ట్రంప్ తగ్గాడు.. మోడీ స్వాగతించాడు..

ఇటీవలి కాలంలో రష్యా నుంచి చమురు కొనుగోలు, చైనాతో సంబంధాల విషయంలో భారత్‌పై అమెరికా అధ్యక్షుడు డొనాల్డ్ ట్రంప్ తీవ్ర వ్యాఖ్యలు చేసిన విషయం తెలిసిందే. అయితే అనూహ్యంగా తన వైఖరిని మార్చుకున్న ట్రంప్, భారత ప్రధాని నరేంద్ర మోదీని ప్రశంసించడంతో భారత్-అమెరికా సంబంధాలు కొత్త మలుపు తీసుకున్నాయి. ఈ పరిణామాన్ని ప్రధాని మోదీ సానుకూలంగా స్వాగతించారు.

* ట్రంప్ ప్రశంసలు.. మోదీ స్పందన

ట్రంప్ ఇటీవల ఒక ప్రకటనలో "భారత్-అమెరికా మధ్య ప్రత్యేక సంబంధం ఉంది. కొన్ని సందర్భాల్లో విభేదాలు ఉన్నా, మోదీతో నా స్నేహం ఎప్పటికీ అలాగే ఉంటుంది. ఆయన గొప్ప ప్రధాని" అని పేర్కొన్నారు. అదే సమయంలో మోదీ తీసుకుంటున్న కొన్ని నిర్ణయాలు తనకు నచ్చలేదని కూడా స్పష్టం చేశారు.

ట్రంప్ చేసిన ఈ వ్యాఖ్యలపై ప్రధాని మోదీ వెంటనే 'ఎక్స్' లో స్పందించారు. "ఇరు దేశాల వ్యూహాత్మక భాగస్వామ్యంపై అధ్యక్షుడు ట్రంప్ వ్యక్తం చేసిన భావాలు, సానుకూల దృక్పథాన్ని అభినందిస్తున్నాను. భారత్, అమెరికా కలిసి మంచి భవిష్యత్తును నిర్మించగలవు" అని పేర్కొన్నారు. ఈ స్పందన ఇరు దేశాల మధ్య సంబంధాలను మరింత బలోపేతం చేస్తుందని విశ్లేషకులు భావిస్తున్నారు.

* నేపథ్యం

ఈ పరిణామం వెనుక ఇటీవలి కొన్ని సంఘటనలు ఉన్నాయి. చైనాలో జరిగిన షాంఘై సహకార సంస్థ (SCO) శిఖరాగ్ర సదస్సులో మోదీ, రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు జిన్‌పింగ్‌లతో సమావేశమయ్యారు. ఈ సమావేశంపై ట్రంప్ తన 'ట్రూత్ సోషల్' వేదికగా కఠిన వ్యాఖ్యలు చేశారు. భారత్, రష్యా రెండూ అమెరికా నుంచి దూరమయ్యాయని, చైనా ప్రభావంలోకి వెళ్తున్నాయని ఆయన ఆరోపించారు. మూడు దేశాలు సుదీర్ఘ భవిష్యత్తు కలిగి ఉండాలని వ్యంగ్యంగా రాసుకొచ్చారు.

*భారత్-అమెరికా మధ్య వ్యూహాత్మక బంధం కొనసాగుతుందా?

అంతర్జాతీయ సంబంధాల నిపుణుల దృష్టిలో ట్రంప్-మోదీ మధ్య ఈ మాటల యుద్ధం ఒక రకమైన దౌత్యపరమైన వ్యూహంలో భాగం. అమెరికా-భారత్ మధ్య వాణిజ్య, భద్రతా, సాంకేతిక రంగాల్లో బలమైన సంబంధాలు ఉన్నాయి. అలాంటి బంధం ఉన్నప్పుడు ఇలాంటి తాత్కాలిక విభేదాలు ఎక్కువకాలం నిలవవని వారు భావిస్తున్నారు. మోదీ, ట్రంప్ ఇద్దరూ తమ దేశ ప్రయోజనాలను దృష్టిలో ఉంచుకుని పరస్పర సంబంధాలను మెరుగుపరుచుకుంటారని విశ్లేషకులు అంచనా వేస్తున్నారు.

మొత్తానికి, ఈ పరిణామాలు తాత్కాలిక విభేదాలు ఉన్నప్పటికీ, భారత్-అమెరికా మధ్య వ్యూహాత్మక బంధం కొనసాగుతుందని, భవిష్యత్తులో అది మరింత బలోపేతం అవుతుందని స్పష్టమైన సంకేతాలు ఇస్తున్నాయి. ట్రంప్ తన వైఖరిని మార్చుకోవడం, మోదీ దానికి సానుకూలంగా స్పందించడం ఇరు దేశాల దౌత్య సంబంధాలలో ఒక ముఖ్యమైన ఘట్టం.