తొలిరోజే రూ.68 లక్షల జరిమానాలు.. ఢిల్లీలో కాలుష్యంపై యుద్ధం..
గుండె నిండా స్వచ్ఛమైన గాలి పీల్చడం కూడా ఒక కలగా మారిపోయిన చోట... ప్రతీ శ్వాస ఒక యుద్ధంలా మారిన వేళ.. ఢిల్లీ తన బిడ్డల భవిష్యత్తు కోసం కాలుష్యంపై కంటిపాపలా కత్తికట్టింది.
గుండె నిండా స్వచ్ఛమైన గాలి పీల్చడం కూడా ఒక కలగా మారిపోయిన చోట... ప్రతీ శ్వాస ఒక యుద్ధంలా మారిన వేళ.. ఢిల్లీ తన బిడ్డల భవిష్యత్తు కోసం కాలుష్యంపై కంటిపాపలా కత్తికట్టింది. విషపు గాలుల కరచాలనానికి అడ్డుకట్ట వేస్తూ ప్రాణవాయువును కాపాడుకునేందుకు రాజధాని వేసిన ఈ తొలి అడుగు... కేవలం ఒక కఠినమైన చట్టం కాదు.. మన రేపటి తరం శ్వాసను నిలబెట్టే ఒక ఆక్రందన, ఒక ఆశ..
దేశ రాజధాని ఢిల్లీ ప్రతీ ఏటా శీతాకాలంలో తీవ్రమైన వాయు కాలుష్య కోరల్లో చిక్కుకోవడం పరంపరగా వస్తోంది. అయితే ఈసారి ప్రభుత్వం కేవలం హెచ్చరికలు, ప్రకటనలకే పరిమితం కాకుండా కాలుష్య భూతంపై ప్రత్యక్ష యుద్ధానికి దిగింది. నిబంధనలను ధిక్కరిస్తే ఇక ఉపేక్షించేది లేదని కఠినమైన శీతాకాల కాలుష్య నియంత్రణ ప్రణాళిక ద్వారా స్పష్టం చేసింది.
ఈ సమరంలో తొలిరోజే అధికారులు ప్రదర్శించిన దూకుడు తీవ్ర చర్చనీయాంశమైంది. ఒక్క రోజే ఏకంగా రూ.68.4 లక్షల భారీ జరిమానాలు విధించడంతో పాటు.. నిబంధనలకు అనుగుణంగా లేని 1,539 వాహనాలను సరిహద్దుల నుంచే వెనక్కి తిప్పి పంపించారు. కాలుష్యానికి ప్రధాన కారణమైన వాహన రంగంపై అధికారులు ప్రత్యేకంగా కొరడా ఝళిపించారు. చెల్లుబాటు అయ్యే పీయూసీ సర్టిఫికెట్ లేని 566 వాహనాలకు రూ.56.6 లక్షలు.. ప్రవేశ నిబంధనలు ఉల్లంఘించిన వారికి రూ.2 లక్షల ఫైన్ విధించారు. మొత్తం 14,930 వాహనాలను తనిఖీ చేసి 62 వాహనాలను సీజ్ చేశారు.
మరోవైపు గాలి నాణ్యతను తీవ్రంగా దెబ్బతీస్తున్న నిర్మాణ రంగంపైనా అధికారులు ఉక్కుపాదం మోపారు. 300 నిర్మాణ స్థలాలను తనిఖీ చేసి.. దుమ్ము నియంత్రణ చర్యలు చేపట్టని 32 ప్రాంతాలకు రూ.9.8 లక్షల పరిహారం విధించడంతో పాటు షోకాజ్ నోటీసులు జారీ చేశారు. వాహనాల వినియోగాన్ని తగ్గించేందుకు పార్కింగ్ ఫీజును ఫిబ్రవరి 28 వరకు రెట్టింపు చేయడమే కాకుండా కార్యాలయాల్లో 50 శాతం వర్క్ ఫ్రమ్ హోమ్ అమలుకు ఆదేశించారు.
"స్వచ్ఛమైన గాలిని పీల్చడం మన అందరి ప్రాథమిక హక్కు. కానీ ఆ స్వచ్ఛతను కాపాడుకోవడం మన అందరి బాధ్యత" అని ఢిల్లీ పర్యావరణ మంత్రి మంజిందర్ సింగ్ సిర్సా స్పష్టం చేశారు. ప్రభుత్వం చేపడుతున్న చర్యలు కేవలం కాగితాలకో.. చలానాలకో పరిమితం కాకూడదు. జరిమానాల భయంతో కాకుండా రాబోయే తరాల ఆరోగ్యకరమైన భవిష్యత్తు కోసం ప్రతి ఒక్కరిలో పర్యావరణ స్పృహ పెరగాలి. ప్రజల భాగస్వామ్యం, అధికారుల నిరంతర పర్యవేక్షణ తోడైనప్పుడే ఢిల్లీలో కాలుష్య మేఘాలు తొలగి.. శ్వాసించే స్వచ్ఛమైన గాలి సాధ్యమవుతుంది.