బిగ్ ట్విస్ట్ : ఉత్కంఠకు తెర.. టీవీకేకు వీసీకే, ఐయూఎంల్‌ మద్దతు.. ప్రభుత్వ ఏర్పాటుకు మార్గం సుగమం

తమిళనాడు రాజకీయాల్లో గత వారం రోజులుగా సాగుతున్న ఉత్కంఠకు ఎట్టకేలకు తెరపడింది. అసెంబ్లీ ఎన్నికల ఫలితాల అనంతరం నెలకొన్న సందిగ్ధత వీడి.. తమిళ వెట్రి కళగం (టీవీకే) అధినేత విజయ్ ముఖ్యమంత్రి పీఠం ఎక్కేందుకు మార్గం సుగమమైంది. కీలక మిత్రపక్షాల మద్దతు కూడగట్టడంలో విజయ్ సఫలం కావడంతో మేజిక్ ఫిగర్‌ను దాటి టీవీకే కూటమి జైత్రయాత్రను ఖరారు చేసుకుంది.

ఉత్కంఠ రేపిన సంఖ్యాబలం

మే 4న విడుదలైన ఫలితాల్లో టీవీకే 107 స్థానాలతో అతిపెద్ద పార్టీగా అవతరించినప్పటికీ ప్రభుత్వ ఏర్పాటుకు అవసరమైన 118 మార్కును అందుకోలేకపోయింది. స్వయంగా విజయ్ రెండు నియోజకవర్గాల నుంచి విజయం సాధించి రికార్డు సృష్టించినా మద్దతు కోసం ఇతర పార్టీల వైపు చూడాల్సిన పరిస్థితి ఏర్పడింది. తొలుత కాంగ్రెస్ (5 ఎమ్మెల్యేలు), సీపీఐ (2), సీపీఐ(ఎం) (2) మద్దతు ప్రకటించడంతో టీవీకే బలం 116కు చేరింది. అయితే మెజారిటీకి మరో రెండు స్థానాల అవసరం ఉండటంతో అందరి దృష్టి వీసీకే, ఐయూఎంఎల్ పార్టీల వైపు మళ్లింది.

వీసీకే, ఐయూఎంఎల్ గ్రీన్ సిగ్నల్

తమిళనాడు రాజకీయాల్లో సామాజిక సమీకరణాల దృష్ట్యా అత్యంత కీలకమైన వీసీకే ఎట్టకేలకు తన మద్దతును ప్రకటించింది. ఆ పార్టీ అధినేత తిరుమావళవన్, టీవీకే ముఖ్య నేత ఆదవ అర్జునను కలిసి అధికారిక మద్దతు లేఖను అందజేశారు. దళిత హక్కుల కోసం పనిచేసే వీసీకే మద్దతు తెలపడం విజయ్ ప్రభుత్వానికి నైతిక బలాన్ని కూడా చేకూర్చింది.

మరోవైపు చివరి నిమిషం వరకు సస్పెన్స్ కొనసాగించిన ఐయూఎంఎల్ కూడా బేషరతు మద్దతు ప్రకటించింది. ఇద్దరు ఎమ్మెల్యేలు ఉన్న ఆ పార్టీ మద్దతుతో టీవీకే కూటమి బలం 120కి చేరుకుంది. దీంతో ప్రభుత్వం పడిపోతుందన్న ఆందోళనలన్నీ తొలగిపోయి.. విజయ్ శ్రేణుల్లో నూతనోత్తేజం నెలకొంది.

గవర్నర్‌ వద్దకు విజయ్.. త్వరలోనే ప్రమాణ స్వీకారం!

మద్దతు లేఖలు అందిన వెంటనే విజయ్ నేరుగా రాజ్‌భవన్‌కు బయలుదేరి వెళ్లారు. తనకు 120 మంది ఎమ్మెల్యేల మద్దతు ఉందని.. ప్రభుత్వం ఏర్పాటుకు అనుమతించాలని కోరుతూ గవర్నర్‌కు అధికారిక పత్రాలను సమర్పించనున్నారు. గవర్నర్ నుంచి ఆహ్వానం అందిన వెంటనే చెన్నైలోని మెరీనా బీచ్ సమీపంలో భారీ బహిరంగ సభ ద్వారా ముఖ్యమంత్రిగా విజయ్ ప్రమాణ స్వీకారం చేసే అవకాశం ఉందని పార్టీ వర్గాలు వెల్లడించాయి.

రాష్ట్రవ్యాప్తంగా సంబరాలు

విజయ్ ముఖ్యమంత్రి కావడం ఖాయమవడంతో తమిళనాడు వ్యాప్తంగా పండగ వాతావరణం నెలకొంది. చెన్నై నుంచి కన్యాకుమారి వరకు టీవీకే కార్యకర్తలు, విజయ్ అభిమానులు రోడ్లపైకి వచ్చి మిఠాయిలు పంచుతూ, టపాసులు కాలుస్తూ సంబరాలు జరుపుకుంటున్నారు. "కొత్త రక్తం.. కొత్త మార్పు" అంటూ నినాదాలు చేస్తున్నారు. దశాబ్దాలుగా ఉన్న ద్రావిడ రాజకీయ పంథాను మార్చి, సరికొత్త పాలనను అందిస్తానన్న విజయ్ హామీ నెరవేరుతుందో లేదోనని రాజకీయ విశ్లేషకులు ఆసక్తిగా గమనిస్తున్నారు.

మొత్తానికి వెండితెరపై 'దళపతి'గా వెలిగిన విజయ్.. ఇప్పుడు తమిళనాడు రాజకీయ యవనికపై 'ముఖ్యమంత్రి'గా తన కొత్త ఇన్నింగ్స్‌ను ప్రారంభించేందుకు సర్వం సిద్ధం చేసుకున్నారు.