చార్లీ కిర్క్ హత్య కు.. ‘ఆపరేషన్ సింధూర్’కు ఏంటీ సంబంధం?

అమెరికాలో జరిగిన చార్లీ కిర్క్ హత్య కేవలం ఒక నాయకుడి మృతికి మించినది. ఇది అమెరికా రాజకీయ దిశలో, కన్సర్వేటివ్ ఉద్యమంలో ఒక పెద్ద శూన్యాన్ని మిగిల్చిన సంఘటన. ట్రంప్‌కి అత్యంత సన్నిహితుడిగా, అమెరికా యువతలో గణనీయమైన ప్రభావం చూపిన కిర్క్ హత్య, దేశవ్యాప్తంగా ఆగ్రహావేశాలకు దారితీస్తోంది.

అయితే ఈ హత్య నేపథ్యంలో ఆయన గతంలో చేసిన వ్యాఖ్యలు ప్రత్యేకంగా భారత్–పాక్ మధ్య జరిగిన ‘‘ఆపరేషన్ సిందూర్’’పై ఆయన చేసిన కామెంట్స్ చర్చకు వస్తున్నాయి. మేలో పహల్గామ్ ఉగ్రదాడి తర్వాత ఉద్భవించిన ఉద్రిక్తతలపై కిర్క్ మాట్లాడిన తీరు, అమెరికా రాజకీయాల్లో అరుదుగా వినిపించే నిష్కపట ధోరణిని ప్రతిబింబించింది.

కిర్క్ మాటల్లో ‘‘ప్రతి సమస్య అమెరికా సమస్యేనా?’’ అన్న ప్రశ్న ఒక బలమైన సందేశం. అమెరికా ఎక్కడైతే జోక్యం చేసుకుంటుందో, అక్కడ పరిస్థితులు మరింత క్లిష్టతరమవుతాయన్న వాస్తవాన్ని ఆయన గుర్తు చేశారు. ఇది అమెరికన్ శక్తి, బాధ్యతల గురించి ఒక గంభీరమైన ఆత్మపరిశీలన అవసరమని సూచిస్తుంది.

ఇక భారత్–పాకిస్తాన్ సందర్భంలో ఆయన చేసిన వ్యాఖ్యలు రెండు దిశల్లో బరువైనవి. ఒకవైపు పాకిస్తాన్‌ను ‘‘చంచలమైన దేశం’’గా అభివర్ణిస్తూ, బిన్ లాడెన్‌కు అక్కడ ఆశ్రయం లభించిన వాస్తవాన్ని గుర్తు చేశారు. మరోవైపు భారత్‌లో హిందువుల ఆధిక్యం, కాశ్మీర్‌లో జరిగిన ఉగ్రదాదుల వెనుక మతపరమైన విభజనల వాస్తవాన్ని ఆయన ప్రస్తావించారు..

అణ్వాయుధ శక్తులు కలిగిన రెండు దేశాల మధ్య యుద్ధం జరిగితే, అది ప్రపంచానికి ముప్పు అనే అభిప్రాయం సాధారణంగా ఉండే సమయంలో, కిర్క్ మాత్రం అణుయుద్ధం సంభవించే అవకాశాలు లేవని చెప్పి మరింత వాస్తవికమైన అంచనాను వెలిబుచ్చారు.

చార్లీ కిర్క్ తన అభిప్రాయాలతో అమెరికా రాజకీయాల్లో ఒక విభిన్న స్వరంగా నిలిచారు. ఆయన మరణం అమెరికా కన్సర్వేటివ్ ఉద్యమానికి గట్టి దెబ్బ. కానీ ఆయన వేసిన ప్రశ్నలు, ముఖ్యంగా ‘‘ఆపరేషన్ సిందూర్’’ సందర్భంలో అమెరికా పాత్రపై ఆయన చూపిన దృక్పథం, దీర్ఘకాలికంగా ఆలోచించదగ్గవి.

భారత్–పాకిస్తాన్ ఉద్రిక్తతలు కేవలం దక్షిణాసియా సమస్య కాకుండా ప్రపంచానికి సంబంధించినవి. అయినప్పటికీ అమెరికా ప్రతిసారీ ముందుకు దూకాల్సిన అవసరం ఉందా అన్న సందేహం సరైనదే. ఈ ప్రశ్నకు సమాధానం అమెరికా భవిష్యత్‌ విదేశాంగ విధానాన్ని మాత్రమే కాదు, ప్రపంచ శాంతి దిశను కూడా ప్రభావితం చేస్తుంది.