పవన్ వ్యూహం కరెక్టేనా...?

ఏపీలో రెండు పార్టీల కధ దశాబ్దాలుగా సాగుతోంది. జనాలు మూడవ ఆల్టర్నేషన్ కోసం చూస్తున్నారు. మాజీ సీఎం చంద్రబాబు జైలులో ఉన్నారు. ఆయన మీద అవినీతి ఆరోపణలు ఉన్నాయన్న కారణం మీదనే కేసు ఫైల్ చేశారు. కోర్టు రిమాండ్ విధించింది. ఈ విషయంలో కోర్టు తీర్పు ఎలా వస్తుంది అన్నది చూడాల్సి ఉంది. అదే విధంగా చూస్తే జగన్ ఆస్తుల విషయంలో కూడా సీబీఐ కేసులు పెట్టింది. అవి కోర్టు విచారణలో ఉన్నాయి. జగన్ సైతం జైలులో పదహారు నెలల పాటు ఉన్నారు.

ఇక్కడ లీగల్ టెర్మినాలజీలో చూస్తే జగన్ కానీ చంద్రబాబు కానీ దోషులు కారు, వారు నిందితులు మాత్రమే. వారి మీద ఆరోపణలు వచ్చాయి. అవి న్యాయస్థానాలు నిగ్గుతేలుస్తాయి. అయితే అవినీతి ఆరోపణల మీద ఇద్దరు నాయకుల మీద కేసులు ఉన్నపుడు సమ దూరం పాటించి మూడవ పార్టీగా జనం ముందుకు రావాల్సిన అవసరం అవకాశం జనసేనకు మాత్రమే ఉన్నాయి.

ఆ పార్టీ అయితే ఈ కీలకమైన తరుణంలో చేయాల్సింది అదే అని రాజకీయం ఎరిగిన వారు చెప్పే మాట. అయితే పవన్ మాత్రం జగన్ని మాత్రమే అవినీతిపరుడు అంటున్నారు. చంద్రబాబుని వెనకేసుకుని వస్తున్నారు. బాబు కడిగిన ముత్యమని చెబుతున్నారు. అది అభిమానంతో చెప్పే మాట కావచ్చు. కానీ రేపు న్యాయస్థానాలలో అదే మాట చెబితే కచ్చితంగా పవన్ ఆయనను అభినందించవచ్చు.

అంతవరకూ సమదూరం పాటించాల్సి ఉండాల్సింది అని అంటున్న వారూ ఉన్నారు. ఎందుకంటే జనసేన కొత్తగా పుట్టిన పార్టీ అధికారంలో ఎపుడూ లేవు, అవినీతి మరకలు పవన్ మీద ఎక్కడా లేవు. అలాంటిది జనసేన టీడీపీతో పొత్తు అని ప్రకటించడం వెనక వ్యూహాత్మకమైన ఎత్తుగడ ఏమిటి అన్న చర్చ మొదలైంది.

నిజానికి చూస్తే చంద్రబాబు విషయంలో మొదటి నుంచి పవన్ కళ్యాణ్ సానుకూలంగా ఉన్నారు. బాబును మంచి అడ్మినిస్ట్రేటర్ అని కూడా చెబుతూ వస్తున్నారు. ఒక రాజకీయ పార్టీ ఎవరైనా పెట్టినపుడు తామే గొప్ప పాలన అందిస్తామని చెప్పాలి. అంతకు ముందు వారు ఎవరైనా మంచిగా పాలించినా కూడా తమ పాలనే భేష్ అని చెప్పుకోవాలి. తామే మంచి పాలనను ఇస్తామని చెప్పాలి.

అపుడే రాజకీయాల్లో రాణిస్తారు. అంతే తప్ప వేరొక నాయకుడి మీద ఆరాధనాభావంతో ఉంటూ మాట్లాడితే సొంత పార్టీఎలా ఎదుగుతుంది అన్నది మౌలికమైన ప్రశ్న. ఏపీలో జనసేన టీడీపీ పొత్తు వల్ల రెండు పార్టీలకు లాభం కలగవచ్చు. కానీ అధికారం మాత్రం టీడీపీకే దక్కుతుంది. చంద్రబాబు మాత్రమే ముఖ్యమంత్రి కాగలగరు. అపుడు జనసేన తరఫున సీఎం గా పవన్ని చూడాలనుకుంటున్న వారి సంగతి ఏమిటి అన్నది ఆలోచించాల్సి ఉంటుంది.

పవన్ మాదిరిగానే జగన్ దిగిపోవాలి అన్న ఒకే ఒక సూత్రాన్ని నమ్మిన వారు జనసేనలో అంతా ఉంటే ఈ పొత్తు నూరు పాళ్ళూ సాకారం అవుతుంది. అలా కాకుండా బాబే సీఎం అని చెబితే మా పవన్ కారా అని నిరాశ చెందే పరిస్థితులు ఉంటే ఇబ్బందులు వస్తాయి. ఏది ఏమైనా జనసేన టీడీపీ పొత్తు అన్నది బహిరంగ రహస్యంగా ఉంది. ఇపుడు అది బాహాటం అయింది అనే అంటున్నారు.

ఈ పొత్తుల వల్ల టీడీపీకి అయితే ఈ కీలకమైన సమయంలో కొండంత ఊరట లభించినట్లు అయింది. జనసేన టీడీపీ పొత్తు ఏపీలో బలమైన కూటమిగానే చూడాలి. ఒక విధంగా వైసీపీకి ఇది సవాల్ గానే ఉంటుంది. అంతమాత్రం చేత ఎన్నికల ఫలితాల ముందే ముందే అంచనాకు రావడమూ తప్పే అవుతుంది. ఏది ఏమైనా పవన్ వ్యూహాత్మకంగా కరెక్ట్ నిర్ణయం తీసుకున్నారా అన్నది మాత్రం ఒక ప్రశ్నగా చర్చగా ఇపుడు ముందుకు వస్తోంది. దీనికి జవాబు కాలమే చెప్పాల్సి ఉంటుంది.