రూ.30 కోట్లైనా సరే.. సూర్యవంశీ కావాలి!

భారత క్రికెట్‌లో ఇప్పుడు ఎక్కడ చూసినా ఒకే పేరు మార్మోగిపోతోంది... అదే వైభవ్ సూర్యవంశీ. ఈ యువ సంచలనం సృష్టిస్తున్న విధ్వంసకర బ్యాటింగ్‌కు క్రికెట్ దిగ్గజాలు సైతం ఫిదా అయిపోతున్నారు. తాజాగా టీమిండియా మాజీ ఓపెనర్, ముల్తాన్ సుల్తాన్ వీరేంద్ర సెహ్వాగ్ ఈ యువ ఆటగాడిపై చేసిన వ్యాఖ్యలు ఇప్పుడు క్రికెట్ వర్గాల్లో హాట్ టాపిక్‌గా మారాయి. "వైభవ్ సూర్యవంశీ గనుక ఐపీఎల్ వేలంలోకి వస్తే... ఏకంగా రూ. 30 కోట్లు పెట్టి అయినా సరే కొనేస్తా!" అని వీరేంద్ర సెహ్వాగ్ అంటున్నాడు.

సెహ్వాగ్‌ను ఆశ్చర్యపరిచిన ‘నిర్భయ’ బ్యాటింగ్

ఇటీవల ఒక కార్యక్రమంలో మాజీ స్పిన్నర్ హర్భజన్ సింగ్ అడిగిన ప్రశ్నకు సెహ్వాగ్ తనదైన శైలిలో స్పందించారు. తన కెరీర్‌లో ఎన్నో వేగవంతమైన సెంచరీలు బాదానని గుర్తుచేసుకున్న వీరూ... వైభవ్ సూర్యవంశీలా ఎలాంటి భయం లేకుండా బ్యాటింగ్ చేసిన యువ ఆటగాడిని తాను ఎప్పుడూ చూడలేదని కొనియాడారు. ఎంతటి మేటి బౌలర్లయినా సరే, ఏమాత్రం ఒత్తిడి లేకుండా వారిపై దాడి చేసే స్టైల్. క్రీజులోకి వచ్చిన మొదటి బంతి నుంచే భారీ షాట్లతో విరుచుకుపడే మనస్తత్వం. వయసుకు మించిన పరిణతితో బంతిని బౌండరీలకు తరలించే నైపుణ్యం వైభవ్ లో ఉందన్నారు.

"నేనే సెలక్టర్ అయితే వెంటనే టీమిండియాలోకి తీసుకుంటా!"

సాధారణంగా యువ ఆటగాళ్ల విషయంలో సెలెక్టర్లు చాలా జాగ్రత్తగా వ్యవహరిస్తారు. వారికి దేశీవాళీ క్రికెట్‌లో తగినంత అనుభవం వచ్చే వరకు వేచి చూస్తారు. కానీ సెహ్వాగ్ మాత్రం ఇంకో అడుగు ముందుకేసి.. "నేనే గనుక ఇండియన్ టీమ్ సెలక్టర్ అయితే ఏమాత్రం ఆలస్యం చేయకుండా వైభవ్‌ను వెంటనే జాతీయ జట్టులోకి తీసుకుంటా" అని సంచలన ప్రకటన చేశారు. సెహ్వాగ్ లాంటి లెజెండరీ దూకుడు బ్యాటర్ నుంచి ఇలాంటి ప్రశంసలు రావడం వైభవ్ అసాధారణ టాలెంట్‌కు నిదర్శనంగా నిలుస్తోంది.

సోషల్ మీడియాలో ‘నెక్స్ట్ సెహ్వాగ్’ ట్రెండింగ్!

ఈ యువ సంచలనం ఆటకు నెటిజన్లు, క్రికెట్ అభిమానులు ఇప్పటికే బానిసలైపోయారు. సోషల్ మీడియా వేదికగా వైభవ్‌ను “ఫ్యూచర్ స్టార్”, “నెక్స్ట్ సెహ్వాగ్” అంటూ పొగడ్తలతో ముంచెత్తుతున్నారు.

రాబోయే వేలంలో ‘బిడ్డింగ్ వార్’ ఖాయమేనా?

సెహ్వాగ్ చేసిన "రూ. 30 కోట్ల" కామెంట్ తర్వాత ఐపీఎల్ ఫ్రాంచైజీల దృష్టి వైభవ్‌పై మరింతగా పడింది. రాబోయే ఐపీఎల్ వేలంలో ఈ యువ ఆటగాడిని దక్కించుకోవడానికి ఫ్రాంచైజీల మధ్య భారీ బిడ్డింగ్ యుద్ధం జరిగే అవకాశాలు స్పష్టంగా కనిపిస్తున్నాయని విశ్లేషకులు భావిస్తున్నారు.

భారత క్రికెట్‌కు సెహ్వాగ్ లాంటి మరో అగ్రెసివ్ స్టార్ దొరికాడా? లేక ఇది కేవలం ప్రారంభ హడావుడేనా? అన్నది రాబోయే రోజుల్లో తేలనుంది. కానీ ప్రస్తుతం మాత్రం వైభవ్ సూర్యవంశీ క్రేజ్ దేశవ్యాప్తంగా పీక్స్‌కు చేరిందనేది అక్షర సత్యం!