సరాసరి రోజుకు వెయ్యి... ఏమిటీ వైట్ పాస్ఫరస్ బాంబులు?
| హమాస్ ఉగ్రవాదుల్ని ఏరివేసే లక్ష్యంతో గాజాపై ఇజ్రాయెల్ వైమానిక దాడులకు దిగిన సంగతి తెలిసిందే. మరికొన్ని గంటల్లో భూతల పోరు ప్రారంభం కాబోతోంది
హమాస్ ఉగ్రవాదుల్ని ఏరివేసే లక్ష్యంతో గాజాపై ఇజ్రాయెల్ వైమానిక దాడులకు దిగిన సంగతి తెలిసిందే. మరికొన్ని గంటల్లో భూతల పోరు ప్రారంభం కాబోతోంది. ఈ మేరకు ఇప్పటికే హెచ్చరికలు పంపేసింది ఇజ్రాయేల్ సైన్యం. ఆ సంగతి అలా ఉంటే... గాజాలోని 3,600 హమాస్ స్థావరాలపై దాడులు చేసినట్లు ఇజ్రాయెల్ ఇప్పటికే ప్రకటించుకుంది. ఈ నేపథ్యంలో ఇజ్రాయేల్ పై ఒక భారీ ఫిర్యాదు చేస్తుంది న్యూయార్క్‌ కు చెందిన హ్యుమన్‌ రైట్స్ వాచ్‌ అనే సంస్థ.
అవును... హమాస్ ఉగ్రవాది అనేవాడు గాజాలో కనిపించకుండా చేస్తామని, పురుగును నలిపినట్లు నలిపేస్తామని, ఆ మానవమృగాల వేటకు ఎంతవరకైనా వెళ్తామని ఇప్పటికే ఇజ్రాయేల్ ప్రధాని ప్రకటించిన సంగతి తెలిసిందే. ఆ మాటలకు తగ్గట్లుగానే చేతలూ ఉంటున్నాయి. ఈ సమయంలో ఉద్రిక్తతలు మొదలైన ఈ ఆరు రోజుల్లో.. ఆరు వేల బాంబులను గాజాపై జారవిడిచినట్లు ఇజ్రాయేల్ తెలిపింది. వీటి బరువు నాలుగు వేల టన్నులని పేర్కొంది.
ఈ నేపథ్యంలో న్యూయార్క్‌ కు చెందిన హ్యుమన్‌ రైట్స్ వాచ్‌ అనే సంస్థ ఇజ్రాయెల్ పై సంచలన ఆరోపణలు చేసింది. ఇందులో భాగంగా ఈ యుద్ధంలో ఇజ్రాయెల్ వైట్ పాస్ఫరస్ బాంబులు ఉపయోగిస్తోందని ఆరోపించింది. అక్టోబరు 10న లెబనాన్‌ పైనా, అక్టోబరు 11న గాజాపైనా ప్రయోగించిన ఆయుధాలకు సంబంధించిన వీడియోలను పరిశీలిస్తే.. వాటిలో వైట్ పాస్ఫరస్ ఆనవాళ్లు ఉన్నాయని ఇజ్రాయెల్ పై ఆరోపణలు గుప్పించింది.
ఈ వైట్ పాస్ఫరస్ బాంబులు పౌరులపై దీర్ఘకాలిక ప్రభావం చూపుతాయట. దీంతో హ్యుమన్‌ రైట్స్ వాచ్‌ ఆందోళన వ్యక్తం చేసింది. అయితే ఈ ఆరోపణలపై సీరియస్ గా రియాక్ట్ అయిన ఇజ్రాయెల్ సైన్యం... గాజాలో వైట్ పాస్ఫరస్ బాంబులు ప్రయోగించలేదని చెబుతోంది. వాస్తవానికి ఇజ్రాయేల్ పై ఇలాంటి ఆరోపణలు రావడం ఇది తొలిసారి కాదు. 2008-09లో గాజాపై వైట్ పాస్ఫరస్ బాంబులను ఇజ్రాయెల్ ప్రయోగించిందని చెబుతారు.
ఈ నేపథ్యంలో... 2013లో అంతర్జాతీయ సమాజం నుంచి ఈ వైట్ పాస్ఫరస్ బాంబుల వినియోగం పై వచ్చిన ఒత్తిడి కారణంగా.. వాటిని పూర్తిగా నిర్వీర్యం చేశామని ఇజ్రయేల్ ప్రకటించుకుంది. ఈ క్రమంలో.. తాజాగా ఇజ్రాయెల్ వీటిని మరోసారి గాజాపై ప్రయోగించిందన్న ఆరోపణలు వినిపిస్తున్నాయి. అయితే... వాస్తవానికి, అంతర్జాతీయ చట్టాల ప్రకారం వైట్ పాస్పరస్‌ బాంబుల వినియోగంపై ఎలాంటి నిషేధం లేదు.
ఈ క్రమంలో తాజాగా జరుగుతున్న రష్యా - ఉక్రెయిన్ యుద్ధంలో కూడా ఈ బాంబుల వినియోగం గట్టిగా ఉందని చెబుతున్నారు. ఇందులో భాగంగా.. తమ సైన్యంపై రష్యా.. వైట్ పాస్ఫరస్ బాంబులు ప్రయోగించిందని ఉక్రెయిన్ అధ్యక్షుడు జెలెన్‌స్కీ ఆరోపించారు.
అయితే... ఇలాంటి బాంబులు యుద్ధంలో భారీగా పొగను సృష్టిస్తాయి. బంకర్‌ లు, భవనాలను నాశనం చేసేందుకు ఈ వైట్ పాస్ఫరస్ బాంబులను ఉపయోగిస్తారట. వాటి నాశనాల సంగతి అలా ఉంటే... ఇవి మనుషులపై మాత్రం తీవ్ర ప్రభావం చూపిస్తాయని, దీర్ఘకాలిక రోగాలకు కారణమవుతాయని వైద్యరంగ నిపుణులు చెబుతున్నారు.