10% గ్లోబల్ టారిఫ్: ప్రపంచ ఆర్థిక వ్యవస్థకు రక్షణ కవచమా? లేక పెను భారమా?

అంతర్జాతీయ వాణిజ్య రంగంలో ఇప్పుడు ఎక్కడ చూసినా 'టారిఫ్' మాటే వినిపిస్తోంది. ముఖ్యంగా అమెరికా అనుసరించాలనుకుంటున్న 10% సార్వత్రిక దిగుమతి సుంకం విధానం.. అభివృద్ధి చెందుతున్న భారత్ వంటి దేశాల నుంచి అగ్రరాజ్యం చైనా వరకు అందరినీ ఆలోచనలో పడేసింది.

అమెరికా అధ్యక్షుడు డొనాల్డ్ ట్రంప్ ప్రతిపాదించిన 10% గ్లోబల్ టారిఫ్ అంశం ప్రస్తుతం ప్రపంచ ఆర్థిక ముఖచిత్రంపై పెను చర్చకు దారితీసింది. "అమెరికా ఫస్ట్" అనే నినాదంతో ముందుకు తెచ్చిన ఈ విధానం వల్ల లాభాల కంటే నష్టాలే ఎక్కువగా ఉంటాయని కొందరు ఆర్థికవేత్తలు హెచ్చరిస్తుండగా స్వదేశీ తయారీ రంగానికి ఇది ఒక వరం అని మద్దతుదారులు భావిస్తున్నారు.

అసలు టారిఫ్ అంటే ఏమిటి?

విదేశాల నుంచి వచ్చే వస్తువులపై ప్రభుత్వం విధించే ఒక రకమైన 'ప్రవేశ పన్ను'నే ఈ టారిఫ్ లు.. ఉదాహరణకు చైనా లేదా భారత్ నుండి వచ్చే ఒక వస్తువు ధర రూ. 100 అనుకుంటే.. 10% టారిఫ్ విధించిన తర్వాత దాని ధర రూ. 110 అవుతుంది. దీనివల్ల విదేశీ వస్తువుల ధరలు పెరిగి దేశీయంగా తయారయ్యే వస్తువులకు మార్కెట్‌లో పోటీనిచ్చే అవకాశం లభిస్తుంది.

ఈ విధానంతో కలిగే లాభాలు

విదేశీ వస్తువులు ఖరీదవ్వడం వల్ల స్థానిక వినియోగదారులు స్వదేశీ ఉత్పత్తుల వైపు మొగ్గు చూపుతారు. ఇది చిన్న, మధ్య తరహా పరిశ్రమలకు గొప్ప ఊతాన్నిస్తుంది. దిగుమతులు తగ్గి, దేశీయంగా ఉత్పత్తి పెరిగితే కొత్త ఫ్యాక్టరీలు ఏర్పాటవుతాయి. ఫలితంగా వేల సంఖ్యలో కొత్త ఉద్యోగాలు వస్తాయి. ప్రతి దిగుమతిపై 10% పన్ను వసూలు చేయడం వల్ల ప్రభుత్వానికి బిలియన్ల కొద్దీ డాలర్ల ఆదాయం సమకూరుతుంది. ఈ నిధులను మౌలిక సదుపాయాల కల్పనకు వాడుకోవచ్చు. అమెరికా వంటి దేశాలు ఇతర దేశాల నుండి భారీగా దిగుమతులు చేసుకుంటాయి. ఈ టారిఫ్ వల్ల దిగుమతులు తగ్గి, ఎగుమతి-దిగుమతుల మధ్య ఉన్న అంతరం తగ్గుతుంది.

పొంచి ఉన్న ప్రమాదాలు

టారిఫ్ అనేది చివరికి వినియోగదారుడి జేబుకే చిల్లు పెడుతుంది. వస్తువు ధర పెరగడం వల్ల సామాన్యుడిపై భారం పడుతుంది. ఇది ద్రవ్యోల్బణానికి దారి తీస్తుంది. అమెరికా 10% పన్ను వేస్తే భారత్ లేదా చైనా ఊరుకోవు. అవి కూడా అమెరికా నుండి వచ్చే వస్తువులపై పన్నులు పెంచుతాయి. దీనివల్ల 'ట్రేడ్ వార్' మొదలై ప్రపంచ వాణిజ్యం స్తంభించిపోతుంది. నేడు ఏ వస్తువూ ఒకే చోట తయారవ్వదు. అమెరికాలోని ఒక ఫోన్ తయారీకి కావలసిన విడిభాగాలు వివిధ దేశాల నుండి రావాలి. ఆ విడిభాగాలపై పన్ను వేస్తే, చివరికి ఆ ఫోన్ ధర విపరీతంగా పెరిగిపోతుంది.

భారత్‌పై ప్రభావం ఎలా ఉంటుంది?

భారతదేశం అమెరికాకు ఒక ప్రధాన వాణిజ్య భాగస్వామి. ఈ విధానం వల్ల మనపై మిశ్రమ ప్రభావం ఉండవచ్చు. ఐటీ సేవలు, ఔషధ రంగాలు , టెక్స్‌టైల్స్ ఎగుమతులు ఖరీదవుతాయి. దీనివల్ల మన ఎగుమతిదారుల లాభాలు తగ్గే అవకాశం ఉంది. చైనాపై ఆధారపడటం తగ్గించాలనుకునే అమెరికా కంపెనీలు, భారత్‌ను ప్రత్యామ్నాయ తయారీ కేంద్రంగా చూసే అవకాశం ఉంది. 10% గ్లోబల్ టారిఫ్ అనేది ఒక రెండు అంచుల కత్తి. ఇది స్వదేశీ పరిశ్రమలను రక్షించడానికి వాడే ఒక శక్తివంతమైన ఆయుధం అయినప్పటికీ సరిగ్గా వాడకపోతే ప్రపంచ ఆర్థిక వ్యవస్థను మాంద్యంలోకి నెట్టేసే ప్రమాదం ఉంది. దేశాల మధ్య పరస్పర సహకారం లేని పక్షంలో ఈ రక్షణాత్మక విధానాలు సామాన్య వినియోగదారుడికి భారంగానే మారుతాయి.