సీఎం రేవంత్ పై కోమటిరెడ్డి మరో తిరుగుబాటు

తెలంగాణ రాష్ట్రంలో కాంగ్రెస్ ప్రభుత్వం ఏర్పడిన కొన్ని నెలల్లోనే అంతర్గత విభేదాలు మరోసారి బయటపడ్డాయి. ముఖ్యమంత్రి రేవంత్ రెడ్డి చేసిన కొన్ని వ్యాఖ్యలపై కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి తీవ్ర అభ్యంతరం వ్యక్తం చేయడం ఇప్పుడు రాజకీయ వర్గాల్లో చర్చనీయాంశంగా మారింది. ఇది పార్టీలో ఐక్యతకు సవాలుగా పరిణమించే అవకాశం ఉందని విశ్లేషకులు భావిస్తున్నారు.

-సీఎం రేవంత్ రెడ్డి వ్యాఖ్యలు, కోమటిరెడ్డి స్పందన

ఇటీవల ఒక కార్యక్రమంలో ముఖ్యమంత్రి రేవంత్ రెడ్డి "ఏబీసీడీలు రానివారు కూడా సోషల్ మీడియా జర్నలిస్టులమని చెప్పుకుంటున్నారు" అని వ్యాఖ్యానించారు. ఈ వ్యాఖ్యలు సోషల్ మీడియా కార్యకర్తలు, యువత భావాలను కించపరిచేలా ఉన్నాయని అనేకమంది అభిప్రాయపడ్డారు. ఈ నేపథ్యంలో కోమటిరెడ్డి రాజగోపాల్ రెడ్డి తన ట్విట్టర్ వేదికగా పరోక్షంగా సీఎం వ్యాఖ్యలను ఖండించారు. కోమటిరెడ్డి తన ట్వీట్‌లో "తెలంగాణ ఆకాంక్షల మేరకు సోషల్ మీడియా తన శక్తికొద్దీ పని చేస్తూనే ఉంది. వారిని దూరం పెట్టాలంటూ, ప్రధాన మీడియా వారిని ఎగదోయడం విభజించి పాలించడమే. ఈ కుటిల పన్నాగాలను సమాజం సహించదు." అని ఘాటు విమర్శల చేశారు.

-విభేదాలు కొత్తవి కావు

కోమటిరెడ్డి రాజగోపాల్ రెడ్డి తరచుగా ప్రభుత్వ విధానాలపై బహిరంగంగా విమర్శలు చేయడం ఇది మొదటిసారి కాదు. గతంలో కూడా పలు సందర్భాల్లో ముఖ్యమంత్రి రేవంత్ రెడ్డితో ఆయనకు అభిప్రాయ భేదాలు ఉన్నాయని వార్తలు వచ్చాయి. ఒకవైపు కాంగ్రెస్ లో కీలక నేతగా కొనసాగుతూనే, మరోవైపు ప్రభుత్వ నిర్ణయాలపై అసంతృప్తి వ్యక్తం చేయడం గమనార్హం. ఈ తాజా విమర్శలు సోషల్ మీడియా వేదికగా ఉద్యమాలు నడిపిన యువత, కార్యకర్తల మద్దతును కోమటిరెడ్డి కూడగట్టుకునే ప్రయత్నంగా కూడా కనిపిస్తున్నాయి. గత ఎన్నికల సమయంలో కాంగ్రెస్ కు మద్దతుగా సోషల్ మీడియా పోషించిన పాత్రను, దాని ప్రాముఖ్యతను ఆయన తన వ్యాఖ్యల ద్వారా మరోసారి గుర్తు చేశారు.

పార్టీ అధిష్టానం ఏం చేస్తుంది?

కోమటిరెడ్డి రాజగోపాల్ రెడ్డి వ్యాఖ్యలు కాంగ్రెస్ పార్టీలో అంతర్గత విభేదాలు మరింత ముదిరే అవకాశాలను సూచిస్తున్నాయి. ఈ పరిస్థితులపై పార్టీ అధిష్టానం ఎలా స్పందిస్తుందనేది ఆసక్తికరంగా మారింది. ప్రభుత్వంలో ఐక్యత లోపిస్తుందా? లేదా ఇది కేవలం వ్యక్తిగత అబిప్రాయ భేదంగానే మిగిలిపోతుందా? అనేది రాబోయే రోజుల్లో తేలాల్సి ఉంది. ఈ పరిణామాలు తెలంగాణ రాజకీయాల్లో ఎలాంటి కొత్త మలుపులకు నాంది పలుకుతాయో చూడాలి.