AI దాహం తీరనిది.. భరించడం కష్టం

ప్రపంచం ప్రస్తుతం ఆర్టిఫిషియల్ ఇంటెలిజెన్స్ (AI) అనే విప్లవం వెంట పరుగులు తీస్తోంది. దీని వల్ల ఎన్నో లాభాలు, ఆవిష్కరణలు ఉన్నప్పటికీ, దీనికి సంబంధించిన ఒక పెద్ద సమస్య ఇప్పుడు చర్చనీయాంశమైంది. అదే భారీ విద్యుత్ వినియోగం.

* ఏఐ డేటా సెంటర్ల దాహం

జోహో వ్యవస్థాపకుడు, చీఫ్ సైంటిస్ట్ శ్రీధర్ వేంబు ఈ సమస్యపై ఇటీవల తీవ్ర ఆందోళన వ్యక్తం చేశారు. ప్రస్తుతమున్న అత్యాధునిక AI వ్యవస్థలు అత్యంత శక్తి సామర్థ్యం లేనివి అని ఆయన అభిప్రాయపడ్డారు.

AI అప్లికేషన్లు, మోడళ్లకు శిక్షణ ఇవ్వడానికి, వాటిని నడపడానికి భారీ డేటా సెంటర్లు అవసరం. ఈ సెంటర్లలోని గ్రాఫిక్స్ ప్రాసెసింగ్ యూనిట్లు (GPUs) నిరంతరం పనిచేయడానికి, వాటిని చల్లబరచడానికి ఊహించని స్థాయిలో విద్యుత్ అవసరం అవుతుంది.

దీనికి ఉదాహరణగా అమెరికాలోని ఏథెన్స్, జార్జియా ప్రాంతంలో కొత్త AI డేటా సెంటర్ల కారణంగా 2023 నుంచి విద్యుత్ బిల్లులు 60% వరకు పెరిగిన విషయాన్ని శ్రీధర్ వేంబు ఉదహరించారు.

* భారత్‌కు పెను సవాల్

ఈ సమస్య భారతదేశం వంటి దేశాలకు మరింత పెద్ద సవాల్‌గా మారుతుందని వేంబు హెచ్చరించారు. AI కోసం భారీగా విద్యుత్‌ను మళ్లించడం వల్ల సాధారణ గృహాలు , పరిశ్రమల విద్యుత్ సరఫరాకు ఆటంకం కలుగుతుంది. కరెంట్ కోతలు పెరుగుతాయి, కరెంటు ఛార్జీలు పెరిగే ప్రమాదం ఉంది.

"మనం GPUs కొనగలిగినా (కుదరకపోయినా), ఆ ఎలక్ట్రిసిటీ బిల్లును భరించలేం" అని ఆయన స్పష్టం చేశారు. భారతదేశంలో శక్తి వనరుల లభ్యత, సరఫరా వ్యవస్థలపై ఉన్న ఒత్తిడిని దృష్టిలో ఉంచుకుంటే, ఈ ఖర్చు భరించడం కష్టం.

గ్రిడ్‌పై ఒత్తిడి

భారతదేశ డేటా సెంటర్ సామర్థ్యం 2030 నాటికి 5 GW (గిగావాట్స్) వరకు పెరగవచ్చని అంచనా. కేవలం AI వర్క్‌లోడ్‌లు మాత్రమే ఏటా 40-50 టెరావాట్-గంటలు (TWh) విద్యుత్‌ను వినియోగించే అవకాశం ఉంది. ఈ భారీ డిమాండ్‌ను తీర్చడానికి పవర్ గ్రిడ్లపై తీవ్ర ఒత్తిడి పడుతుంది.

* పరిష్కారం ఏమిటి?

AI అభివృద్ధిని ఆపడం పరిష్కారం కాదు. మరి ఈ శక్తి సంక్షోభాన్ని నివారించాలంటే ఏం చేయాలన్నది ఆలోచించాలి. మనం విస్తృతమైన శక్తి సామర్థ్యం గల AIని సృష్టించాలి" అని శ్రీధర్ వేంబు పిలుపునిచ్చారు. దీనికి AI యొక్క కంప్యూటేషనల్ అంశాన్ని మూలాల నుండి పునరాలోచించాల్సిన అవసరం ఉందని ఆయన సూచించారు.

మౌలిక సదుపాయాల మెరుగుదల

డేటా సెంటర్ల కోసం పెరుగుతున్న డిమాండ్‌ను తట్టుకునేలా దేశీయ పవర్ గ్రిడ్లు , పునరుత్పాదక ఇంధన వనరుల విస్తరణ వేగవంతం కావాలి. AI అనేది ప్రపంచాన్ని మార్చబోయే శక్తి. అయితే, ఆ శక్తికి అవసరమైన ఇంధనాన్ని సుస్థిరమైన మార్గంలో అందించడం అనేది ప్రభుత్వాలు, టెక్ కంపెనీలు కలిసి పరిష్కరించాల్సిన అతిపెద్ద సమస్యగా ముందు నిలిచింది.