రాప్తాడు బాలికపై దాడి కేసులో కీలక పరిణామం.. అడవుల్లో నిందితుడిపై పోలీసుల కాల్పులు
అనంతపురం జిల్లా రాప్తాడు మండల పరిధిలోని జడ్పీ ఉన్నత పాఠశాలలో పదో తరగతి చదువుతున్న విద్యార్థిని(15)పై జరిగిన కిరాతక దాడి కేసులో సంచలన పరిణామం చోటుచేసుకుంది.
అనంతపురం జిల్లా రాప్తాడు మండల పరిధిలోని జడ్పీ ఉన్నత పాఠశాలలో పదో తరగతి చదువుతున్న విద్యార్థిని(15)పై జరిగిన కిరాతక దాడి కేసులో సంచలన పరిణామం చోటుచేసుకుంది. తరగతి గదిలోనే ఎలక్ట్రిక్ రంపంతో బాలికపై విచక్షణారహితంగా దాడి చేసి పరారైన నిందితుడు హేమంత్‌ను పట్టుకునేందుకు చేపట్టిన ఆపరేషన్‌లో పోలీసులు కాల్పులు జరిపారు. ఆత్మకూరు అటవీ ప్రాంతంలో నిందితుడు దాక్కున్నాడన్న పక్కా సమాచారంతో గాలింపు చేపట్టిన ప్రత్యేక బలగాలపైకి తప్పించుకునేందుకు ప్రయత్నించడంతో పోలీసులు ఆరు రౌండ్ల కాల్పులు జరిపారు. ఈ ఘటనలో తీవ్రంగా గాయపడిన నిందితుడిని చికిత్స నిమిత్తం అనంతపురం ప్రభుత్వ ఆసుపత్రికి తరలించారు.
రాప్తాడులోని అయ్యవారిపల్లి గ్రామానికి చెందిన విద్యార్థిని రోజూలాగే పాఠశాలకు వెళ్లి తరగతి గదిలో చదువుకుంటోంది. అయితే వరుసకు బాబాయ్ అయ్యే హేమంత్ తీవ్ర ఉన్మాదంతో ఎలక్ట్రిక్ రంపాన్ని పట్టుకుని ఒక్కసారిగా క్లాస్‌రూమ్‌లోకి చొరబడ్డాడు. విద్యార్థులు, ఉపాధ్యాయులు తేరుకునేలోపే గోపికపై విచక్షణారహితంగా దాడికి తెగబడ్డాడు. ఈ దాడిలో బాలిక ముఖం, తల, వీపు భాగాల్లో తీవ్ర గాయాలయ్యాయి.
గోపికపై దారుణ దాడి జరుగుతుండగా తోటి విద్యార్థిని లక్ష్మి ప్రాణాలకు తెగించి నిందితుడిని అడ్డుకునేందుకు ప్రయత్నించింది. ఈ క్రమంలో లక్ష్మి రెండు కాళ్లకు తీవ్ర గాయాలయ్యాయి. విద్యార్థుల కేకలు, లక్ష్మి ప్రతిఘటనతో భయాందోళనకు గురైన నిందితుడు ఎలక్ట్రిక్ రంపాన్ని అక్కడే పడేసి పరారయ్యాడు. తీవ్రంగా గాయపడి రక్తపు మడుగులో పడివున్న గోపికను, లక్ష్మిని వెంటనే అనంతపురం ఆసుపత్రికి తరలించారు. అనంతరం గోపిక పరిస్థితి విషమంగా ఉండటంతో మెరుగైన వైద్యం కోసం బెంగళూరులోని ప్రైవేట్ ఆసుపత్రికి తరలించి తీవ్ర చికిత్స అందిస్తున్నారు.
ఈ దారుణంపై రాష్ట్రవ్యాప్తంగా తీవ్ర నిరసనలు, ఆగ్రహజ్వాలలు వ్యక్తమయ్యాయి. ఘటనను తీవ్రంగా పరిగణించిన పోలీసులు నిందితుడి కోసం ప్రత్యేక బృందాలను రంగంలోకి దించారు. ఈ క్రమంలో ఆత్మకూరు సమీపంలోని అటవీ ప్రాంతంలో హేమంత్ సంచరిస్తున్నట్లు సమాచారం లభించింది. పోలీసులు చుట్టుముట్టి లొంగిపోవాలని కోరినప్పటికీ నిందితుడు తప్పించుకునేందుకు యత్నించడంతో పోలీసులు కాల్పులు జరపక తప్పలేదు. ఈ ఆపరేషన్‌లో నిందితుడికి తీవ్ర గాయాలవ్వడంతో పోలీసు భద్రత నడుమ ఆసుపత్రిలో చికిత్స అందిస్తున్నారు.
విద్యాబుద్ధులు నేర్పే పాఠశాల తరగతి గదిలోనే విద్యార్థినిపై ఇలాంటి భయానక దాడి జరగడం స్థానికంగానే కాక రాష్ట్రవ్యాప్తంగా తీవ్ర దిగ్భ్రాంతిని కలిగించింది. విద్యాసంస్థల్లో బాలికల భద్రతను ప్రశ్నించేలా ఉన్న ఈ ఘటనపై సర్వత్రా ఆందోళన వ్యక్తమవుతోంది. పాఠశాలల్లో విద్యార్థుల రక్షణకు మరింత పటిష్టమైన భద్రతా చర్యలు.. నిఘా ఏర్పాటు చేయాల్సిన అవసరం ఉందనే చర్చ మళ్లీ తీవ్రతరమైంది.