళ్ల లోపు పిల్లలను థియేటర్లకు అనుమతించొద్దని ఉన్నత న్యాయస్థానం సూచించింది. ఈ సమయంలో.. వేళాపాలా లేని షోలకు పిల్లలు వెళ్లడం వల్ల వాళ్ల ఆరోగ్యంపై ప్రభావం పడుతుందని పిటిషనర్ తరుపు న్యాయవాది కోర్టుకు తెలిపారు.

దీంతో... పిటిషనర్ తరుపు న్యాయవాది వాదనలతో ఏకీభవించిన తెలంగాణ ఉన్నత న్యాయస్థానం.. రాత్రి 11 గంటల నుంచి ఉదయం 11 గంటల వరకూ 16ఏళ్ల లోపు పిల్లలను థియేటర్లకు అనుమతించొద్దని సూచించింది. తదుపరి విచారణను ఫిబ్రవరి 22వ తేదీకి వాయిదా వేసింది.