టాలీవుడ్ స్పందించ‌దేమి? CM రేవంత్ అస‌హ‌నం!

ఈ ఏడాది జనవరి 31న రవీంద్రభారతిలో రాష్ట్ర ప్రభుత్వం తొలిసారిగా నిర్వహించిన అధికారిక గద్దర్ జయంతి వేడుకల్లో పాల్గొన్న సీఎం రేవంత్ రెడ్డి, తెలంగాణ ప్రభుత్వం గద్దర్ అవార్డులను ఏర్పాటు చేయనున్నట్టు ప్రకటించిన సంగతి తెలిసిందే. నంది అవార్డుల స్థానంలో తెలంగాణ ప్ర‌తిభ‌కు గ‌ద్ద‌ర్ అవార్డుల‌ను ఇచ్చేందుకు ప‌రిశ్ర‌మ సూచ‌న‌లు స‌ల‌హాలు కావాల‌ని కోరినా దానికి టాలీవుడ్ స్పందించ‌లేద‌ని సీఎం రేవంత్ నిరాశ‌ను వ్య‌క్తం చేసారు.

ఈ ఏడాది జనవరిలో ప్రతిష్టాత్మకమైన నంది అవార్డులను గద్దర్ అవార్డులతో భర్తీ చేయాలని కాంగ్రెస్ ప్రభుత్వం తీసుకున్న నిర్ణయాన్ని ముఖ్య‌మంత్రి మ‌రోసారి ప్రకటించారు. ఈ కొత్త ప్రయత్నాన్ని ఎలా సమర్థవంతంగా అమలు చేయాలనే దానిపై అభిప్రాయాన్ని, సలహాలను అందించాలని తెలుగు చిత్ర పరిశ్రమను ఆయ‌న‌ కోరారు. దీనికోసం పిలుపునిచ్చినప్పటికీ, సినీ పరిశ్రమ మౌనంగా ఉండటంతో ముఖ్యమంత్రి ఆందోళనను వ్య‌క్తం చేసారు. తాను నిరాశ చెందాన‌ని అన్నారు. తెలుగు చిత్ర పరిశ్రమలో చేసిన సేవలను, విజయాలను గౌరవించే విధంగా గద్దర్ అవార్డులను ప్రకటించామని, అయితే పరిశ్రమ పెద్దల నుంచి ఎలాంటి స్పందన లేకపోవటం నిరుత్సాహకరమని రేవంత్ రెడ్డి వ్యాఖ్యానించారు. సోమవారం రవీంద్రభారతిలో ప్రముఖ తమిళ రచయిత, ఉద్యమకారుడు శివశంకరికి ''విశ్వంభర డాక్టర్‌ సి. నారాయణరెడ్డి జాతీయ సాహిత్య పురస్కారం'' అందజేసేందుకు ఏర్పాటు చేసిన కార్యక్రమంలో రేవంత్‌రెడ్డి మాట్లాడారు.

తెలుగు సినిమా, రంగస్థలం, టెలివిజన్ రంగాల్లో అత్యుత్తమ ప్రతిభ కనబరిచినందుకు గానూ గతంలో ఐక్య ఆంధ్రప్రదేశ్‌లో ప్రదానం చేసిన నంది అవార్డులను 2023 ఆగస్టులో మరణించిన తెలంగాణ విప్లవ గాయకుడికి నివాళులు అర్పిస్తూ గద్దర్ పేరు పెట్టనున్నట్లు రేవంత్ రెడ్డి వెల్లడించారు. గద్దర్ అవార్డులను మన సినిమా వారసత్వానికి సంబంధించిన నిజమైన వేడుకగా మార్చడానికి చిత్రనిర్మాతలు, నటీనటులు, ఇతర ప్ర‌ముఖులు కలిసికట్టుగా రావాల‌ని తాను కోరిన‌ట్టు తెలిపారు. అయితే తెలుగు చిత్ర పరిశ్రమ నుంచి ఇప్పటి వరకు ఎలాంటి స్పందన లేదు. వాళ్లు ఎందుకు మౌనంగా ఉంటారో నాకు తెలియదు. ఈ కార్యక్రమం విజయవంతం కావడానికి వారి స‌ల‌హాలు సూచ‌న‌లు కీలకం. వారి మౌనం నిరాశపరిచింది.. అని రేవంత్ అన్నారు. తెలుగు చలనచిత్ర పరిశ్రమ వారి ప్రతిపాదనలతో ముందుకు రావాలని కోరారు.