'డీకే'కు ఎసరు పెడుతోన్న సీఎం సిద్ధరామయ్య

కర్ణాటక కాంగ్రెస్ రాజకీయాల్లో మరోసారి ఉత్కంఠ నెలకొంది. ముఖ్యమంత్రి సిద్ధరామయ్య, ఉపముఖ్యమంత్రి డీకే శివకుమార్ మధ్య కొనసాగుతున్న కోల్డ్ వార్ తదుపరి దశకు చేరినట్లు సంకేతాలు వెలువడుతున్నాయి. తాజాగా డీకే శివకుమార్‌ను పీసీసీ (ప్రదేశ్‌ కాంగ్రెస్ కమిటీ) అధ్యక్ష పదవి నుంచి తప్పించేందుకు సిద్ధరామయ్య వర్గం తీవ్రంగా ప్రయత్నిస్తున్నట్లు సమాచారం.

-అధిష్ఠానాన్ని ఒప్పించే ప్రయత్నాలు

సిద్ధరామయ్య శిబిరం ఇటీవల ఢిల్లీలో కాంగ్రెస్ అధినేత మల్లికార్జున ఖర్గేతో కీలక సమావేశం నిర్వహించినట్లు తెలుస్తోంది. ఈ సమావేశంలో డీకే శివకుమార్‌ను పీసీసీ చీఫ్ పదవి నుంచి తొలగించి, కొత్త నేతను నియమించాలని ప్రతిపాదించినట్లు సమాచారం. ఈ నేపథ్యంలో పబ్లిక్ వర్క్స్ మంత్రిగా ఉన్న సీనియర్ ఎస్టీ నేత సతీష్ జార్కిహోళి పేరును ఆ స్థానానికి సిఫార్సు చేశారు. కర్ణాటకలో ఎస్టీ ఓట్ల ప్రాధాన్యతను దృష్టిలో ఉంచుకొని జార్కిహోళిని ప్రోజెక్ట్ చేయాలని సిద్ధరామయ్య వర్గం భావిస్తోంది.

"ఒకరికి ఒక పదవి" సూత్రంపై వాదన

"ఒకరికి ఒకే పదవి" అనే కాంగ్రెస్ పార్టీ నియమాన్ని పునరుద్ఘాటిస్తూ డీకే శివకుమార్ ఇప్పటికే రెండు కీలక పదవులు ఉపముఖ్యమంత్రి, పీసీసీ చీఫ్ చేపట్టిన నేపథ్యంలో ఆయనను పీసీసీ చీఫ్ పదవి నుంచి తప్పించాలని సీఎం వర్గం బలంగా వాదిస్తోంది. ఒకవేళ జార్కిహోళికి పీసీసీ పదవి ఇస్తే, మంత్రి పదవిని వదులుకోవాలని ఆయనను ఒప్పించినట్లు కూడా తెలుస్తోంది.

- డీకే అధికారాలకు కత్తెర వేయాలనే వ్యూహం

డీకే శివకుమార్ పార్టీ అధ్యక్షుడిగా తన మద్దతుదారులుగా ఉన్న ఎమ్మెల్యేలను స్వతంత్రంగా ప్రభావితం చేయకుండా నియంత్రించేందుకు ఈ ప్రయత్నాలు జరుగుతున్నాయి. పార్టీ వ్యవస్థపై ఆయన ఆధిపత్యాన్ని తగ్గించే దిశగా సీఎం వర్గం వ్యూహరచన చేస్తోంది. ఈ మార్పులు ఆగస్టు లేదా సెప్టెంబర్‌లో అమలయ్యే అవకాశం ఉందని వార్తలు వస్తున్నాయి.

-విభేదాల తారాస్థాయికి

ముఖ్యమంత్రి పదవిని డీకే శివకుమార్‌కు ఇవ్వాలన్న వాదన, సిద్ధరామయ్య వైఖరితో తీవ్రంగా విభేదిస్తోంది. దీంతో, ఇద్దరు నేతల మధ్య అంతర్గత విభేదాలు పార్టీలో తీవ్ర రూపం దాల్చాయి. ఈ నేపథ్యంలో, వచ్చే లోక్‌సభ ఎన్నికలకు ముందు పార్టీలో నాయకుల సమన్వయం లోపించే ప్రమాదం ఉందని విశ్లేషకులు భావిస్తున్నారు.

ఈ పరిణామాలు డీకే శివకుమార్ రాజకీయ భవిష్యత్‌పై ఎంతమేర ప్రభావం చూపుతాయో చూడాలి. అధిష్ఠానం చివరికి ఎవరి వాదనను అంగీకరిస్తుందన్నది ఆసక్తికరంగా మారింది. కర్ణాటక కాంగ్రెస్‌లో నాయకత్వ మార్పులు నిజంగానే జరుగుతాయా లేక ఇది కేవలం ఒత్తిడి రాజకీయమా అన్నది త్వరలోనే స్పష్టమవుతుంది.