పొలిటికల్ హీట్: గవర్నర్ నుంచి డిగ్రీ తీసుకోవడానికి విద్యార్థిని నిరాకరణ..వీడియో
| తమిళనాడులోని రాజకీయాలు ఎంత వేడెక్కాయో తెలియజేసే ఒక అరుదైన ఘటన మంగళవారం మనోన్మణియం సుందరనార్ విశ్వవిద్యాలయం స్నాతకోత్సవంలో చోటుచేసుకుంది.
తమిళనాడులోని రాజకీయాలు ఎంత వేడెక్కాయో తెలియజేసే ఒక అరుదైన ఘటన మంగళవారం మనోన్మణియం సుందరనార్ విశ్వవిద్యాలయం స్నాతకోత్సవంలో చోటుచేసుకుంది. రాష్ట్ర గవర్నర్ ఆర్.ఎన్. రవి చేతుల మీదుగా డిగ్రీ తీసుకోవడానికి ఒక విద్యార్థిని నిరాకరించడం ఇప్పుడు రాష్ట్రవ్యాప్తంగా చర్చనీయాంశంగా మారింది. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.
మనోన్మణియం సుందరనార్ విశ్వవిద్యాలయంలో పట్టభద్రులైన విద్యార్థులకు గవర్నర్ ఆర్.ఎన్. రవి డిగ్రీ పట్టాలు అందిస్తున్నారు. ఈ క్రమంలో జీన్ జోసెఫ్ అనే విద్యార్థిని పేరు పిలిచినప్పుడు, ఆమె గవర్నర్‌ను పట్టించుకోకుండా, పక్కనే ఉన్న వైస్ ఛాన్సలర్ చంద్రశేఖర్ నుంచి తన డిగ్రీని తీసుకుంది. గవర్నర్ చేతుల మీదుగా డిగ్రీ తీసుకోవడానికి ఆమె బహిరంగంగా నిరాకరించిన దృశ్యం వీడియోలో స్పష్టంగా కనిపించింది. ఇది గవర్నర్-రాష్ట్ర ప్రభుత్వాల మధ్య నెలకొన్న విభేదాలను మరోసారి హైలైట్ చేసింది.
రాజకీయాల జోక్యం
ఈ ఘటనలో నిరసన తెలిపిన విద్యార్థిని జీన్ జోసెఫ్, డి.ఎం.కె (DMK) పార్టీకి చెందిన నాగర్‌కోయిల్ డిప్యూటీ సెక్రటరీ ఎం. రాజన్ భార్యగా గుర్తించబడింది. దీంతో ఇది కేవలం ఒక విద్యార్థిని చర్య మాత్రమే కాదని, దీని వెనుక రాజకీయ ఉద్దేశాలు ఉన్నాయని రాజకీయ విశ్లేషకులు అభిప్రాయపడుతున్నారు. రాష్ట్రంలో ప్రభుత్వం, గవర్నర్ మధ్య గత కొంతకాలంగా కొనసాగుతున్న వివాదాలను ఈ ఘటన ప్రతిబింబిస్తోందని వారు పేర్కొంటున్నారు.
గవర్నర్-ప్రభుత్వం మధ్య వివాదాలు
గతంలో తమిళనాడు రాష్ట్ర శాసనసభ ఆమోదించిన కొన్ని బిల్లులను గవర్నర్ ఆర్.ఎన్. రవి తన వద్దే నిలిపివేయడం, వాటిని ప్రభుత్వం తిరిగి సమీక్షకు పంపకపోవడంతో ఈ వివాదం మొదలైంది. ఇది రాష్ట్ర ప్రభుత్వానికి, గవర్నర్‌కి మధ్య తీవ్ర ఉద్రిక్తతకు దారితీసింది. 2023లో ఈ వివాదం సుప్రీంకోర్టు వరకు కూడా వెళ్ళింది. రెండోసారి ఆమోదించిన బిల్లులను కూడా గవర్నర్ నిలిపివేయడాన్ని సుప్రీంకోర్టు రాజ్యాంగ విరుద్ధమని స్పష్టం చేసింది. ఈ నేపథ్యంలో, జీన్ జోసెఫ్ చేసిన నిరసన గవర్నర్ విధానాలను వ్యతిరేకిస్తున్న ప్రభుత్వ వైఖరికి మద్దతుగా భావించవచ్చు. ఈ సంఘటన రాష్ట్రంలో రాజకీయ విభేదాలను మరోసారి ప్రజల దృష్టికి తెచ్చింది.