ముందు యాక్సిడెంట్ ప్లాన్.. తర్వాత మర్డర్ ప్లాన్.. ఫుణే కేతన్ కేసులో మరో నిజం

జీవితంపై వేల ఆశలతో కొత్త ప్రయాణానికి సిద్ధమవుతున్న ఒక అమాయక యువకుడు... అతని నమ్మకాన్ని ప్రాణాలను బలితీసుకున్న కిరాతక కుట్ర.. మహారాష్ట్ర వ్యాప్తంగా తీవ్ర సంచలనం సృష్టించిన ‘పుణే ఫోర్ట్ మర్డర్ కేసు’ వెనుక ఉన్న నమ్మకద్రోహం, దిగ్భ్రాంతికర నిజాలు ఒక్కొక్కటిగా వెలుగులోకి వస్తూ వినే ప్రతి గుండెనూ పిండేస్తున్నాయి.

ఆశల పందిరి నుంచి శ్మశాన వాటిక వైపు...

బాధితుడు కేతన్ అగర్వాల్ జీవితంలో త్వరలోనే ఒక కొత్త అధ్యాయం ప్రారంభం కావాల్సి ఉంది. ఇంట్లో పెళ్లి బాజాలు మోగే సమయం దగ్గరపడుతోంది. కానీ తన చుట్టూ క్రూరమైన పన్నాగం అల్లుకుంటోందని ఆ పాపం అతనికి తెలియదు. ఒకవైపు కుటుంబమంతా సంబరాల్లో మునిగి తేలుతుంటే, మరోవైపు సియా గోయల్, చేతన్ అనే ఇద్దరు నిందితులు అతని నూరేళ్ల జీవితాన్ని ముగించడానికి పథకాలు వేస్తున్నారు.

మొదట అతనికి తీవ్ర గాయాలు చేసి, ఆసుపత్రిపాలు చేయడం ద్వారా పెళ్లిని వాయిదా వేయాలని అనుకున్నారు. దానికోసం ఒక పక్కా రోడ్డు ప్రమాదాన్ని కూడా డిజైన్ చేశారు. కానీ అక్కడే వారిలోని రాక్షసత్వం మరో స్థాయికి చేరింది. "ఒకవేళ యాక్సిడెంట్ తర్వాత కేతన్ ప్రాణాలతో బయటపడితే? మన ముసుగు తొలగిపోయి పేర్లు బయటపడితే?" ఈ ఒక్క భయం వారిలోని పగను మరింత రగిల్చింది. గాయపరిచి వదిలేస్తే ముప్పు తప్పదని భావించిన ఆ కిరాతకులు.. అతని శ్వాసనే శాశ్వతంగా ఆర్పేయాలని దారుణ నిర్ణయం తీసుకున్నారు.

ఇంటర్నెట్ సాక్షిగా... నమ్మకద్రోహానికి పక్కా స్కెచ్!

అంతటితో ఆగలేదు... ఒక మనిషి ప్రాణాన్ని తీయడానికి వారం రోజుల పాటు తీవ్రంగా రీసెర్చ్ చేశారు. ఎలా చంపాలి? క్రైమ్ సీన్ నుంచి ఆధారాలు దొరక్కుండా ఎలా తప్పించుకోవాలి? అని ఇంటర్నెట్‌లో రాత్రింబవళ్లు శోధించారు. నేర ఆధారిత క్రైమ్ సినిమాలు చూస్తూ డిజిటల్ యుగంలో నేరం చేసి ఎలా నిందలు పడకుండా ఉండాలో దారుణమైన ప్రయోగాలు చేశారు.

అయితే నేరం ఎంత పక్కాగా చేసినా చట్టం కన్ను కప్పడం సాధ్యం కాదు. నిందితుల మొబైల్ ఫోన్లు, సెర్చ్ హిస్టరీ, వారి మధ్య జరిగిన చాటింగ్‌లు... వారు తొక్కిన ప్రతి అడుగు డిజిటల్ ఆధారాల రూపంలో పోలీసులకు చిక్కింది.

మిగిలిన ఆవేదన

పెళ్లి పీటలు ఎక్కాల్సిన ఒక యువకుడు.. ఆన్‌లైన్ నిష్ఠుర కుట్రకు బలవుతారని ఏ కన్నవారూ ఊహించరు. ఆ దారుణానికి కేతన్ అగర్వాల్ కుటుంబం గుండెలు పగిలేలా విలపిస్తోంది. నమ్మకమే ప్రాణాలు తీసే ఆయుధంగా మారిన ఈ ఘోర కలికాలంలో చట్టం నిందితులకు కఠినాతి కఠినమైన శిక్ష విధించి.. ఆ అమాయకుడి ఆత్మకు శాంతి చేకూర్చాలని ప్రార్థిద్దాం.