మళ్లీ పుస్తకాల వైపు స్వీడన్ అడుగులు.. కారణం తెలిస్తే షాక్ అవ్వాల్సిందే..

విద్యా వ్యవస్థలో మనం చేసే ప్రతి మార్పు ప్రగతిశీలంగా అనిపించినా, దాని ఫలితాలు క్షేత్రస్థాయిలో ఎలా ఉంటాయో తెలుసుకోవడానికి స్వీడన్ అనుభవం పెద్ద గుణపాఠం. ప్రపంచమంతా డిజిటల్ బాట పడుతుంటే, డిజిటల్ విద్యలో అగ్రగామిగా ఉన్న స్వీడన్ ఇప్పుడు మళ్లీ ‘వెనక్కి’ వెళ్తూ పుస్తకాలను ఆశ్రయించడం సంచలనంగా మారింది.

$120 మిలియన్లతో మళ్లీ పుస్తకాల వైపు..

2009లో స్వీడన్ ఒక సాహసోపేతమైన నిర్ణయం తీసుకుంది. భవిష్యత్తు అంతా టెక్నాలజీదే అని నమ్మి, పాఠ్యపుస్తకాల స్థానంలో ల్యాప్‌టాప్‌లు, టాబ్లెట్లను ప్రవేశపెట్టింది. కానీ 15 సంవత్సరాల తర్వాత, ఆ ప్రయోగం ఊహించిన ఫలితాలను ఇవ్వలేదని దేశం గుర్తించింది. విద్యార్థుల్లో పఠన సామర్థ్యం తగ్గడం, దృష్టి మళ్లడం వంటి సమస్యలు రావడంతో, ఇప్పుడు €104 మిలియన్లు (సుమారు $120 మిలియన్లు) వెచ్చించి పుస్తకాలను తరగతి గదుల్లోకి తీసుకువస్తుంది.

స్వీడన్ గమనించిన లోపాలు

డిజిటల్ తరగతి గదుల వల్ల ఆధునీకరణ జరిగినప్పటికీ, విద్యార్థుల మేధో వికాసంపై కొన్ని ప్రతికూల ప్రభావాలు కనిపించాయి. స్క్రీన్ మీద చదవడం వల్ల విద్యార్థులు సమాచారాన్ని కేవలం పైపైన చూస్తున్నారే తప్ప, లోతుగా అర్థం చేసుకోవడం లేదని పరిశోధనల్లో తేలింది. ల్యాప్‌టాప్‌లు ఉన్నచోట కేవలం పాఠాలే ఉండవు. సోషల్ మీడియా, గేమ్స్, ఇంటర్నెట్ బ్రౌజింగ్ వంటివి విద్యార్థుల శ్రద్ధ, ఏకాగ్రతను దెబ్బ తీస్తున్నాయి. కీబోర్డ్ వాడకం పెరగడంతో చేతితో రాసే అలవాటు తప్పింది. ఇది మెదడు పనితీరుపై, జ్ఞాపకశక్తిపై ప్రభావం చూపుతుందని నిపుణులు హెచ్చరించారు.

బ్యాక్‌లిట్ స్క్రీన్ల ప్రభావం

స్వీడిష్ నేషనల్ ఇనిస్టిట్యూట్ ఆఫ్ ఎడ్యుకేషన్ నిపుణులు చెప్పినట్లుగా, బ్యాక్‌లిట్ స్క్రీన్ల వైపు నిరంతరం చూడడం వల్ల ఏకాగ్రత దెబ్బతింటుంది. పుస్తకం చదివేటప్పుడు ఉండే 'నిశ్శబ్ద అభ్యాసం' స్క్రీన్ల దగ్గర సాధ్యం కావడం లేదు. ‘పుస్తకాలు ఒక స్పర్శ అనుభవాన్ని అందిస్తాయి. పేజీలు తిప్పడం, అండర్ లైన్ చేయడం వంటి పనులు జ్ఞాపకశక్తిని పెంచుతాయి. స్క్రీన్లు ఈ అనుభవాన్ని ఇవ్వలేవు.’ అని డాక్టర్ ఎరిక్ ఆండర్సన్ తెలిపారు.

పూర్తిగా దూరం కాదు..

స్వీడన్ ప్రభుత్వం టెక్నాలజీని పూర్తిగా నిషేధించడం లేదు. విద్యాశాఖ మంత్రి లీనా జోహన్సన్ చెప్పినట్లుగా, టెక్నాలజీ అనేది ఒక అదనపు సాధనంగా ఉండాలి తప్ప, ప్రాథమిక విద్యా పునాదిని (పుస్తకాలను) భర్తీ చేయకూడదు అని భావిస్తున్నట్లు చెప్పారు. ప్రధాన సబ్జెక్టుల కోసం కాగితపు పుస్తకాలను తిరిగి తీసుకురావడానికి ఈ నిధులను వాడుతున్నారు. డిజిటల్ నైపుణ్యాలను నేర్పిస్తూనే, నేర్చుకునే ప్రక్రియను పుస్తకాల ద్వారానే కొనసాగించడం స్వీడన్ ఇప్పడు ఎంచుకున్న మార్గం.

మన దేశానికి ఇస్తున్న మెసేజ్..?

మన దేశంలో కూడా ప్రస్తుతం 'డిజిటల్ ఇండియా' పేరుతో పాఠశాలల్లో ట్యాబ్లెట్లు, స్మార్ట్ క్లాసుల హడావిడి పెరుగుతోంది. స్వీడన్ అనుభవం మనకు ఇచ్చే మెసేజ్ ఏంటంటే.. టెక్నాలజీ ఎంత గొప్పదైనా, విద్యార్థి మెదడు వికాసానికి పుస్తకం, పెన్ను ఇచ్చే సహకారం వెలకట్టలేనిది. స్వీడన్ లాంటి సంపన్న దేశమే $120 మిలియన్లు వెచ్చించి తప్పు సరిదిద్దుకుంటున్నప్పుడు, మనం కూడా డిజిటల్ విద్యపై అతిగా ఆధారపడకుండా సమతుల్యత పాటించాల్సిన అవసరం ఉంది.