టెస్లా కారు: అమెరికాలో రూ.32 లక్షలు, ఇండియాలో రూ.68 లక్షలు!

ఎలక్ట్రిక్ వాహనాల ప్రపంచంలో టెస్లా పేరెన్నిక గడించింది. ఎలన్ మస్క్ నేతృత్వంలోని ఈ సంస్థ వాహన రంగంలో విప్లవాత్మక మార్పులు తీసుకొచ్చిందని అంతా అంగీకరించే అంశం. కానీ ఇప్పుడు అదే సంస్థపై మనదేశంలో ధరల దోపిడీకి సంబంధించిన ఆరోపణలు వెల్లువెత్తుతున్నాయి. ముఖ్యంగా టెస్లా మోడల్ Y LR కారు ధర విషయంలో అమెరికా - ఇండియా మధ్య వ్యత్యాసం చూస్తే, ప్రతి వినియోగదారుడికీ ఇదేంటి ఇంత తేడా దాదాపు డబుల్ ధర అని అనిపించక మానదు.

ఒకే కారు – రెండు విరుద్ధ ధరలు

టెస్లా మోడల్ Y LR కారు ధరలు చూస్తే ఆశ్చర్యపోక తప్పదు. అమెరికాలో ధర సుమారు USD $38,990 (సుమారు రూ. 32.18 లక్షలు) అదే భారతదేశంలో ధర: రూ. 67.89 లక్షలుగా ప్రకటించింది. ఈ రెండు ధరల మధ్య ఘోరమైన వ్యత్యాసం ఉంది. దాదాపు డబుల్ ధర. దీనితో నెటిజన్లు, ఆటోమొబైల్ విశ్లేషకులు, సాధారణ వినియోగదారులు కూడా ఎలన్ మస్క్‌పై ప్రశ్నలు గుప్పిస్తున్నారు. ఇది నిజంగా ధరల దోపిడీయా? లేక ఇది ప్రభుత్వ విధానాల, దిగుమతి ఖర్చుల పర్యవసానమా?

ఇంత తేడా ఎందుకు?

ఈ భారీ ధరల వ్యత్యాసానికి అనేక కారణాలున్నాయి. దిగుమతి సుంకం కారణంగా భారత్‌లో విదేశీ వాహనాలపై 100% వరకు దిగుమతి సుంకం ఉంటుంది. ఇది కేవలం బేసిక్ కస్టమ్స్ డ్యూటీ మాత్రమే. ఉదాహరణకు, టెస్లా కారు ధరను 32 లక్షలుగా తీసుకుంటే, దానిపై దాదాపు 32 లక్షల అదనపు సుంకం పడుతుంది. GST ఇతర పన్నులతో EVలపై ప్రస్తుతం భారతదేశంలో 5% GST వర్తించనప్పటికీ, ఇతర చార్జీలు, రోడ్ ట్యాక్స్, రిజిస్ట్రేషన్ ఫీజులు అదనంగా ఉంటాయి. అమెరికా నుండి భారత్‌కు కార్లు తెచ్చే ఖర్చులు, బీమా, నిల్వ ఖర్చులు అన్నీ కలిసి ధరను పెంచుతాయి. భారత రోడ్లకు తగినట్లు కొన్ని మార్పులు అవసరమవుతాయి – సస్పెన్షన్, క్లైమేట్ కంట్రోల్, మైల్డ్ కూలింగ్ వంటి అంశాలు దీనిలో ఉంటాయి.

- మరి మస్క్ తప్పేం చేశాడు?

ఒకవేళ లాభాల దాహంతో టెస్లా ఇక్కడ డబుల్ ధర పెట్టినట్లైతే, అది తప్పకుండా తప్పు. కానీ టెస్లా ఇప్పటివరకూ భారతదేశానికి ప్రత్యేక మాన్యుఫాక్చరింగ్ ప్లాంట్ లేదన్నదే నిజం. మాస్టర్ ప్లాన్ ప్రకారం ముంబైలో లేదా తమిళనాడులో పరిశ్రమ ఏర్పాటుకు ప్రయత్నాలు జరుగుతున్నాయి. ఈ నేపథ్యంలో కంపెనీ CBU (Completely Built Unit) వాహనాలను దిగుమతి చేస్తోంది. అంటే పూర్తిగా తయారైన కార్లను భారత్‌కు తరలిస్తోంది. దీని వల్ల ధరలు భారీగా పెరిగిపోతున్నాయి. ఇది మస్క్‌కు నేరుగా సంబంధించింది కంటే ఎక్కువగా, భారత దిగుమతి విధానాలపై ఆధారపడి ఉంది.

భారత రోడ్లకు టెస్లా సరిపోతుందా?

భారత రహదారులు, ట్రాఫిక్ పరిస్థితులు, వర్షాలు, గుంతలు.. ఇవన్నీ టెస్లా కార్ల లగ్జరీ డ్రైవింగ్‌కు ఎంతవరకు సరిపోతాయనేది సందేహాస్పదం. టెస్లా కార్లు సాధారణంగా లో గ్రౌండ్ క్లియరెన్స్ కలిగి ఉంటాయి, ఇది భారత రోడ్లపై సమస్యగా మారవచ్చు. రీజనల్ సర్వీస్ సెంటర్లు లేకపోవడం వల్ల విక్రయానంతర సేవలు కూడా సవాలుగా మారవచ్చు. కానీ టెక్నాలజీ పరంగా టెస్లా ఒక ఆటో పయనాన్ని పరివర్తనం చేసే కార్ అనే విషయంలో ఎలాంటి సందేహం లేదు.

టెస్లా ధరలు ఇప్పుడు పెద్ద చర్చకు దారి తీస్తున్నాయి. నిజమే, రెండు రెట్లు ధర పలకడం సాధారణ వినియోగదారుడికి చుక్కలు చూపించడమే. కానీ దీని వెనక వాణిజ్య రాజకీయాలు, ప్రభుత్వ విధానాలు, దిగుమతి వ్యవస్థలు ఉన్నాయనేది గుర్తుంచుకోవాలి. ఎలాన్ మస్క్‌ని నేరుగా టార్గెట్ చేయడం మితిమీరిన విమర్శ అవుతుందేమో కూడా ఆలోచించాలి.

భవిష్యత్‌లో భారతదేశంలో టెస్లా మాన్యుఫాక్చరింగ్ యూనిట్ వస్తే, ఖచ్చితంగా ధరలు తగ్గే అవకాశం ఉంది. అప్పటివరకు ఈ కార్లు లగ్జరీ, షోకేస్ సెగ్మెంట్‌కే పరిమితమవుతాయనేది స్పష్టమైంది. టెస్లా కార్లు భారత మార్కెట్లో మరింత అందుబాటులోకి రావాలంటే, దిగుమతి సుంకాల తగ్గింపు లేదా దేశీయ ఉత్పత్తిని ప్రోత్సహించడం ఎంత అవసరమో ఇది చూపిస్తుంది.