నిన్న అమెజాన్..నేడు ఒరాకిల్.. టెక్ దిగ్గజాలపై ఇరాన్ ఉక్కుపాదం: ఏం జరుగుతోంది?

మిడిల్ ఈస్ట్‌లో యుద్ధ మేఘాలు మరింతగా ముసురుకుంటున్నాయి. కేవలం సైనిక స్థావరాలకే పరిమితం కాకుండా ఈ ఉద్రిక్తతలు ఇప్పుడు ప్రపంచ టెక్ దిగ్గజాల వైపు మళ్లడం అంతర్జాతీయంగా పెను సంచలనం సృష్టిస్తోంది. అమెరికా, ఇజ్రాయెల్ దాడులకు ప్రతీకారంగా ఇరాన్ విప్లవ గార్డ్స్ ఇప్పుడు తన అస్త్రాలను టెక్ సంస్థలపై ప్రయోగిస్తుండటం గమనార్హం.

టెక్ దిగ్గజాలపై ఇరాన్ ఉక్కుపాదం..

ఇరాన్ ఇండస్ట్రియల్ హబ్‌లను, ముఖ్యంగా ఉక్కు పరిశ్రమలను లక్ష్యంగా చేసుకుని అమెరికా-ఇజ్రాయెల్ జరిపిన దాడుల తర్వాత ఇరాన్ తన వ్యూహాన్ని మార్చింది. అమెరికన్ టెక్ కంపెనీలు ఇజ్రాయెల్ సైనిక చర్యలకు సాంకేతిక సహకారాన్ని అందిస్తున్నాయని ఆరోపిస్తూ దాదాపు 18 ప్రముఖ టెక్ సంస్థలకు ఇరాన్ అల్టిమేటం జారీ చేసింది. ఈ కంపెనీల్లో పని చేసే ఉద్యోగులు తక్షణమే అప్రమత్తంగా ఉండాలని, ప్రాణాపాయం పొంచి ఉందని హెచ్చరించడం తీవ్ర కలకలం రేపుతోంది.

అమెజాన్, ఒరాకిల్‌పై దాడుల కలకలం

గత బుధవారం బహ్రెయిన్‌లోని అమెజాన్ క్లౌడ్ సర్వీసెస్ సదుపాయంపై క్షిపణి దాడి జరిగినట్లు వార్తలు వెలువడ్డాయి. స్థానిక అధికారులు ఒక టెక్ కేంద్రంపై దాడి జరిగినట్లు ధృవీకరించినప్పటికీ సంస్థ పేరును గోప్యంగా ఉంచారు. అయితే అంతర్జాతీయ మీడియా సంస్థలు ఇది అమెజాన్ కేంద్రమేనని ప్రాథమికంగా నిర్ధారించాయి. దీని తర్వాత కేవలం 24 గంటల వ్యవధిలోనే దుబాయ్‌లోని ఒరాకిల్ డేటా సెంటర్ లక్ష్యంగా దాడి జరిగినట్లు ఇరాన్ అధికారికంగా ప్రకటించింది. తమ బలగాలు నేరుగా ఒరాకిల్ సెంటర్‌ను ధ్వంసం చేశాయని, ఇది తమ ప్రతికార చర్యలో భాగమని ఇరాన్ మీడియా వెల్లడించింది. దుబాయ్ ప్రభుత్వం ఈ వార్తలను తీవ్రంగా ఖండించింది. నగరంలో ఎలాంటి భౌతిక దాడులు జరగలేదని, ఇవన్నీ నిరాధారమైన ఆరోపణలని స్పష్టం చేసింది.

యుద్ధ నీడలో టెక్నాలజీ

సాధారణంగా యుద్ధాలు భూమి ఆకాశం లేదా సముద్ర సరిహద్దుల్లో జరుగుతాయి. కానీ ప్రస్తుత పరిస్థితుల్లో డేటా, క్లౌడ్ కంప్యూటింగ్, సైబర్ ఇన్‌ఫ్రాస్ట్రక్చర్ యుద్ధ క్షేత్రాలుగా మారుతున్నాయి. ఇరాన్ వాదన ప్రకారం, అమెరికన్ క్లౌడ్ సంస్థలు ఇజ్రాయెల్ యొక్క నిఘా వ్యవస్థలకు మరియు దాడుల వ్యూహాలకు తమ సర్వర్ల ద్వారా సహకరిస్తున్నాయి. అందుకే వీటిని సైనిక లక్ష్యాలుగా ఇరాన్ పరిగణిస్తోంది. అమెజాన్, ఒరాకిల్, ఇతర 16 అమెరికన్ టెక్ కంపెనీలను టార్గెట్ చేశారు. బహ్రెయిన్, దుబాయ్ లోని సంస్థలను ఇరాన్ ఎంపిక చేసింది. టెక్ ఉద్యోగులు తక్షణమే క్షేత్రస్థాయి నుంచి తప్పుకోవాలని సూచించింది. యుద్ధం రెండో నెలలోకి ప్రవేశించినా శాంతి సూచనలు కనిపించడం లేదు.

అమెరికా వైఖరి.. ట్రంప్ స్పందన

ఈ దాడులు ప్రపంచ ఆర్థిక వ్యవస్థపై తీవ్ర ప్రభావం చూపే అవకాశం ఉన్నప్పటికీ అమెరికా మాజీ అధ్యక్షుడు డొనాల్డ్ ట్రంప్ వీటిని అంత గంభీరంగా తీసుకోవడం లేదని విశ్లేషకులు భావిస్తున్నారు. ఐఆర్.జీసీ హెచ్చరికలను ఆయన తేలికగా తీసుకున్నట్లు సంకేతాలు వెలువడ్డాయి. అయినప్పటికీ అంతర్గతంగా చర్చల ద్వారా సమస్యను పరిష్కరించి, పూర్తిస్థాయి కాల్పుల విరమణ దిశగా అడుగులు వేస్తామని ఆయన హామీ ఇచ్చారు. "టెక్నాలజీ సంస్థలను లక్ష్యంగా చేసుకోవడం ద్వారా ఇరాన్ ప్రపంచ సమాచార వ్యవస్థను స్తంభింపజేయాలని చూస్తోంది. ఇది కేవలం అమెరికాపై దాడి మాత్రమే కాదు.. గ్లోబల్ డిజిటల్ ఎకానమీపై జరుగుతున్న దాడి."

మిడిల్ ఈస్ట్‌లో నెలకొన్న ఈ ఉద్రిక్తతలు కేవలం ప్రాంతీయ పోరాటంగా మిగిలిపోకుండా ప్రపంచీకరణ చెందిన టెక్ రంగాన్ని కూడా సంక్షోభంలోకి నెట్టేస్తున్నాయి. బహ్రెయిన్, యూఏఈ వంటి దేశాల్లో ఉన్న డేటా సెంటర్లు అంతర్జాతీయ వ్యాపారాలకు వెన్నెముక వంటివి. ఇరాన్ తన హెచ్చరికలను నిజం చేస్తూ దాడులను ముమ్మరం చేస్తే, అది ప్రపంచవ్యాప్తంగా డిజిటల్ సేవలకు ఆటంకం కలిగించడమే కాకుండా, పెద్ద ఎత్తున ప్రాణ, ఆస్తి నష్టానికి దారితీసే ప్రమాదం ఉంది. యుద్ధం ముగిసి శాంతి నెలకొనాలని ప్రపంచ దేశాలు ఆశిస్తున్నా, క్షేత్రస్థాయిలో మాత్రం క్షిపణుల మోత మారుమోగుతూనే ఉంది.