మీర్ పేట్ హత్య కేసులో విస్మయకర విషయాలు... వామ్మో గురుమూర్తి!

మీర్ పేట్ లో భార్యను హత్య చేసి ముక్కలుగా చేసి, ఆధారాల కోసం పోలీసులు మూడు చెరువుల నీళ్లు తాగే పరిస్థితి కల్పించినట్లు చెబుతున్న నిందితుడు గురుమూర్తికి సంబంధించి తెరపైకి షాకింగ్ విషయాలు వస్తున్నాయి. హత్య అనంతరం ఇంట్లో హత్య చేసిన చోటే పిల్లలతో ఎంతో ప్రేమగా, ఏమీ జరగలేదు అన్నట్లు నార్మల్ గా అతడి ప్రవర్తన షాకింగ్ గా ఉందని అంటున్నారు.

అవును... మీర్ పేట్ హత్య కేసులో నిందితుడు గురుమూర్తి ప్రవర్తన విస్మయానికి గురి చేసిందని అంటున్నారు. ఇందులో భాగంగా... భార్యను హత్య చేసి ముక్కలుగా చేసిన అనంతరం కుమార్తె (9), కుమారుడు (4)ని బడంగ్ పేట్ లోని సోదరి ఇంటి నుంచి తన ఇంటికి తీసుకొచ్చే సమయంలోనూ, తీసుకొచ్చిన తర్వాతా చాలా నార్మల్ గానే ప్రవర్తించినట్లు చెబుతున్నారు.

ఇలా పిల్లలను ఇంటికి తీసుకొస్తున్నప్పుడు దారిలో అల్పాహరం తినిపించాడట. హత్య చేసిన చోటే గురుమూర్తి తన పిల్లలతో కలిసి రెండు రోజులు నివాసం ఉన్నాడు. ఇంటికి వచ్చాక అమ్మ ఏదని అడిగిన పిల్లలతో ఒక్కోసారి ఒక్కో సమాధానం చెప్పాడట. ఇక భార్య మృతదేహాన్ని ముక్కలూ చేసేందుకు వాడిన బాత్రుంలోనే పిల్లల అవసరాలు తీర్చి, ఏమీ జరగనట్లు అత్యంత నార్మల్ గా ఉన్నాడని అంటున్నారు.

వారికి ఆకలేస్తే ఆన్ లైన్ లో ఫుడ్ తెప్పించాడట. ఇక.. ఇల్లంతా చెడు వాసన వస్తుందని పిల్లలు అంటే.. ఎయిర్ ఫ్రెష్ నర్ తో ఆ దుర్వాసన పోగొట్టేందుకు ప్రయత్నించినట్లు చెబుతున్నారు. మరోపక్క పిల్లలు పడక గదిలోకి వెళ్లకుండా దానికి తాళం వేసినట్లు చెబుతున్నారు.

లాయర్ వద్దు... జైల్లోనే ఉంటాను!:

ఇక కోర్టులోనూ గురుమూర్తి ప్రవర్తన విస్మయానికి గురిచేసిందని అంటున్నారు. ఇందులో భాగంగా... మీర్ పేట పోలీసులు నిందితుడు గురుముర్తిని బుధవారం రంగారెడ్డి జిల్లా 6వ అడిషనల్ జ్యుడీషియల్ ఫస్ట్ క్లాస్ మెజిస్ట్రేట్ కోర్టులో హాజరుపరిచారు. ఈ సమయలో న్యాయమూర్తి అడిగిన ప్రశ్నలకు గురుమూర్తి ఏమాత్రం భయం, బెరుకు లేకుండా సమాధానం ఇచ్చినట్లు చెబుతున్నారు.

ఈ సమయంలో... న్యాయవాదిని పెట్టుకుంటావా అని న్యాయమూర్తి అడగ్గా.. వద్దు అని చెప్పిన గురుమూర్తి.. లీగల్ ఎయిడ్ తరుపున న్యాయవాదిని ఏర్పాటు చేయాలా అని అడిగినప్పుడు.. అవసరం లేదని, తాను జైల్లోనే ఉంటానని బదులిచ్చినట్లు చెబుతున్నారు. ఈ సమయంలో గురుమూర్తికి న్యాయస్థానం 14 రోజుల రిమాండ్ విధించింది. పోలీసులు చర్లపల్లి జైలుకు తరలించారు.