అంత తొందరెందుకు: అయోధ్య 'దోపిడీ'పై సుప్రీం వ్యాఖ్యలు
దేశాన్ని కుదిపేస్తున్న ఉత్తరప్రదేశ్లోని అయోధ్య రామమందిరం విరాళాల దోపిడీ వ్యవహారంపై సుప్రీం కోర్టు సంచలన వ్యాఖ్యలు చేసింది.
దేశాన్ని కుదిపేస్తున్న ఉత్తరప్రదేశ్లోని అయోధ్య రామమందిరం విరాళాల దోపిడీ వ్యవహారంపై సుప్రీం కోర్టు సంచలన వ్యాఖ్యలు చేసింది. ఈ కేసును అంత అత్యవసరంగా విచారించాల్సిన అవసరం లేదని పేర్కొంది. అంతేకాదు.. ``ఇప్పటికిప్పుడు ఈ కేసు విచారణకు తీసుకోకపోయినా.. ఎలాంటి నష్టం లేదని.. మిన్ను విరిగి మీద పడదు`` అని వ్యాఖ్యానించడం గమనార్హం. ఈ కేసును వచ్చే నెలలో విచారణకు స్వీకరిస్తామని తెలిపింది.
ఏంజరిగింది?
అయోధ్య రామమందిరంలో గత ఏడాది నవంబరు నుంచి ఈ ఏడాది మార్చి మధ్య భక్తులు సమర్పించిన కోట్ల రూపాయల విరాళాలు, కిలోల కొద్దీ నగల వ్యవహారంలో అవకతవకలు జరిగాయని స్థానిక ఎంపీ ఆరోపించారు. దీంతో తొలుత దీనిని రాజకీయంగానే చూసినా.. ఆ తర్వాత బీజేపీ ఎంపీలు కూడా ఇదే విషయాన్ని ఢిల్లీ వరకు తీసుకువెళ్లారు. దీంతో యూపీ ప్రభుత్వం విచారణకు ఆదేశించింది. రంగంలోకి దిగిన ప్రత్యేక దర్యాప్తు బృందం అధికారులు అన్ని విషయాలు సేకరిస్తున్నారు.
ఈ నెల 5నే రామజన్మభూమి ట్రస్టుకు దోపిడీ వ్యవహారం తెలుసునని.. ఇంటి దొంగలే ఈ ఉదంతానికి వడి గట్టారని అధికారులు గుర్తించారు. మొత్తంగా విరాళాలు లెక్కించే సిబ్బందిలో అనుకల్ప్ మిశ్ర సహా.. 8 మందిని అదుపులోకి తీసుకుని విచారించారు. ఈ దోపిడీ ఇప్పటిది కాదని కూడా గుర్తించారు. దాదాపు ఆరు మాసాలుగా జరుగుతోందని.. ట్రస్టుకు కూడా ఈ విషయం తెలుసునని.. అయినా మౌనంగా ఉందని అధికారులే చెబుతున్నారు.
ఈ వ్యవహారంలో పెద్ద తలకాయలను కాపాడే ప్రయత్నం చేస్తున్నారన్న విమర్శలు వస్తున్నాయి. ఈ క్రమంలో అయోధ్యకు చెందిన ఓ వ్యక్తి సుప్రీంకోర్టులో పిటిషన్ వేశారు. ఈ కేసును స్వతంత్ర దర్యాప్తు సంస్థకు అప్పగించాలని.. రాష్ట్ర ప్రభుత్వ ప్రమేయం ఉన్న వారిని తప్పించాలని కోరారు. అదేసమయం లో నిర్ణీత సమయంలోగా విచారణను పూర్తి చేసేలా ఆదేశించాలని కూడా విన్నవించారు., ఈ క్రమంలో ఈ పిటిషన్ను అత్యవసరంగా విచారించాలని కోర్టును అభ్యర్థించారు.
అయితే.. సుప్రీంకోర్టు ఈ విన్నపాన్ని తోసిపుచ్చింది. అంత అత్యవసరంగా కేసును విచారించాల్సిన అవసరం లేదని స్పష్టం చేసింది. ముందు రాష్ట్ర ప్రభుత్వ అధికారులు విచారణ చేస్తున్న నేపథ్యంలో దీనిపై అంత తొందర ఎందుకని ప్రశ్నించింది. వేసవి సెలవుల అనంతరం(ఆగస్టు) కేసును విచారణకు తీసుకుంటామని వ్యాఖ్యానించడం గమనార్హం.