ఒక్కతే నిలబడింది... పోలీసు వ్యాన్‌నే ఆపింది.. ముంబై యువతి ధైర్యానికి దేశమంతా సలామ్

న్యాయం కోసం ప్రశ్నించే గొంతుకను నొక్కేయాలని చూసిన చోట... ఒక యువతి చూపిన అపారమైన ధైర్యం ఇప్పుడు దేశవ్యాప్తంగా కోట్ల మంది హృదయాలను కదిలిస్తోంది. భవిష్యత్తు కోసం, తమ హక్కుల కోసం వీధుల్లోకి వచ్చిన విద్యార్థులపై నిర్బంధం పడగ విప్పిన వేళ... "నేనున్నాను" అంటూ ఓ సాధారణ యువతి నిలబడిన తీరు ప్రతీ ఒక్కరినీ భావోద్వేగానికి గురిచేస్తోంది.

ఆ ఒక్క అడుగు... ప్రజాస్వామ్యానికి ప్రాణం

నీట్ సహా జాతీయ స్థాయి పోటీ పరీక్షల్లో జరిగిన అక్రమాలకు వ్యతిరేకంగా దేశవ్యాప్తంగా నిరసన జ్వాలలు ఎగిసిపడుతున్నాయి. భవిష్యత్తు అంధకారమౌతోందని ఆవేదన చెందుతూ ముంబైలోని శివాజీ పార్క్ వద్ద శాంతియుతంగా నిరసన తెలుపుతున్న విద్యార్థులను పోలీసులు అదుపులోకి తీసుకున్నారు. ఊపిరాడని రీతిలో నిలబడేందుకు కూడా స్థలం లేని ఒక పోలీసు వ్యాన్‌లో విద్యార్థులను తరలిస్తున్నారు.

ఆ సమయంలో దాదర్ వీధి గుండా నడుచుకుంటూ వెళ్తున్న 27 ఏళ్ల మోడల్ రియా అహిర్ కంట ఆ దృశ్యం పడింది. రేపటి పౌరులను, తమ హక్కుల కోసం పోరాడుతున్న విద్యార్థులను ఆ స్థితిలో చూసి ఆమె మనసు తల్లడిల్లింది. మరుక్షణమే ఏమాత్రం ఆలోచించకుండా ఖాకీల ప్రతిఘటనను లెక్కచేయకుండా నేరుగా వెళ్లి ఆ పోలీసు వ్యాన్ ముందు అడ్డంగా నిలబడింది!

భయాన్ని జయించిన ధైర్యం!

"విద్యార్థులను ఇలా తరలించడం తప్పు" అంటూ ఆమె పోలీసులను నిలదీసింది. పక్కకు తప్పుకోవాలని పోలీసులు హెచ్చరించినా వ్యాన్‌ను ముందుకు కదిలించేందుకు ప్రయత్నించినా రియా అడుగు వెనక్కి పడలేదు. అధికార బలం ముందు ఆమె ఆక్రోశం, ఆవేదన, తిరుగుబాటు ప్రశ్నించే గొంతుకై నిలబడ్డాయి. ఆమె కళ్లలోని ఆవేశం, ధైర్యం పోలీసులను సైతం ఆలోచనలో పడేసాయి.

కన్నీళ్లు... చప్పట్లు... ఉప్పొంగిన నినాదాలు

ఆమె చూపిన అచంచలమైన ధైర్యానికి ఖాకీ వ్యవస్థ దిగిరాక తప్పలేదు. కాసేపటి వాగ్వాదం తర్వాత అదుపులోకి తీసుకున్న విద్యార్థులను పోలీసులు అక్కడికక్కడే విడుదల చేశారు. వ్యాన్ తలుపులు తెరుచుకుని బయటకు వచ్చిన విద్యార్థుల కళ్లలో కనిపించిన ఆనందం, రియాను చూసి వారు కొట్టిన చప్పట్లు, చేసిన నినాదాలు ఆ ప్రాంతాన్ని భావోద్వేగాల కాసారంగా మార్చేశాయి. ధైర్యానికి ప్రతిరూపంగా నిలిచిన రియాకు విద్యార్థులు అశ్రునయనాలతో, హృదయపూర్వకంగా కృతజ్ఞతలు తెలిపారు.

ఒక్కరి ధైర్యం... వెయ్యి మందికి ఊపిరి పోస్తుంది!

ప్రస్తుతం ఈ వీడియో సోషల్ మీడియాను ఊపేస్తోంది. నెటిజన్లు, సినీ ప్రముఖులు, సామాజిక కార్యకర్తలు రియా సాహసాన్ని వేనోళ్ల కొనియాడుతున్నారు. వ్యవస్థలోని లోపాలను ప్రశ్నించడానికి పదవులు, వేలాది మంది జనం అవసరం లేదని.. గుండెల్లో నిజాయితీ, ధైర్యం ఉంటే చాలని ఈ ఘటన నిరూపించింది. ఈ ఒక్క ఘటన దేశవ్యాప్తంగా పోరాడుతున్న విద్యార్థి లోకానికి కొండంత కొండంత బలాన్ని, ఆశను నూరిపోసింది.