బీఆరెస్స్ ఎంపీపై కత్తితో దాడి... కడుపులో పొడిచిన దుండగుడు!

బీఆరెస్స్ నేత, మెదక్ ఎంపీ, ప్రస్తుత దుబ్బాయ ఎమ్మెల్యే అభ్యర్థి అయిన కొత్త ప్రభాకర్ రెడ్డిపై హత్యాయత్నం జరిగింది. దుబ్బాక నియోజకవర్గ పరిధిలోని సూరంపల్లిలో ప్రచారం నిర్వహిస్తుండగా ఓ వ్యక్తి ఎంపీపై కత్తితో దాడి చేశాడు. ఈ ఘటనలో ఎంపీ ప్రభాకర్ రెడ్డి కడుపు భాగంలో తీవ్ర గాయమైంది. దీంతో అప్రమత్తమైన బీఆరెస్స్ కార్యకర్తలు హుటాహుటిన ప్రభాకర్ రెడ్డిని ఆసుపత్రికి తరలించారు.

అవును... తాజాగా దుబ్బాక నియోజకవర్గంలో ఎవరూ ఊహించని సంఘటన జరిగింది. ఎన్నికలు ప్రచారం నిర్వహిస్తోన్న ఎంపీపై దుండగుడు కత్తితో కడుపులో పొడిచాడు. దీంతో.. ఆ దాడికి పాల్పడిన వ్యక్తిని పట్టుకుని బీఆరెస్స్ కార్యకర్తలు చితకబాదినట్లు తెలుస్తుంది.

అనంతరం అతడిని పోలీసులు అదుపులోకి తీసుకున్నారని సమాచారం. ఇక ఈ నిందితుడిని మిరుదొడ్డి మండలం చెప్పాల గ్రామానికి చెందిన రాజు అనే వ్యక్తిగా గుర్తించారని అంటున్నారు!

అయితే కొత్త ప్రభాకర్ రెడ్డిపై దాడి సంగతి తెలియగానే మంత్రి హరీష్‌ రావు ఫోన్‌ లో పరామర్శించిన అనంతరం హుటాహుటున మెదక్‌ బయల్దేరారు. ప్రస్తుతం గజ్వేల్ ఆసుపత్రిలో చికిత్స పొందుతున్న అతనిని.. మెరుగైన చికిత్స కోసం హైదరాబాద్ కు తరలించాలని హరీష్ రావు సూచించారు. దీంతో ఆయన సూచనల మేరకు సికింద్రాబాద్ యశోద కు తరలిస్తున్నారని సమాచారం!

కాగా... గత ఎన్నికల్లో మెదక్ నుంచి ఎంపీగా గెలిచిన కొత్త ప్రభాకర్ రెడ్డి.. ప్రస్తుతం దుబ్బాక నుంచి ఎమ్మెల్యేగా పోటీ చేస్తున్నారు. ఇప్పటికే బీఆరెస్స్ నుంచి బీఫాం అందుకున్న ఆయన.. ఎన్నికల ప్రచారం చేస్తున్నారు. ఈ క్రమంలోనే ఇవాళ ఉదయం ఓ పాస్టర్ కుటుంబాన్ని పరామర్శించి వస్తుండగా.. షేక్ హ్యాండ్ ఇస్తానని చెప్పి దగ్గరకొచ్చిన దుండగుడు ప్రభాకర్ రెడ్డి కడుపులో కత్తితో పొడిచాడు!