'అమ్మ' ఫోన్ కోసం ప్రెస్ మీట్ ఆపేసిన నితీష్ రెడ్డి.. తెలుగు అభిమానుల హృదయాలను గెలుచుకున్న యువ క్రికెటర్

భారత యువ క్రికెటర్, సంచలన ఆల్ రౌండర్ నితీష్ కుమార్ రెడ్డి మరోసారి వార్తల్లో నిలిచాడు. అయితే ఈసారి ఆయన బ్యాట్‌తోనో బాల్‌తోనో చేసిన ప్రదర్శన వల్ల కాదు.. మైదానం వెలుపల జరిగిన ఒక చిన్న, మనసును హత్తుకునే సంఘటనతో సోషల్ మీడియాలో వైరల్ అవుతున్నాడు. ఆఫ్ఘానిస్తాన్‌పై భారత జట్టు అద్భుత విజయం సాధించిన అనంతరం జరిగిన అధికారిక ప్రెస్ కాన్ఫరెన్స్‌లో నితీష్ చూపించిన ఒక సాధారణ ప్రవర్తన ఇప్పుడు కోట్లాది మంది అభిమానుల మనసులను దోచుకుంటోంది.

లైవ్ ప్రెస్ మీట్‌లో ‘అమ్మ’ పిలుపు

సాధారణంగా అంతర్జాతీయ మ్యాచ్ ముగిసిన తర్వాత జరిగే మీడియా సమావేశాలు ఎంతో సీరియస్‌గా.. కఠినమైన నిబంధనలతో సాగుతుంటాయి. దేశ విదేశాల నుంచి వచ్చిన మీడియా ప్రతినిధులు అడిగే ప్రశ్నలకు ఆటగాళ్లు అంతే గంభీరంగా సమాధానాలు ఇస్తుంటారు. సరిగ్గా అలాంటి సమయంలోనే నితీష్ కుమార్ రెడ్డి మొబైల్ ఫోన్ మోగింది. స్క్రీన్ పై ‘అమ్మ’ అని చూడగానే నితీష్ ఏమాత్రం తడుముకోలేదు. సాధారణంగా సెలబ్రిటీలు లేదా క్రీడాకారులు ఇలాంటి కీలక సమయాల్లో ఫోన్లను సైలెంట్‌లో పెట్టడమో లేదా కాల్ కట్ చేసి తర్వాత మాట్లాడుతామని మెసేజ్ పెట్టడమో చేస్తుంటారు. కానీ నితీష్ మాత్రం ప్రెస్ మీట్‌ను కాసేపు పక్కన పెట్టి వెంటనే కాల్ లిఫ్ట్ చేసి తన తల్లితో మాట్లాడాడు.

మాతృభాషపై మమకారం.. తెలుగు నెటిజన్లు ఫిదా!

అయితే ఇక్కడ అభిమానులను.. ముఖ్యంగా తెలుగు ప్రజలను ఎంతగానో ఆకట్టుకున్న విషయం మరొకటి ఉంది. వందలాది కెమెరాలు, జాతీయ, అంతర్జాతీయ మీడియా ప్రతినిధులు చూస్తున్నారనే మొహమాటం లేకుండా నితీష్ తన తల్లిని ఎంతో ఆప్యాయంగా “అమ్మ” అని పలకరించాడు. అంతటితో ఆగకుండా ఆ సంభాషణ మొత్తాన్ని ఎంతో సహజంగా తన మాతృభాష అయిన తెలుగులోనే కొనసాగించాడు.

ఈ రోజుల్లో కొద్దిగా గుర్తింపు రాగానే మాతృభాషను పక్కన పెట్టి ఇంగ్లీష్ లేదా హిందీలోనే మాట్లాడటానికి ప్రాధాన్యత ఇచ్చే సెలబ్రిటీల సంఖ్య పెరుగుతోంది. అలాంటి కాలంలో అంతర్జాతీయ వేదికపై నితీష్ రెడ్డి ఎలాంటి ఆర్భాటం లేకుండా ఎంతో వినయంగా తెలుగులో మాట్లాడడం అందరి దృష్టిని ఆకర్షించింది.

సోషల్ మీడియాలో ప్రశంసల వర్షం

"ఎంత ఎదిగినా ఒదిగి ఉండడం అంటే ఇదే.. అంతర్జాతీయ స్థాయిలో ఆడుతున్నా తన మూలాలను, మాతృభాషను, కుటుంబ బంధాలను మర్చిపోని నితీష్ రియల్ హీరో" అని ఒక నెటిజన్ కామెంట్ చేశారు.

ప్రస్తుతం ఈ సంఘటనకు సంబంధించిన వీడియో క్లిప్ సోషల్ మీడియా ప్లాట్‌ఫారమ్స్ అయిన ఎక్స్, ఇన్‌స్టాగ్రామ్‌లలో విపరీతంగా ట్రెండ్ అవుతోంది. నితీష్ రెడ్డి ప్రవర్తన కేవలం భాషపై ఆయనకున్న ప్రేమే కాకుండా కన్నతల్లి పట్ల కుటుంబ విలువల పట్ల ఆయనకున్న గౌరవాన్ని ప్రతిబింబిస్తోందని నెటిజన్లు కొనియాడుతున్నారు.

కొన్ని సెకన్ల పాటు మాత్రమే సాగిన ఈ చిన్న సంఘటన నితీష్ రెడ్డికి మైదానం వెలుపల లక్షలాది మంది కొత్త అభిమానులను సంపాదించి పెట్టింది. మైదానంలో పరుగుల వరద పారించి టీమిండియా విజయంలో కీలక పాత్ర పోషించిన ఈ యువ క్రికెటర్.. ఇప్పుడు తన మాతృభాషపై ఉన్న మమకారంతో తెలుగు ప్రజల గుండెల్లో శాశ్వత స్థానాన్ని సంపాదించుకున్నాడు.