భారత పీఎమ్ నిద్ర అలవాటు అందరికీ పనికొస్తుందా?.. నిజం ఏంటంటే?

ప్రధాని నరేంద్ర మోదీ రోజుకు కేవలం 3 నుంచి 3.5 గంటలు మాత్రమే నిద్రపోతానని పలు సందర్భాల్లో తెలిపారు. అంత తక్కువ సమయం నిద్రపోయినా ఆయన రోజంతా ఎంతో ఉత్సాహంగా పనులు పూర్తి చేయడం అందరినీ ఆశ్చర్యానికి గురిచేస్తుంటుంది. అయితే, మోదీలాగే తక్కువ సమయం నిద్రపోవడం సగటు మనిషి ఆరోగ్యానికి మంచిదేనా? అందరూ ఈ అలవాటును అనుసరించవచ్చా అనే సందేహాలపై వైద్య నిపుణులు ఆసక్తికరమైన నిజాలను వెల్లడిస్తున్నారు.

తక్కువ నిద్ర అందరికీ సరిపోతుందా?:

ప్రధాని మోదీలా రోజుకు 3 గంటల నిద్ర అందరికీ సరిపోతుందా అంటే కాదనే సమాధానమే వినిపిస్తోంది. సాధారణంగా ఒక సగటు మనిషి శారీరక, మానసిక ఆరోగ్యం బాగుండాలంటే రోజుకు కనీసం 7 నుంచి 8 గంటల ప్రశాంతమైన నిద్ర అవసరం. ఇక పెద్దలు 7-9 గంటలు, పిల్లలు 8-9 గంటలు నిద్రపోవాలని వైద్యులు స్పష్టం చేస్తున్నారు. నిద్ర సరిగ్గా లేకపోతే శరీరంలో అలసట పెరిగిపోవడమే కాకుండా, ఏకాగ్రత లోపించడం, రక్తపోటు, ఇతర తీవ్రమైన ఆరోగ్య సమస్యలు తలెత్తే ప్రమాదం ఉంది.

మోదీకి తక్కువ నిద్ర ఎలా సాధ్యం?:

నిత్యం ఎంతో బిజీగా ఉండే మోదీ అంత తక్కువ సమయం నిద్రపోయినా పూర్తి శక్తితో పనిచేయడానికి ఆయన జీవనశైలే కారణమని ఆరోగ్య నిపుణులు చెబుతున్నారు. క్రమం తప్పకుండా చేసే యోగా, ధ్యానం మరియు ఆరోగ్యకరమైన ఆహార అలవాట్లు ఆయన మనస్సును, శరీరాన్ని ఎప్పుడూ ప్రశాంతంగా ఉంచుతాయి. ఇక దీనివల్ల తక్కువ సమయంలోనే ఆయన శరీరం రీఛార్జ్ అవుతుంది. అంతేకాకుండా సాధారణంగా వయసు పైబడిన కొద్దీ సహజంగానే నిద్రపోయే సమయం కాస్త తగ్గుతుంది.

తక్కువ నిద్రవల్ల వచ్చే ముప్పులు:

మోదీని చూసి ప్రయోగంగా తక్కువ నిద్రపోవడం ప్రారంభిస్తే ఆరోగ్యం దెబ్బతినే అవకాశం ఉంది. ప్రతి ఒక్కరి శరీర తత్వం, జీవన విధానం వేర్వేరుగా ఉంటాయి. ఇక కంటినిండా నిద్ర లేకపోతే జీర్ణక్రియ మందగించడం, మానసిక ఒత్తిడి పెరగడం, గుండె సంబంధిత సమస్యలు రావడం వంటి తీవ్రమైన పరిణామాలు ఎదురవుతాయి. శరీరం సరిగ్గా పనిచేయడానికి మరియు రోగనిరోధక శక్తి మెరుగ్గా ఉండటానికి తగినంత నిద్ర అత్యంత అవసరం.

ప్రధాని మోదీ పాటించే ప్రత్యేకమైన యోగా, ప్రశాంతమైన జీవనశైలి వల్ల ఆయనకు తక్కువ నిద్ర సరిపోవచ్చు. కానీ ప్రతి ఒక్కరికీ ఇది సాధ్యం కాదు. శారీరక పునరుజ్జీవనానికి రోజుకు 7 నుండి 8 గంటల ప్రశాంతమైన నిద్ర అవసరం. కాబట్టి ఇతరులను గుడ్డిగా అనుకరించకుండా మన శరీర అవసరాలకు అనుగుణంగా తగినంత నిద్రపోవడమే ఆరోగ్యానికి అసలైన సూత్రం.