ఫోను ట్యాప్ చేసి నన్ను, నా భార్య ను బెదిరించారు! : కొండా

ఫోన్ ట్యాపింగ్ కేసులో బాధితుడిగా ఉన్న చేవెళ్ల బీజేపీ ఎంపీ కొండా విశ్వేశ్వర్ రెడ్డి నేడు జూబ్లీహిల్స్ పోలీస్ స్టేషన్‌లో సిట్ విచారణకు హాజరయ్యారు. విచారణ అనంతరం మీడియాతో మాట్లాడుతూ తన ఫోన్ ట్యాపింగ్‌కు గురైనట్లు అనేక అంశాలను సిట్‌కు వివరించినట్లు తెలిపారు. తన వద్ద ఉన్న ఆధారాలను కూడా సమర్పించినట్లు వెల్లడించారు. "నా ఫోను, నా భార్య ఫోను ట్యాప్ చేసి బెదిరించారు" అని కొండా విశ్వేశ్వర్ రెడ్డి ఆవేదన వ్యక్తం చేశారు. గత ఎన్నికల సమయంలో రెండు వారాలు బెంగళూరుకు పారిపోయి హోటల్‌లో ఉన్నానని, అభద్రతా భావంతోనే తన ఫోన్ ట్యాపింగ్‌కు పాల్పడ్డారని ఆయన చెప్పుకొచ్చారు. ప్రజల ప్రైవసీకి భంగం కలిగించి, రాజకీయాల కోసం చట్టవిరుద్ధంగా ఫోన్ ట్యాపింగ్‌కు పాల్పడ్డారని ఆరోపించారు.

ప్రైవసీకి భంగం, బెదిరింపులు:

కొండా విశ్వేశ్వర్ రెడ్డి మాట్లాడుతూ ప్రజల ప్రైవసీకి భంగం కలిగించి, రాజకీయ ప్రయోజనాల కోసం చట్టవిరుద్ధంగా ఫోన్ ట్యాపింగ్‌కు పాల్పడ్డారని ఆరోపించారు. బీఆర్ఎస్ పార్టీ నుంచి బయటకు వచ్చిన తర్వాత తన ఫోన్‌ను ట్యాప్ చేశారని అనుమానం వచ్చిందని, ముఖ్యంగా మునుగోడు, దుబ్బాక ఎన్నికల సమయంలో తన ఫోన్ ట్యాప్ అయిందని తెలిపారు. వారెంట్ లేకుండా తన కార్యాలయంలోకి కొందరు దౌర్జన్యంగా వచ్చి ఫోన్ ట్యాప్ చేశారని, అప్పటి డీజీపీ మహేందర్ రెడ్డి దృష్టికి తీసుకెళ్లినా పట్టించుకోలేదని ఆవేదన వ్యక్తం చేశారు. గత ఎన్నికల సమయంలో బెదిరింపుల కారణంగా రెండు వారాలు బెంగళూరులో హోటల్‌లో ఉండాల్సి వచ్చిందని ఆయన వెల్లడించారు.

-కేసీఆర్, కేటీఆర్‌లపై చర్యలు తీసుకోవాలి:

కొంతమంది బీఆర్ఎస్ నాయకుల ఫోన్లు కూడా ట్యాపింగ్ అయ్యాయని కొండా విశ్వేశ్వర్ రెడ్డి పేర్కొన్నారు. ఈ కేసులో కీలకమైన మాజీ ముఖ్యమంత్రి కేసీఆర్, మాజీ మంత్రి కేటీఆర్‌లపై చర్యలు తీసుకోవాలని ఆయన డిమాండ్ చేశారు. ఫోన్ ట్యాపింగ్ నిందితులకు శిక్ష పడాల్సిందేనని, ఈ విషయాన్ని పార్లమెంటులో కూడా లేవనెత్తుతానని స్పష్టం చేశారు. ఫోన్ ట్యాపింగ్‌కు పాల్పడిన వారు ఎంతటివారైనా జైలుకు వెళ్లాల్సిందేనని ఆయన అన్నారు.

సిట్ దర్యాప్తు ముమ్మరం:

తెలంగాణలో గత బీఆర్ఎస్ ప్రభుత్వ హయాంలో వేలాది ఫోన్లు ట్యాప్ చేయబడినట్లు ఆరోపణలున్నాయి. ఈ కేసులో ఇప్పటికే పలువురు అధికారులను సిట్ అరెస్టు చేసి విచారిస్తోంది. మాజీ ఎస్‌ఐబీ చీఫ్ ప్రభాకర్ రావు, మాజీ డీఎస్పీ ప్రణీత్ రావుల విచారణలో కీలక విషయాలు వెలుగులోకి వచ్చినట్లు తెలుస్తోంది. సిట్ ఇప్పటివరకు సుమారు 618 మంది ప్రముఖులు, రాజకీయ నాయకులు, వ్యాపారవేత్తలు, మీడియా వ్యక్తుల ఫోన్లు ట్యాప్ అయినట్లు గుర్తించింది. వీరిలో 228 మంది వాంగ్మూలాలను ఇప్పటికే నమోదు చేసింది. విచారణకు సహకరించని ప్రభాకర్ రావు విషయంలో సుప్రీంకోర్టును ఆశ్రయించే ఆలోచనలో సిట్ ఉన్నట్లు సమాచారం.

ఫోన్ ట్యాపింగ్ కేసు తెలంగాణ రాజకీయాల్లో ప్రకంపనలు సృష్టిస్తోంది. ఈ కేసు దర్యాప్తు పురోగతి, అందులో బయటపడే వివరాలపై సర్వత్రా ఉత్కంఠ నెలకొంది.