తాగి వాహనం నడిపినా చాలు ఎఫ్-1, హెచ్-1బి వీసా రద్దు?

విద్యార్థి / వర్క్ వీసాపై మీరు అమెరికాలో ఉంటే జర జాగ్రత్త వహించండి. ఒక్కసారి మద్యం తాగి వాహనం నడిపిన నేరం జరిగితే మీ వీసా రద్దుకు దారితీయవచ్చు. మిన్నెసోటా విశ్వవిద్యాలయంలో చదువుతున్న ఒక గ్రాడ్యుయేట్ విద్యార్థి ఇటీవల ఈ విషయాన్ని స్వయంగా వెల్లడించాడు. అతడిని ఇమ్మిగ్రేషన్ అధికారులు అరెస్టు చేయడంతో నిరసనలు వెల్లువెత్తాయి. వీసా రద్దుపై చర్చ మళ్లీ మొదలైంది. మిన్నియాపాలిస్‌లోని విశ్వవిద్యాలయం యొక్క బిజినెస్ స్కూల్‌లో ఎఫ్‌-1 వీసాపై చదువుతున్న ఆ విద్యార్థిని గత గురువారం యు.ఎస్. ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) అధికారులు క్యాంపస్ వెలుపల ఉన్న నివాసంలో అదుపులోకి తీసుకున్నారు. అరెస్టుకు కారణం క్యాంపస్ నిరసనలేనని తొలుత భావించినప్పటికీ రాజకీయ కార్యకలాపాలతో ఈ సంఘటనకు ఎలాంటి సంబంధం లేదని యు.ఎస్. డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (DHS) స్పష్టం చేసింది. డ్రంక్ అండ్ డ్రైవింగ్‌తో అరెస్ట్ కావడమే దీనికి కారణంగా తేల్చారు. "ఇది విద్యార్థుల నిరసనలకు సంబంధించినది కాదు" అని DHS ఒక ప్రకటనలో తెలిపింది. "డ్రైవింగ్ అండర్ ది ఇన్ఫ్లుయెన్స్ (DUI) తో కూడిన నేర చరిత్ర కారణంగా స్టేట్ డిపార్ట్‌మెంట్ ఆ విద్యార్థి వీసాను రద్దు చేసి అరెస్టు చేశారు." అని తెలిపింది.

ఈ సంఘటనతో వీసాదారులు DUI నేరాలను అమెరికా ఎంత కఠినంగా పరిగణిస్తుందో అర్థం చేసుకోవాలని ఇమ్మిగ్రేషన్ నిపుణులు హెచ్చరిస్తున్నారు. నేరం రుజువు కాకపోయినా, అరెస్టు మాత్రమే వీసా రద్దుకు దారితీయవచ్చు. "అమెరికాలో డ్రంక్ డ్రైవింగ్ వంటి నేరాలకు వీసాలు రద్దు చేయబడతాయి" అని బర్జన్ లా సీనియర్ భాగస్వామి కేతన్ ముఖిజా అన్నారు. ఈ పరిణామాలు విద్యార్థి వీసాలకు మాత్రమే పరిమితం కాదని ఇమ్మిగ్రేషన్ నిపుణుడు అజయ్ శర్మ వివరించారు. "అమెరికా వంటి దేశాలలో డ్రంక్ డ్రైవింగ్‌ను చాలా తీవ్రంగా పరిగణిస్తారు. పదే పదే DUI నేరాలు శాశ్వత నివాస హోదాను కూడా రద్దు చేయడానికి దారితీయవచ్చు" అని ఆయన అన్నారు. వీసా నుండి వర్క్ పర్మిట్‌లు లేదా గ్రీన్ కార్డ్‌లకు మారే విద్యార్థులు ప్రత్యేకంగా ఈ ప్రమాదంలో ఉన్నారని ఆయన పేర్కొన్నారు."ఆప్షనల్ ప్రాక్టికల్ ట్రైనింగ్ (OPT) సమయంలో కూడా DUI గ్రీన్ కార్డ్ దరఖాస్తు తిరస్కరణకు దారితీయవచ్చు," అని శర్మ తెలిపారు. గ్రీన్ కార్డ్ హోల్డర్లు అనేక నేరాలకు బహిష్కరణను ఎదుర్కోవచ్చు, అయితే అంతర్జాతీయ విద్యార్థులు తక్షణ వీసా రద్దును ఎదుర్కొనే ప్రమాదం ఉంది. అమెరికా పౌరులు కాని వలసదారులు ఈ విషయంలో అనుమతించబడరు లేదా తొలగించబడవచ్చు. అయితే అమెరికా పౌరులు కేవలం చట్టపరమైన జరిమానాలను మాత్రమే ఎదుర్కొంటారు. వారికి ఇమ్మిగ్రేషన్ పరిణామాలు ఉండవు." అని తెలిపారు.

అధికారిక వివరణ ఉన్నప్పటికీ, మిన్నెసోటా విశ్వవిద్యాలయానికి ఇమ్మిగ్రేషన్ అధికారుల నుండి ఇంకా అధికారిక సమాచారం అందలేదు. క్యాంపస్ కమ్యూనిటీకి రాసిన లేఖలో మిన్నెసోటా స్టేట్ యూనివర్శిటీ మంకాటో ప్రెసిడెంట్ ఎడ్వర్డ్ ఇంచ్ ఆందోళన వ్యక్తం చేశారు:

"ఎలాంటి కారణం చెప్పలేదు. విశ్వవిద్యాలయానికి ICE నుండి ఎలాంటి సమాచారం అందలేదు, వారు మా నుండి ఎలాంటి సమాచారం కోరలేదు. మా విద్యార్థులపై ఇలాంటి చర్యలను నిలిపివేయడంలో సహాయం చేయమని కోరుతూ నేను ఎన్నికైన అధికారులను సంప్రదించాను." అని ఎడ్వర్డ్ తెలిపారు. యు.ఎస్. సెనేటర్ టీనా స్మిత్ కూడా ఆందోళన వ్యక్తం చేస్తూ, ఇది ఆందోళనకరమైన ధోరణిలో భాగమని అన్నారు. "ఇది చాలా ఆందోళనకరమైన ధోరణిగా మారుతోంది. ICE విద్యార్థులను ఎటువంటి వివరణ లేకుండా నిర్బంధిస్తోంది. వారి న్యాయ ప్రక్రియ హక్కును పట్టించుకోవడం లేదు" అని ఆమె X (గతంలో ట్విట్టర్) లో పోస్ట్ చేశారు.

ఇప్పటివరకు, మిన్నెసోటా విశ్వవిద్యాలయం లేదా మిన్నెసోటా స్టేట్ యూనివర్శిటీ మంకాటో విద్యార్థి యొక్క గుర్తింపు లేదా జాతీయతను వెల్లడించలేదు. కానీ 300 పైగా విద్యార్థి వీసాలు రద్దు చేయబడ్డాయి. ముఖ్యంగా పాలస్తీనా అనుకూల నిరసనలలో పాల్గొన్న అంతర్జాతీయ విద్యార్థులపై అమెరికాలో నిఘా పెరిగిన సమయంలో ఈ కేసు వెలుగులోకి వచ్చింది. ప్రభుత్వ వర్గాల సమాచారం ప్రకారం ఇటీవలి వారాల్లో 300 పైగా విద్యార్థి వీసాలు రద్దు చేయబడ్డాయి. మిన్నెసోటా కేసు రాజకీయ రహిత నేరాలు అయినప్పటికీ కూడా ఇమ్మిగ్రేషన్ పరిణామాలను కలిగిస్తాయని ఈ ఘటన గుర్తు చేస్తుంది.